မဲခေါင်၊ ဒီဇင်ဘာ ၁၆
ရှမ်းပြည်မြောက်ပိုင်း၊ မူဆယ်မြို့နယ်၊ ၁၀၅ မိုင်တွင် ကျောက်သယ်ကား ဘရိတ်ပေါက်ပြီး လမ်းသွား လမ်းလာများအား ဝင်တိုက်မိရာ ပြည်သူ ၂ ဦးသေဆုံးပြီး ၉ ဦး ထိခိုက် ဒဏ်ရာရရှိသည်ဟု ဒေသခံ သတင်းရင်းမြစ်များထံမှ သိရသည်။
ဒီဇင်ဘာ ၁၄ ရက်၊ ညနေ ၃ နာရီ ခန့်တွင် အသက် ၃၂ နှစ်အရွယ် ကိုရဲမင်းဖြိုး မောင်းနှင်လာသည့် ဗြုန်းကျောက် သယ်ဆောင်လာသော ၆ ဘီးကားက မူဆယ် ၁၀၅ မိုင်ရှိ ညီနောင် မဟာမိတ် ၃ ဖွဲ့၏ စစ်ဆေးရေးဂိတ် အနီးတွင် လမ်းသွား လမ်းလာများကို တိုက်မိခဲ့ခြင်းဖြစ်သည်။
ယင်းကြောင့် ဒေါ်တင်စိုးဟွမ်နှင့် ဒေါ်ဟုန်စံတင်တို့ ၂ ဦးသေဆုံးခဲ့ပြီး အမျိုးသမီးတစ်ဦးနှင့် အမျိုး သား ၈ ဦး ထိခိုက် ဒဏ်ရာရရှိခဲ့သည်ဟု တအာင်းအမျိုးသား လွတ်မြောက်ရေးတပ်မတော် – TNLA က သတင်းထုတ်ပြန်သည်။
“အမျိုးသမီး ၂ ဦးသေသွားတယ်။ ဂိတ်မှာက ခရီးသည်တွေက ကားပေါ်ကနေ ဆင်းပြီး လမ်းလျှောက်သွားရတဲ့ နေရာပေါ့။ အဲဒါကြောင့် တိုက်မိတာလည်း များသွားတာ။ သေတဲ့ ၂ ယောက်က တိုက်မိတဲ့ နေရာမှာပဲ သေသွားတာ”ဟု မူဆယ် သတင်းရင်းမြစ်တစ်ဦးက ပြောသည်။
ကားတိုက်မှုကြောင့် ဒဏ်ရာရသူများကိုမူ လူမှု ကူညီရေးအသင်းနှင့် ညီနောင် မဟာမိတ် ၃ ဖွဲ့က ဆေးရုံသို့ ပို့ဆောင်ပေးခဲ့ပြီး ယာဉ်မောင်းကိုလည်း ညီနောင်မဟာမိတ် ၃ ဖွဲ့က ဖမ်းဆီးထားသည်ဟု TNLA က သတင်းထုတ်ပြန်သည်။
မူဆယ် ၁၀၅ မိုင်သည် ၁၀၂၇ စစ်ဆင်ရေးအတွင်း ညီနောင်မဟာမိတ် ၃ ဖွဲ့က စစ်ကောင်စီတပ်အား တိုက်ထုတ်ကာ သိမ်းပိုက် ထိန်းချုပ်ထားသည့် နေရာဖြစ်သည်။
#MeKongNews
#မူဆယ်
# ၁၀၅ မိုင်
#ကျောက်သယ်ကား
#သေဆုံး
