မဲခေါင်၊ ဒီဇင်ဘာ ၆
စက်တင်ဘာလကတည်းက အငြင်းပွားဖွယ်ရာဖြစ်နေခဲ့သော ထိုင်းနိုင်ငံရှိ ဂျပန်အဲကွန်း Daikin ထုတ် စက်ရုံသည် အလုပ်သမားများနှင့် နှစ်ပတ်လည် ဘောနပ်စ်ကိစ္စ ၁၂ ကြိမ်မြောက်ဆွေးနွေးမှု မအောင်မြင်သောကြောင့် ဒီဇင်ဘာ ၆ ရက်မှ စတင်ပြီး အလုပ်သမား ၁၃၀၀ ကို အလုပ်လာဆင်းခွင့် မပြုတော့ဘဲ စက်ရုံသော့ပိတ်ထားတော့မည်ဟု ဒီဇင်ဘာ ၅ ရက်၌ ကြေညာသွားခဲ့သည်။
Daikin စက်ရုံထုတ် အဲကွန်းများသည် ပြီးခဲ့သည့် ဘဏ္ဍာနှစ်အတွင်း အမြတ်ငွေ ဘတ် ၅ ဒသမ ၉ ဘီလီယံ ရရှိခဲ့သော်လည်း အလုပ်သမားများအပေါ် လစာ ၃ ရာခိုင်နှုန်းသာ တိုးပေးသည်မှအပ နှစ်ပတ်လည် ဘောနပ်စ်ပေးမှုတွင်လည်း တိုးပေးနိုင်သည့် အနေအထားတွင် အလုပ်သမားများတောင်းဆိုသည့် ဘောနပ်စ်နှုန်းကို မပေးသောကြောင့် စက်ရုံတည်ရှိရာ ချွန်ဘူရီခရိုင် အလုပ်သမားသမဂ္ဂနှင့် Daikin စက်ရုံ အလုပ်သမားသမဂ္ဂတို့ စက်ရုံတာဝန်ရှိသူများနှင့် အကြိမ်ကြိမ် ဆွေးနွေးခဲ့ကာ ဒီဇင်ဘာ ၄ ရက် ဆွေးနွေးမှုတွင်လည်း ညှိနှိုင်းမှုအဆင်မပြေသောကြောင့် စက်ရုံဘက်မှ ယခုလို စက်ရုံပိတ်ရန် ဆုံးဖြတ်ကြေညာခဲ့ခြင်း ဖြစ်သည်။
စက်ရုံဘက်မှ နောက်ဆုံးဆွေးနွေးမှုအပြီး နှစ်ပတ်လည်ဘောနပ်စ်အဖြစ် ၆ လစာ + ဘတ် ၁၂၀၀၀ ပေးမည်ဟု လက်ခံခဲ့သော်လည်း အလုပ်သမားများဘက်က ၈ လစာ + ဘတ် ၂၄၀၀၀ တောင်းဆိုထားသဖြင့် ယခုလို စက်ရုံသော့ပိတ်ရခြင်းဖြစ်ကာ ရွှေစျေး အလွန်မြင့်တက်ခြင်းကြောင့်လည်း လုပ်သက်ရင့်သူများအတွက် စက်ရုံထုံးစံအရ ရွှေသားဆုပေးခြင်းတွင်လည်း လျှော့ကျသွားသဖြင့် အလုပ်သမားများဘက်မှ လက်မခံနိုင်ခဲ့ခြင်းဖြစ်သည်။
ယခင် ၁၀ နှစ်အထက် လုပ်သက်ရှိဝန်ထမ်းများကို ရွှေသားအလေးချိန် ၃ ဘတ်ပေးကာ လုပ်သက် ၅ နှစ်အတွင်း အလုပ်တစ်ရက်မှ မပျက်သူများကို ရွေသားအလေးချိန် ၁ ဘတ်ပေးသော်လည်း ၂၀၂၄ ခုနှစ် နှစ်ကုန်ပိုင်းက ရွှေစျေးသည် ၅၅ ရာခိုင်နှုန်းအထိ မြင့်တက်ကာ လက်ရှိပေါက်စျေးတွင် ရွှေ ၃ ဘတ် တန်ကြေးသည် ဘတ် ၁၉၂၀၀၀ ရှိနေပြီဖြစ်သည်။
ထို့ကြောင့် စက်ရုံဘက်မှ ရွှေ ၃ ဘတ် ပေးရမည့် ဝန်ထမ်းကြီးများကို ဘတ် ၄၀၀၀၀ သာပေးမည်ဟု ပြောင်းလဲသတ်မှတ်ခြင်းအပေါ်တွင်လည်း မကျေနပ်မှုများဖြစ်ခဲ့သောကြောင့် ယခုလို စက်ရုံသော့ပိတ်ရကာ နောက်လာမည် ဆွေးနွေးမှုအား ဒီဇင်ဘာ ၈ ရက်တွင် ပြန်လည်စတင်မည်ဟု ဆိုသည်။
ထိုင်းနိုင်ငံ၏ ၁၉၇၅ အလုပ်သမားဆက်ဆံရေး ဥပဒေတွင် အလုပ်သမားများနှင့် အလုပ်ရှင်အကြား ညှိနှိုင်းမှု မပြေလည်ပါက စက်ရုံသော့ပိတ် (lockout) လုပ်ခွင့်ရှိသည်ဟု သတ်မှတ်ထားကာ ထိုသို့ lockout လုပ်ခြင်းသည် အလုပ်သမားများကို ထုတ်ပယ်ခြင်းမမည်သလို နောက်ထပ် ဆွေးနွေးမှုများအကြား သဘောတူညီချက်ရပါက အလုပ်ပြန်ဆင်းရမည်ဖြစ်သည်။ သို့သော် ပိတ်ထားသည့်ကာလများအတွင်း လစာခံစားခွင့်ကိုမူ ရရှိမည်မဟုတ်ဟု ဆိုသည်။
ကိုကလင်း
Ref: Bangkokpost
#MeKongNews
#ထိုင်းနိုင်ငံ
#ရွှေ့ပြောင်းလုပ်သား
#စက်ရုံပိတ်
#အလုပ်သမားသမဂ္ဂ
