မဲခေါင်၊ ဒီဇင်ဘာ ၅
ဒီဇင်ဘာ ၂ ရက်နေ့က အမေရိကန်အထူးကိုယ်စားလှယ်များ မော်စကိုရှိ ကရင်မလင်နန်းတော်သို့ ရောက်ရှိပြီး ရုရှားသမ္မတပူတင်အပါ အကြီးအကဲများနှင့် ဆွေးနွေးပြီးနောက် ရုရှားနိုင်ငံခြားရေးမူဝါဒ အကြံပေး ယူရီယူရှာကော့ဗ်က ငြိမ်းချမ်းရေးဆွေးနွေးမှုသည် နီးစပ်သည့်အဆင့်သို့ပင် မရောက်နိုင်ခဲ့ဟု ထုတ်ပြန်သွားခဲ့သည်။
ပူတင်ဘက်က ထရမ့်ကမ်းလှမ်းသည့် ငြိမ်းချမ်းရေးအဆိုပြုချက်များသည် ယူကရိန်းအတွက်သာ ဥရောပခေါင်းဆောင်များတောင်းဆိုပေးသည့်အချက်များ ပါဝင်နေကာ ရုရှားအတွက် ထည့်သွင်း စဉ်းစားပေးမှုများ နည်းပါးကြောင်း၊ ရုရှားသည် ဥရောပအား ဝင်တိုက်မည်ဟု ထင်မြင်ချက်များသည် ရယ်ဖွယ်ရာကောင်းနေပြီး မိမိတို့ဘက်မှ တိုက်ခိုက်ရန်မရှိသော်လည်း စွက်ဖက်မှုများနှင့် စိုးမိုးလာလျှင် နေတိုး ဥရောပမဟာမိတ်များနှင့် တတိယကမ္ဘာစစ်ကြီး စတင်သွားရန်လည်း အသင့်အနေအထား ရှိသည်ဟု တုံ့ပြန်ပြောဆိုသွားခဲ့သည်။
ပူတင်၏ တတိယကမ္ဘာစစ်ခြိမ်းခြောက်စကားကြောင့် ဥရောပခေါင်းဆောင်ဒါဇင်ချီ ဘရပ်ဆဲလ်မြို့တွင် ယူကရိန်းငြိမ်းချမ်းရေး အကောင်အထည်ဖော်နိုင်ရေး အရေးပေါ် အစည်းအဝေးလုပ်ခဲ့ကြသည်။
နော်ဝေနိုင်ငံခြားရေးဝန်ကြီး အက်စပန်ဘာ့တ်အီဒီက ပူတင်၏ တတိယကမ္ဘာစစ်အတွက် အသင့်ဟုဆိုခဲ့ သည့်စကားကြောင့် ယူကရိန်းအား ပိုမိုထောက်ပံ့ကြရန် အရေးကြီးပြီဖြစ်ကြောင်းနှင့် ဥရောပ၏ ကံကြမ္မာသည် စည်းပေါ်သို့ ရောက်နေပြီဟု ထုတ်ပြန်ပြောကြားခဲ့သည်။
ဖင်လန်နိုင်ငံခြားရေးဝန်ကြီး အီလီနာဗယ်လ်တိုနန်ကလည်း ရုရှားသည် ယူကရိန်းနှင့် ငြိမ်းချမ်းရေးကို ဆွေးနွေးလိုစိတ်မရှိကြောင်း ပြောသွားပြီး နေတိုးအကြီးအကဲ မာ့ခ်ရတ်တီကလည်း တတိယကမ္ဘာစစ်အရေး သိပ်မပြောကြဘဲ ယူကရိန်းကို ပိုမိုထောက်ပံ့ကြရမည်ဟု ထုတ်ပြန်ခဲ့သည်။
လက်ရှိတွင် နော်ဝေ၊ ပိုလန်နှင့်ဂျာမနီတို့သည် ယူကရိန်းအား လက်နက်များဝယ်ယူနိုင်ရေး ပေါင် ၃၇၇ သန်း ထောက်ပံ့ပေးသွားရန် သဘောတူညီခဲ့ပြီး ဖြစ်သည်။
အမေရိကန် အထူးကိုယ်စားလှယ်များ ပူတင်နှင့်ရုရှားကိုယ်စားလှယ်များနှင့် ယူကရိန်းငြိမ်းချမ်းရေး တံခါးပိတ်ကာ ၅ နာရီကြာ ဆွေးနွေးမှုအခြေအနေ အသေးစိတ်ကိုမူ နှစ်ဖက်စလုံးမှ ထုတ်ပြန်ခြင်း မရှိသေးပေ။
ကိုကလင်း
Ref: Thesun
#MeKongNews
#နေတိုး
#ပူတင်
#ဥရောပ
#တတိယကမ္ဘာစစ်
