မဲခေါင်၊ ဒီဇင်ဘာ ၄
နိုဝင်ဘာ ၂၇ ရက် ကျေးဇူးတော်နေ့က အိမ်ဖြူတော်အနီးတွင် အာဖဂန်နစ္စတန်မှ ရောက်လာပြီး ခိုလှုံနေ ထိုင်သူ သေနတ်ဖြင့် ပစ်ခတ်မှုကြောင့် အမေရိကန် အမျိုးစောင့်တပ်ဖွဲ့ဝင် ၂ ဦးထိမှန်ကာ တစ်ဦးသေ၊ တစ်ဦးစိုးရိမ်ရအခြေအနေရောက်ခဲ့သဖြင့် ဒေါ်နယ်ထရမ့်သည့် နိုင်ငံပေါင်း ၁၉ နိုင်ငံမှ လူများကို ခိုလှုံခွင့်ပိတ်ပင်လိုက်သလို နောက်ထပ် ၁၁ နိုင်ငံကိုပါ ထပ်မံ တိုးမြှင့်ပိတ်ပင်သွားမည်ဟု သိရှိရသည်။
ဒီဇင်ဘာ ၂ ရက်က အမေရိကန် နိုင်ငံသားနှင့်လူဝန်မှုကြီးကြပ်ရေးဝန်ဆောင်မှုဌာန (USCIS) ဝက်ဘ်ဆိုက် တွင် ထို ၁၉ နိုင်ငံမှ ခိုလှုံရန် လျှောက်လွှာတင်ထားသူများအားလုံးကို ငြင်းပယ်ခြင်းနှင့်အတူ နောက် လည်း လက်မခံတော့ဟု အသေးစိတ်အချက်အလက်များဖြင့် ဖော်ပြခဲ့သည်။
ယင်းအမိန့်ကြောင့် အမေရိကန်နိုင်ငံ၌ ခိုလှုံခွင့်ရရှိရန် လျှောက်လွှာတင်စောင့်ဆိုင်းနေသူ ၁ ဒသမ ၅ သန်းအတွက် မျှော်လင့်ချက် မဲ့သွားသည်သာမက ဂျိုးဘိုင်ဒန်လက်ထက်က လက်ခံရန် အာမခံချက်ပေးထားပြီးသူပေါင်း ၅၀၀၀၀ ကိုပါ သက်ရောက်စေခဲ့ပြီဖြစ်သည်။
အာဖဂန်သေနတ်သမားကြောင့် တပ်သား ၂ ဦး ထိမှန်ခဲ့အပြီးတွင် ဒေါ်နယ်ထရမ့်သည် ပြည်ထဲရေးဝန် ကြီးဌာန အတွင်းရေးမှူး ကရစ္စတီနိုအမ်နှင့်တွေ့ဆုံခဲ့ပြီး အမေရိကန်အတွင်း ပြည်ပမှ ကျူးကျော်ဝင် ရောက်လာသူများကို တားဆီးသွားရန် အမိန့်ပေးစေခိုင်းခဲ့ခြင်းဖြစ်သည်။
USCIS ပြောရေးဆိုခွင့်ရှိသူ မက်သရူးထရာဂက်ဆာက အမေရိကန်တွင် ခိုလှုံခွင့်ပေးခြင်းမှာ အခွင့်အရေးမဟုတ်ဘဲ မိမိတို့နိုင်ငံ ဘက်မှ အခွင်းထူး ပေးခြင်းသာဖြစ်ကြောင်း၊ ထို့ကြောင့် ခိုလှုံခွင့်ပေးမည့်သူများသည် နိုင်ငံအတွက် အကျိုးပြုစေမည့် အကောင်းတကာ့အကောင်းဆုံးသူများသာ ဖြစ်စေတော့မည်ဟု ရှင်းလင်း ထုတ်ပြန် ခဲ့သည်။
ထရမ့် ဒုတိယသမ္မတသက်တမ်း စတင်တာဝန်ယူပြီးနောက် ယခုနှစ်စပိုင်းကတည်းက နိုင်ငံ ၁၉ နိုင်ငံမှ လူများကို ခရီးသွားလာဝင်ရောက်ခွင့်ပါ ပိတ်ပင်ခဲ့ပြီး ထို ၁၉ နိုင်ငံမှသူများကို ဂရင်းကတ် ထုတ်ပေးခြင်းလည်း ရပ်ဆိုင်းခဲ့ကာ နိုင်ငံပေါင်း ၃၀ အထိပါ တိုးမြှင့်ပိတ်ပင်သွားရန် စီစဉ်နေသည်။
အန္တရာယ်အဆင့်အများဆုံးနိုင်ငံများအဖြစ် ထို ၁၉ နိုင်ငံကို ခရီးသွားလာ ဝင်ရောက်ခွင့်ပိတ်ပင်ခဲ့ရာတွင် မြန်မာအပြင် အာဖဂန် နစ္စတန်၊ ချက်ဒ်၊ ကွန်ဂိုသမ္မတနိုင်ငံ၊ အီကွေတိုရီရယ်ဂီနီ၊ အီရီထရီယာ၊ ဟေတီ၊ အီရန်၊ လစ်ဗျား၊ ဆိုမာလီယာ၊ ဆူဒန်နှင့် ယီမင်နိုင်ငံများလည်း ပါဝင်ခဲ့သည်။
နောက်တွင် ဘူရန်ဒီ၊ ကျူးဘား၊ လာအို၊ ဆီယာလီယွန်၊ တိုဂို၊ တာ့ခ်မင်နစ္စတန်နှင့် ဗင်နီဇွဲလားမှ လူများကိုပါ ဝင်ခွင့် ထပ်ပိတ် ပင်လိုက်ကာ ဂျိုးဘိုင်ဒန်လက်ထက် ခိုလှုံခွင့်ပေးသဖြင့် ရောက်လာသူအားလုံးကိုပါ တစ်ယောက်မကျန် ပြန်လည် စိစစ် အတည်ပြုရန်လည်း လုပ်ဆောင်တော့မည်ဟု ထုတ်ပြန်ထားသည်။
ကိုကလင်း
Ref: Thesun
#MeKongNews
#အမေရိကန်
#အာဖဂန်နစ္စတန်
#အကြမ်းဖက်
#ပြည်ဝင်ခွင့်
#ခိုလှုံခွင့်
