မဲခေါင်၊ နိုဝင်ဘာ ၂၀
နိုဝင်ဘာ ၁၈ ရက်ညပိုင်းတွင် ရုရှားဘက်မှ ယူကရိန်းနိုင်ငံအတွင်းသို့ ဒုံးကျည်များ၊ ဒရုန်းများ အလုံး အရင်းဖြင့် ပစ်ခတ်တိုက်ခိုက်ခဲ့ရာ အိမ်နီးချင်း ပိုလန်နိုင်ငံတွင် လေဆိပ် ၂ ခု ပိတ်ခဲ့ရပြီး နေတိုးတိုက်လေယာဉ်များ အလုပ်ရှုပ်ခဲ့ရသည်။
အမေရိကန်ပေးထားသည့် တာဝေးပစ် ATACMS ဒုံးကျည် ၄ လုံးဖြင့် ယူကရိန်းဘက်မှ ရုရှားနိုင်ငံ တောင်ပိုင်း မြို့တော် ဗိုရိုနက်ဇ်မြို့ကို ပစ်ခတ်ခဲ့သောကြောင့် လက်တုံ့ပြန်ရခြင်းဖြစ်သည်ဟု ရုရှားကာကွယ်ရေးဝန်ကြီးဌာနက သတင်းထုတ်ပြန်ကာ ယူကရိန်းနိုင်ငံ အနောက်ပိုင်း ဒေသများစွာသို့ အကြီးမားဆုံး ဒုံးကျည်နှင့် ဒရုန်း တိုက်ခိုက်မှုတစ်ခုအဖြစ် ပစ်ခတ်တိုက်ခိုက်ခဲ့ခြင်းဖြစ်သည်။
ယင်းတိုက်ခိုက်မှုကြောင့် ခါကိဗ်မြို့မှာပင် အနည်းဆုံး ၃၆ ယောက် ဒဏ်ရာရရှိခဲ့ပြီး လူနေတိုက်ခန်း ၁၀ လုံး၊ စာသင်ကျောင်း တစ်ကျောင်း၊ စူပါမားကက်တစ်ခု၊ အရေးပေါ်ကားဌာန တစ်ခုတို့ ထိမှန်ပျက်ဆီးခဲ့ရ သည်။ ယူကရိန်းအနောက်ပိုင်း အယ်လ်ဗစ်နှင့် တာနိုပီမြို့များသို့လည်း ရုရှား ဒုံးကျည်နှင့်ဒရုန်းများ ကျရောက်ပေါက်ကွဲခဲ့သေးသည်။
ယူကရိန်းနှင့် နယ်ချင်းကပ်လျှက်ရှိသော နေတိုးအဖွဲ့ဝင် ပိုလန်သည် ရုရှား၏ ပစ်ခတ်မှုများကြောင့် ရက်ဇောနှင့်လူဘလင် လေဆိပ် ၂ ခုကို ပိတ်ခဲ့ကာ ယူကရိန်း၏အနောက်ဘက်နယ်စပ်ကို ယာယီပိတ်ပြီး ဂျာမနီမှ Eurofighter Typhoons တိုက်လေယာဉ် ၂ စီး၊ ရိုမေးနီးယားမှ F-16 တိုက်လေယာဉ် ၂ စီးတို့ ရိုမေးနီးယားရှိ ကမ်ပီယာတာဇီလေတပ်အခြေစိုက်စခန်းနှင့်ကိုဂယ်နီစီယာနူ လေတပ်စခန်းတို့မှ ပျံတက်လာပြီး ပိုလန်-ယူကရိန်းနယ်စပ်တွင် ကင်းလှည့်စောင့်ကြည့်ပျံသန်းမှုများ ပြုလုပ်ခဲ့ကြသည်။
ကိုကလင်း
Ref: Thesun
#MeKongNews
#ရုရှား
#ယူကရိန်း
#ပိုလန်
#ဒရုန်း
