မဲခေါင်၊ နိုဝင်ဘာ ၁၇
ယူကရိန်းကျူးကျော်စစ်တွင် ရုရှား၏ အဓိက ဝင်ငွေရင်းမြစ်ဖြစ်သော ရေနံနှင့်စွမ်းအင်လောင်စာများ ကို အဓိက ဝယ်ယူတင်သွင်းနေသည့် နိုင်ငံများအား သွင်းကုန်ခွန် ၅၀၀ ရာခိုင်နှုန်းအထိ တိုးမြှင့် ကောက်ခံသွားရန် အမေရိကန် အထက်လွှတ်တော်တွင် ဥပဒေကြမ်းအဆိုတင်သွင်းရန် စီစဉ်နေမှုအား အမေရိကန် သမ္မတ ဒေါ်နယ်ထရမ့်ကိုယ်တိုင်လည်း ထောက်ခံထားကြောင်း သိရသည်။
ရီပါဘလစ်ကန် အမတ် ဘင်ဆေးဂရေဟမ်ဦးဆောင်ပြီး ရုရှား၏ ယူကရိန်းအပေါ် ပိုမိုရက်စက်စွာ တိုက်ခိုက်နေမှုများ အား ဟန့်တားနိုင်ရေး စစ်ရေးအသုံးစားရိတ်ကို ဖြတ်တောက်နိုင်မည့် အဆိုပါ အဆိုတင်သွင်းမှုကို ယခု အမြန်ဆုံး တင်သွင်းကာ မဲပေးအတည်ပြုရန် စီစဉ်နေပြီဖြစ်သည်။
ရုရှားနှင့် မဟာမိတ်အဖြစ် စီးပွားရေးဆက်လုပ်နေသည့် နိုင်ငံများထဲ အိန္ဒိယနှင့်တရုတ်သည် ရုရှားထံမှ စွမ်းအင်အများဆုံး တင်သွင်းနေသည့်နိုင်ငံများဖြစ်ရာ တင်းမာမှုများသည် အမြင့်ဆုံးပြန်ဖြစ်လာနိုင်သော်လည်း ဖလော်ရီဒါ မှ အိမ်ဖြူတော်သို့ ပြန်မည့်ခရီးစဉ်မတိုင်ခင် ဒေါ်နယ်ထရမ့်က သူကိုယ်တိုင်လည်း မိမိပါတီ ရီပါဘလစ် ကန်မှ တင်သွင်းမည့် အဆိုပါ ဥပဒေမူကြမ်းကို လက်ခံသည်ဟု ပြောသွားခဲ့ခြင်းဖြစ်သည်။
Bloomberg ၏ ဖော်ပြမှုအရ ရုရှားမှ ရေနံနှင့်သဘာ၀ဓာတ်ငွေများ အဓိက တင်သွင်းသည့် အိန္ဒိယနှင့် တရုတ်နိုင်ငံတို့အပြင် အီရန်ကိုပါ အဓိက ပစ်မှတ်ထားပြီး သွင်းကုန်ခွန် ၅၀၀ ရာခိုင်နှုန်း တိုးမြှင့်ရန် ရှိ နေသည်ဟု ထရမ့်က ပြောဆိုခဲ့သည်ဟု ဆိုသည်။
ယင်းဥပဒေမူကြမ်းကို အတည်ပြုနိုင်ရန် အမေရိကန်အထက်လွှတ်တော်သည် အမြန်ဆုံး စီစဉ်နေပြီး ယူကရိန်း၏ မီးရထားကွန်ရက် ဗဟိုချက် ဖြစ်သော ပေါ့ဗ်ရော့ဗ်စ်မြို့အား စစ်အင်အား ၂၀၀၀၀၀ အထိ တိုးမြှင့်သိမ်းပိုက်ရန် ရုရှား တိုက်ခိုက်နေမှု မအောင်မြင်ခင် ဥပဒေထုတ်ပြန်နိုင်ရေး ကြိုးစားနေခြင်းဖြစ်သည်။
ထရမ့်သည် ၂၀၂၅ ဩဂုတ်လတွင် ရုရှားထံမှ စွမ်းအင်ဝယ်ယူမှုများစွာလုပ်နေသော အိန္ဒိယအား သွင်းကုန်အခွန် ၂၅ ရာခိုင်နှုန်း တိုးမြှင့်ပြီး စုစုပေါင်း ၅၀ ရာခိုင်နှုန်း ကောက်ခံသည်ဟု သမ္မတ အမိန့် ဖြင့် ထုတ်ပြန်ခဲ့ရာ အိန္ဒိယဘက်မှ ဝယ်ယူတင်သွင်းမှု လျော့ချလာသည့်အတွက် ကျေနပ်လောက်ဖွယ်ရာ အခြေအနေရောက်လျှင် သွင်းကုန်ခွန်မြှင့်တင်ထားမှု ပြန်လျှော့ချပေးမည်ဟု ဆိုခဲ့သည်။
ကိုကလင်း
Ref: indiatoday
#MeKongNews
#ရုရှား
#ရေနံ
#သဘာဝဓာတ်ငွေ့
#အမေရိကန်
