မဲခေါင်၊ နိုဝင်ဘာ ၁၂
၂၀၂၄ ခုနှစ် ဧပြီလက မလေးရှားသား ကျားဖြန့်ငွေလိမ်သူ ဆန်ဟော့ခ်လင်း အမှုအား ခြေရာခံရာမှ UK တွင် ဖမ်းဆီးရမိခဲ့သည့် ၄၇ နှစ်အရွယ် တရုတ်နိုင်ငံသူ ကျားဖြန့်ငွေလိမ်ရာဇာ ဇီမင်ကျန်းအမှုကို လန်ဒန်ဆောက်ဝက်ခ်တရားရုံးမှ စတင်ကြားနာပြီး အမှုတွဲပါသူများကို ပြစ်ဒဏ် များချမှတ်နေရာ ဦးဆောင်သူ ဇီမင်ကျန်းသည် ထောင်ဒဏ် ၁၄ နှစ်အထိကျခံရနိုင်ကြောင်း ဗြိတိန် သတင်းများက ဖော်ပြနေသည်။
ယာဒီဇန်းဟု နာမည်ပြောင်းထားပြီး ၂၀၁၈ ခုနှစ်တွင် တရုတ်နိုင်ငံမှ ထွက်ပြေးကာ UK သို့ အထောက် အထားအတုများသုံးပြီး တိမ်းရှောင်ရောက်ရှိလာခဲ့သော ဇီမင်ကျန်းသည် ၂၀၁၄ မှ ၂၀၁၇ ခုနှစ်အကြား တရုတ်နိုင်ငံတွင်းမှ လူပေါင်း ၁၂၈၀၀၀ ဆီမှ ငွေပေါင်း ဒေါ်လာ ၆ ဘီလီယံဖိုးအထိ နည်းမျိုးစုံဖြင့် ကျားဖြန့်လုပ် လိမ်လည်ခဲ့ပြီး ရရှိသော ငွေများကို ဒစ်ဂျစ်တယ်ငွေကြေး Bitcoin အဖြစ်သို့ ပြောင်းလဲ ခဲ့ကာ တဖြည်းဖြည်းချင်း ငွေကြေးခဝါချရန် ကြိုးစားနေရာမှ ဖမ်းဆီးရမိခြင်းဖြစ်သည်။
“ ကြွယ်၀မှုတို့၏ ဘုရင်မ” ဟု မိမိကိုယ်မိမိတင်စားကာ UK ၌ သူဌေးမကြီးတစ်ယောက်အဖြစ် ပေါင် ၂၃ သန်းတန် နေအိမ်ကြီးတွင် နေထိုင်နေစဉ် ရဲတပ်ဖွဲ့က ဖမ်းဆီးကာ ခရစ္စတိုငွေကြေး ဒေါ်လာ ၆ ဘီလီယံဖိုး သိမ်းဆည်းလိုက်သဖြင့် UK တွင်သာမက ကမ္ဘာတွင်ပါ အကြီးမားဆုံး ကျားဖြန့်လိမ်ငွေ သိမ်းဆည်းရမိမှုဖြစ်ခဲ့သည်။
ဆန်ဟော့ခ်လင်းသည် လန်ဒန်ဆောက်ဝက်ခ်တရားရုံးတွင်ပင် ရှေ့ရက်ပိုင်းက ငွေကြေးခဝါချမှုကို ဇီမင်ကျန်းနှင့် ပူပေါင်းကြံစည်ကြောင်းဝန်ခံကာ မနှစ်က ထိုအမှုတွင် ဒေါ်လာ ၂ ဘီလီယံတန်ကြေး ရှိသော Bitcoin များအား ပူးပေါင်းငွေကြေးခဝါချခဲ့သူ ဂျန်ဝမ်ဆိုသူလည်း ထောင်ဒဏ် ၆ နှစ် နှင့် ၈ လ ချမှတ်ခံရပြီးဖြစ်သည်။
နိုဝင်ဘာ ၁၁ ရက်တွင် နောက်ဆုံး စီရင်ချက်ချမှတ်မည်ဖြစ်ရာ ဒေါ်လာ ၆ ဘီလီယံတန်ကြေးရှိသည့် Bitcoin ၆၁၀၀၀ ကျော် လိမ်ခဲ့သည့် ဇီမင်ကျန်းသည် ထောင်ဒဏ် ၁၄ နှစ် အထိ ချမှတ်ခံရနိုင်မည်ဟု သတင်းများ ထွက်ပေါ်နေခြင်းဖြစ်သည်။
၂၀၁၈ ခုနှစ်က Bitcoin ငွေကြေး တစ်ယူနစ်တန်ကြေးသည် ဒေါ်လာ ၃၆၀၀ တန်ကာ ယနေ့ခေတ်တွင် တစ်ယူနစ် ဒေါ်လာ ၁၀၀၀၀၀ အထိ တန်ကြေးရှိနေပြီဖြစ်သည်။
ကိုကလင်း
Ref: hurriyetdailynews
#MeKongNews
#ခရစ္စပတိုငွေကြေး
#ငွေကြေးခဝါချမှု
#တရုတ်နိုင်ငံသား
#ကျားဖြန့်
