မဲခေါင်၊ နိုဝင်ဘာ ၁၁
ထိုင်းဝန်ကြီးချုပ် အနုတင်က ကျားဖြန့်ရန်စွယ်သည် တစ်နိုင်ငံလုံးအတိုင်းအတာဖြင့် ပျံ့နှံ့နေပြီး အရွယ် မရွေးဘဲ အားလုံးကို ဒုက္ခပေးနေရာ အဖွဲ့အစည်းပေါင်း ၁၅ ခု ပူးပေါင်းထူထောာင်လိုက်သော United Thailand Against Scammer လှုပ်ရှားမှု စတင်လိုက်ပြီဟု နိုဝင်ဘာ ၁၀ ရက်နေ့က ကြေညာသလို ပြည်သူများအားလုံး “ မယုံနှင့် မလောနှင့် ငွေမလွှဲနှင့်” ဆိုသော မူကို လက်ကိုင်ထားကြရမည်ဖြစ်ကြောင်း တိုက်တွန်းပြောဆိုသွားခဲ့သည်။
ထိုင်းအစိုးရပြောရေးဆိုခွင့်ရှိသူ ဆီရီပေါင်အန်ကာဆကူလ်ကီယတ်က မကြာသေးမီကပင် နိုင်ငံတကာ ဒစ်ဂျစ်တယ်ငွေကြေးအဖွဲ့ကြီး Binance နှင့်ပူးပေါင်းက နိုင်ငံခြားသား ဟက်ကာများ ငွေကြေး လိမ်လည်ထားမှုမှ ဘတ် ၁၄ သန်းကျော်ရှိ ခရစ်ပတို ငွေကြေးများ သိမ်းဆည်းရမိခဲ့သည်ဟု ပြောဆိုသည်။
ထို့အပြင် ဆိုက်ဘာရဇဝတ်ဂိုဏ်းကွန်ရက်နှင့် ချိတ်ဆက်နေသော ကမ္ဘောဒီးယား လွှတ်တော် အမတ်ဟောင်း တရုတ်နွယ်ဖွားသူဌေး လီယောင်ဖတ်နှင့် ပတ်သက်သည့် ပိုင်ဆိုင်မှုများကို နိုင်ငံတစ်ဝန်း နေရာပေါင်း ၃၆ နေရာအား ဝင်ရောက်စီးနင်းရှာဖွေပြီးနောက် ဘတ် သန်း ၄၀၀ ကျော်တန်ဖိုးရှိသည် များကို သိမ်းဆည်းနိုင်ခဲ့သည်ဟု ထုတ်ပြန်ခဲ့သည်။
ထို ကျားဖြန့်တိုက်ဖျက်ရေး စစ်ဆင်ရေး အစပြုအခမ်းအနားတွင် ဝန်ကြီးချုပ် အနုတင်က ကျားဖြန့် ကွန်ရက်များ၌ ရဲအရာရှိကြီးများ၊ နိုင်ငံရေးလောကမှ အကြီးအကဲများပါ ပါဝင်နေသည်ကို စုံစမ်း ဖော်ထုတ် အရေးယူသွားမည်ဖြစ်သောကြောင့် သတင်းရရှိသူများ အထေက်အထားပေးပို့ကြရန်နှင့် အန္တရာယ်မရှိစေရေး အကာအကွယ်ပေးသွားမည်ဖြစ်ကြောင်း၊ သံသယရှိသူ နိုင်ငံခြားသားများကို ဗီဇာပိတ်ခြင်း၊ ၎င်းတို့ နိုင်ငံများအား ပြန်ပို့ခြင်း၊ ဘဏ်အကောင့်တုများစွာကို ပိတ်ပင်ခြင်းများ ပြုလုပ် မည်ဖြစ်သလို တစ်နိုင်ငံလုံးအပေါ် ခြိမ်းခြောက်နေသည့် ကျားဖြန့်တိုက်ဖျက်မှုသည် အမျိုးသားရေး ပထမဦးစားပေး ဦးတည်ချက်ဖြစ်ကြောင်းနှင့် ပြည်သူများ အလိမ်မခံရရေ “ မယုံနှင့် မလောနှင့် ငွေမလွှဲနှင့်” ဆိုသော မူကို လက်ကိုင်ထားကြရမည်ဖြစ်ကြောင်း တိုက်တွန်းပြောကြားသွားခဲ့သည်။
ကိုကလင်း
Ref: Thai Enquirer
#MeKongNews
#ထိုင်းနိုင်ငံ
#ကျားဖြန့်
#စစ်ဆင်ရေး
#ကမ္ဘောဒီးယား
