မဲခေါင်၊ နိုဝင်ဘာ ၁၀
ဇွန် ၂၇ ရက်က ဂျပန်နိုင်ငံတိုကျိုသို့ အသက် ၃၀ ဝန်းကျင်ရှိ မိခင်အရင်ဖြစ်သူနှင့် ၁၅ ရက် သက်တမ်း အလည်ဗီဇာဖြင့် ရောက်ရှိခဲ့ပြီးနောက် မာဆက်တွင် ပြည့်တန်ဆာအလုပ်လုပ်နေခဲ့ရသည့် ၁၂ နှစ်အရွယ် ထိုင်းမိန်းကလေးငယ်၏ မိခင်ကို ထိုင်ဝမ်တွင် ဖမ်းဆီးရမိခဲ့ပြီဟု သိရသည်။
နိုဝင်ဘာ ၄ ရက်နေ့က တိုကျိုတွင် မာဆက်ဖွင့်ထားသည့် ၅၁ နှစ်သားဆိုင်ပိုင်ရှင် မာဆာယုကီဟိုဆိုနိုကို ၁၅ နှစ်ပင်မပြည့် သေးဟု ယူဆရသော မိန်းကလေးငယ်အား ပြည့်တန်ဆာလုပ်ခိုင်းနေမှုဖြင့် တိုကျို မြို့ပြရဲတပ်ဖွဲ့နှင့် လူဝင်မှုကြီးကြပ်ရေးအဖွဲ့က သွားရောက်ဖမ်းဆီးခဲ့ပြီးနောက် စစ်ဆေးခဲ့ရာတွင် ထိုမိန်းကလေးသည် ဂျပန်စကားတစ်လုံးမျှ မတတ်ဘဲ မိခင်ဖြစ်သူကိုယ်တိုင်က ထိုမာဆက်၌ တစ်ညသာ အတူအိပ်ပြီးနောက် ထားသွားခဲ့သူဖြစ်ကာ အကူအညီပေးရန် ရဲစခန်းသို့ လာပြောရာမှ စုံစမ်းဖော်ထုတ်နိုင်ခဲ့ခြင်းဖြစ်သည်ဟု ထုတ်ပြန်ခဲ့သည်။
တိုကျိုမြို့၊ ယူရှီးမားခရိုင်၊ ဘန်ကရိုဝပ်တွင် ဖွင့်ထားသည့် ယင်းမာဆက်တွင် ၁၂ နှစ်အရွယ် ထိုင်းမိန်းကလေးသည် ၃၃ ရက်အတွင်း ဖောက်သည်အမျိုးသား ၃၃ ယောက်အတွက် လိင်ဝန်ဆောင်မှုပေးခဲ့ရကာ ဆိုင်ရှင်သည် ယန်း ၆၂၇၀၀၀ (ဒေါ်လာ ၄၁၀၀) ရသော်လည်း မိန်းကလေးငယ်အား မီးဖိုချောင်ခန်းတွင်သာ အိပ်စေသလို မသေနိုင်ရုံ ဝယ်စားနိုင်မည့် ငွေအနည်းငယ်သာ ပေးခဲ့ကြောင်း၊ မိခင်သည် ဇူလိုင် ၁၀ ရက်မှ ၁၂ ရက်အတွင်းမှသာ သမီးဆီသို့ တစ်ခေါက်ပြန်လာပြီးနောက် ထိုင်းသို့ ခဏပြန်ပြီး ပြန်လာမည်ဟုဆိုပြီး နောက်မနက်တွင် ထွက်သွားခဲ့ကြောင်း၊ ဖခင်ဖြစ်သူသည် မူလတန်းကျောင်းသူဘ၀ကတည်းက သေဆုံးခဲ့ကာ မိခင်သည် ပြည့်တန်ဆာလုပ်ငန်းလုပ်ကိုင်သူဖြစ်ပြီး အထက်တန်းကျောင်းတက်နေကာ ညီမငယ်နှင့်အတူ အဖိုး၊ အဖွားများဖြင့် နေထိုင်နေသည်ကို လိမ်ခေါ်ပြီး တိုကျိုတွင် ထားပစ်ခဲ့ခြင်းဖြစ်သည်ဟု သိရှိရသည်။
ယင်းသတင်းသည် ဂျပန်နှင့် ထိုင်းတွင်သာမက တကမ္ဘာလုံး သိရှိကာ ဒေါသထွက်ကြရပြီးနောက် လူမှောင်ခိုမှုကွင်းဆက်ကို ဂျပန်အစိုးရက စုံစမ်းဖော်ထုတ်မည်ဟု ဆိုသလို ထိုင်းအစိုးရကလည်း ကလေးငယ်အားပြန်ခေါ်ကာ အပြစ်ရှိသူများကို ပြင်းထန်စွာ အပြစ်ပေးမည်ဟု ထုတ်ပြန်ခဲ့သည်။
လက်ရှိတွင် ဂျပန်အစိုးရက ကလေးငယ်၏ စိတ်ပိုင်းဆိုင်ရာ ပြန်လည်အားဖြည့်တင်းနိုင်ရေး အချိန်ယူ ပြုလုပ်ကူညီကာ အမှုကွင်းဆက်ကို စုံစမ်းဖော်ထုတ်ရန် ကြိုးစားနေသည်။
နိုဝင်ဘာ ၉ ရက်နေ့တွင် ထိုင်ဝမ်အာဏာပိုင်များက အခြားသော အမှုကိစ္စတစ်ခုဖြင့် ထိုင်းအမျိုးသမီးတစ်ဦးအား ဖမ်းဆီးခဲ့ရာ ထိုအမျိုးသမီးသည် သမီးရင်းကို တိုကျိုမာဆက်တွင် ပြည့်တန်ဆာလုပ်ခိုင်းခဲ့သည့် တရားခံဖြစ်ကြောင်း၊ စက်တင်ဘာလတွင် ထိုင်ဝမ်သို့ ရောက်ရှိလာပြီး သတ်မှတ်နေထိုင်ခွင့် ရက်ကျော်နေထိုင်ရာမှ ဖမ်းမိခြင်းဖြစ်သည်ဟု အတည်ပြုထုတ်ပြန်သွားခဲ့သည်။
ကိုကလင်း
Ref: japantimes
#MeKongNews
#ဂျပန်
#ပြည့်တန်ဆာလုပ်ငန်း
#ထိုင်းလူမျိုး
#ထိုင်ဝမ်
