မဲခေါင်၊ နိုဝင်ဘာ ၄
ဗြိတိန်အပါအဝင် ကမ်းရိုးတန်နိုင်ငံများအား ရေဒီယိုသတ္တိကြွ ဆူနာမီလှိုင်းများဖြစ်ပေါ်စေပြီး ဖျက်ဆီး နိုင်သည်ဆိုသော ပိုဆိုက်ဒွန် နျူကလီးယားတော်ပီဒိုအား အာတိတ်သမုဒ္ဒရာကာရာပင်လယ်ပြင်တွင် စမ်းသပ်ပစ်ခတ်ပြီးနောက် ရက်ပိုင်းအကြာမှာပင် ပူတင်သည် ပိုဆိုက်ဒွန်တော်ပီဒိုတင်ဆောင် ပစ်လွှတ်နိုင်ရန် ဒီဇိုင်းရေးဆွဲ ထုတ်လုပ်ထားသည့် ခါဘာရော့ဗ်စ် ရေငုပ်သင်္ဘောအသစ်ကြီးကို စတင်မိတ်ဆက် ပြသလိုက်သည်။
၅ နှစ်စီမံကိန်းဖြင့် တည်ဆောက်နေခဲ့သော နျူကလီးယားရေငုပ်သင်္ဘောသစ်ကြီးဖြစ်ကာ သတင်းများ အရ ပေါင် ၁ ဘီလီယံကျော် အကုန်ခံတည်ဆောက်ထားသည်ဟု သိရသည်။
ထို တန် ၁၀၀၀၀ အလေးချိန်ရှိ ရေငုပ်သင်္ဘောကြီးကို ရုရှားနိုင်ငံမြောက်ပိုင်း ဆီဗာရော့စ်ဗင့်ခ်စ်မြို့ရှိ ဆက်ဗ်မက်ရှ် သင်္ဘောကျင်းတွင် ကျင်းပခဲ့ရာ နျူကလီးယားထိပ်ဖူးတပ် ပိုဆိုက်ဒွန်တိုပီဒို တစ်ဒါဇင် တင်ဆောင် မောင်းနှင်ပစ်ခတ်နိုင်စွမ်းရှိသည့် ခေတ်အမီဆုံး ရေငုပ်သင်္ဘောဖြစ်ကြောင်း ရုရှားကာကွယ်ရေးဝန်ကြီး အန်ဒရေးဘီလူဆော့ဗ်က နေတိုးနှင့်အနောက်မဟာမိတ်များ ထိတ်လန့်သွားစေရန် ရည်ရွယ်ပြောကြား ခဲ့သည်။
ကနဦး ယင်းခါဘာရော့ဗ်စ် ရေငုပ်သင်္ဘောတည်ဆောက်မှုကို ၂၀၁၄ တွင် စတင်ကာ ၂၀၂၀ ပြည့်နှစ် တွင် ရေချနိုင်ရေး ရည်ရွယ်ခဲ့သော်လည်း ယခု ၅ နှစ်နောက်ကျပြီးမှ စတင်ရေချကာ စမ်းသပ်မောင်းနှင့် အပြီး နျူကလီးယားရန် ကာကွယ်ရေးရေယာဉ်စု အတွင်း တာဝန်ထမ်းဆောင်စေမည်ဟုလည်း ဆိုသည်။
ရုရှားသမ္မတ ပူတင်က ပိုဆိုက်ဒွန် တိုပီဒိုသည် မည်သည့်အရာနှင့်မျှ တားဆီးဖျက်ဆီးနိုင်စွမ်း မရှိသော လက်နက်ဖြစ်သည်ဟု ကြုံးဝါးခဲ့သလို သမ္မတဟောင်း မက်ဗီဒက်ဗ်ကလည်း ထိုလက်နက်သည် ကမ္ဘာ့နောက်ဆုံးနေ့ လက်နက်ဟုမကြာခဏ ခြိမ်းခြောက်ပြောဆိုနေခဲ့သည်။
ကိုကလင်း
Ref: Thesun
#MeKongNews
#ပိုဆိုက်ဒွန်
#တိုပီဒို
#ရေငုပ်သင်္ဘော
#ရုရှား
#နျူကလီးယား
