မဲခေါင်၊ နိုဝင်ဘာ ၂
ထိုင်း ငွေကြေးခဝါချမှုတိုက်ဖျက်ရေးရုံး (AMLO) က အောက်တိုဘာ ၃၁ ရက်နေ့၌ ကမ္ဘောဒီးယားနိုင်ငံခေါင်းဆောင် ဟွမ်ဆန်နှင့်သားဖြစ်သူ ဝန်ကြီးချုပ် ဟွမ်မာနက်တို့၏ ကိုယ်ရေးအကြံပေး ကျားဖြန့်စီးပွားရေးလုပ်ငန်းရှင် လီယောင်ဖတ်၏ ထိုင်းနိုင်ငံအတွင်း ပိုင်ဆိုင်မှုတန်ကြေး ဘတ် သန်း ၃၅၀ ကို သိမ်းဆည်းလိုက်ကြောင်း အတည်ပြု ထုတ်ပြန်သွားခဲ့သည်။
တရုတ်-ကမ္ဘောဒီးယားနွယ်ဖွား လီယောင်ဖတ်သည် စုံစမ်းစစ်ဆေးမှုများအရ ကမ္ဘောဒီးယား ကျားဖြန့်ကွန်ရက်နှင့် ပတ်သက်သည့်ငွေကြေးဆိုင်ရာ စီးဆင်းမှုများကို အခိုင်အမာတွေ့ရှိရပြီး ထိုင်းဘဏ်အကောင့်များတွင် ထိုငွေများစွာရှိနေသည်ကိုလည်း တွေ့ရှိရသဖြင့် ပိုင်ဆိုင်သည့် ကွန်ဒိုတိုက်ခန်းများ၊ မြေယာများ၊ ဘဏ်အပ်ငွေနှင့် ဘဏ်တိုးများအပါ စုစုပေါင်း ပိုင်ဆိုင်မှု ၁၁ မျိုး၊ တန်ကြေးအားဖြင့် ဘတ်သန်း ၃၅၀ ဖိုး သိမ်းဆည်းလိုက်သည်ဟု ထိုင်း AMLO က ထုတ်ပြန်သွားခဲ့ခြင်းဖြစ်သည်။
လီယောင်ဖတ်သည် ကမ္ဘောဒီးယားတွင် အထက်လွှတ်တော်အမတ်ဖြစ်သလို ဟွမ်ဆန်နှင့် ဟွမ်မာနက် တို့၏ ကိုယ်ရေးအတိုင်ပင်ခံအဖြစ် အဆက်ဆက်တာဝန်ယူခဲ့သလို ၎င်းနှင့်မိသားစုဝင်များ ထူထောင်ထားသည့် စီးပွားရေးလုပ်ငန်းစု LYP Group မှာ ကျားဖြန့်နှင့် ထဲထဲဝင်ဝင်ချိတ်ဆက်နေကာ ကလေးလုပ်သား၊ လူမှောင်ခိုလုပ်ငန်းများပါ လုပ်ကိုင်ကြောင်း အထောက်အထားများ တွေ့ရှိရသည်ဟု ၂၀၂၄ စက်တင်ဘာ ၁၂ ရက်တွင် အမေရိကန် နိုင်ငံခြားရေးဝန်ကြီးဌာနမှ ထုတ်ပြန်ခဲ့သည်။
လီယောင်ဖတ်သည် ထိုင်းနိုင်ငံသားအဖြစ်လည်း ဖတ်ဆူဖာဖာ အမည်ဖြင့် ခံယူထားမှုကို ထိုင်းဘက်က နိုင်ငံသားဖြစ်ခွင့်မှ ပြန်လည်ပယ်ဖျက်ပြီးနောက် ၂၀၁၇ ခုနှစ်ကတည်းက ထိုင်းအာဏာပိုင်များသည် ၎င်းပိုင်ဆိုင်မှုများကို စုံစမ်းဖော်ထုတ်ကာ သိမ်းယူနေခဲ့သည်မှာ ယခု အကြိမ်ဆိုလျှင် စတုတ္ထအကြိမ်မြောက်ဖြစ်သည်ဟုလည်း ဆိုသည်။
ထိုင်း AMLO က သိမ်းဆည်းသည့် ပိုင်ဆိုင်မှုများကို လိမ်ခံရသူပေါင်း ၅၅၉ ဦးအား ပြန်လည်ပေးသွားရန် စီစဉ်နေသည်ဟုလည်း ဆိုထားသည်။
ကိုကလင်း
Ref: The Nation
#MeKongNews
#လီယောင်ဖတ်
#ထိုင်းနိုင်ငံ
#ကျားဖြန့်
#ဟွမ်ဆန်
#ကမ္ဘောဒီးယား
