မဲခေါင်၊ အောက်တိုဘာ ၁၈
ပြီးခဲ့သည့် ၂ ပတ်အတွင်းမှာပင် ဥရောပ နိုင်ငံများအတွင်း ဒရုန်းများစွာ ဝင်ရောက်ခြိမ်းခြောက်လာခဲ့ရာ တတိယကမ္ဘာစစ်ကို ဖန်တီးနေသော ရုရှားရန်မှ ကာကွယ်ရေးအတွက် နေတိုးနှင့်ဥရောပခေါင်းဆောင်များ စစ်ပွဲဖြစ်တည်လာမည့် ကာလ ၂၀၃၀ မတိုင်မီ မဟာတံတိုင်းခံစစ် ၄ ထပ် တည်ဆောက်မည့် အစီအစဉ်ကို ခင်းကျင်းထုတ်ဖော်လာခဲ့သည်။
ယင်းခံစစ်တံတိုင်း ၄ ခုမှာ အာကာသဒိုင်း၊ လေကြောင်းကာကွယ်ရေးဒိုင်း၊ ဒရုန်းတံတိုင်းနှင့် ရုရှားနှင့်နယ်နိမိတ်ဆက်စပ်နေသော အရှေ့ဘက်စစ်မျက်နှာပြင်တစ်လျှောက် စစ်ရေးတောင်ပံ စောင့်ကြည့်တပ်နှင့်အကာအကွယ်များထားရှိရန် ဖြစ်သည်ဟု ဥရောပ ကော်မရှင် ဥက္ကဌ ဗွန်ဒါလင်း က ထုတ်ပြန်ပြောဆိုသွားခဲ့သည်။
ထိုစီမံကိန်းတံတိုင်း ၄ ခုမှာ ဥရောပတိုက်ကို လေကြောင်းရန်မှ ကာကွယ်ရေးဒိုင်းတပ်ဆင်ရန်၊ ထိုတံတိုင်းမှ ဒုံးကျည်အပါ လေကြောင်းခြိမ်းခြောက်မှုများကို ကာကွယ်ရန်ဖြစ်ကြောင်း၊ နောက်ထပ် အာကာသဒိုင်း(Space Shield)စီမံကိန်းသည် ဥရောပနိုင်ငံများ၏ အာကာသတွင်း ပိုင်ဆိုင်မှုနှင့်ဝန်ဆောင်မှုများကို ကာကွယ်ပေးမည့် အစီအစဉ်ဖြစ်ကာ နေတိုး အရှေ့ပိုင်း ရုရှားဆက်စပ် နိုင်ငံများဖြစ်သော ဘောလ်တစ်နိုင်ငံများအပါအဝင် ပိုလန်၊ ရိုမေးနီးယား၊ ဘူလ်ဂေးရီးယားနှင့် ယူကရိန်းတစ်လျှောက် ဒရုန်းတံတိုင်းကာရန်ခြင်း၊ နောက်ဆုံး Eastern Flank Watch ဆိုသည့် အရှေ့ ဘက်စစ်မျက်နှာပြင်စောင့်ကြည့်ကာကွယ်ရေး အစီအမံအဖြစ် ဝေဟင်နှင့်မြေပြင် ကာကွယ်ရေး အစီအမံနှင့်စောင့်ကြည့်တပ်များအား ၂၀၂၈ အမီ ထားရှိစောင့်ကြည့်သွားရန် ဖြစ်သည်ဟု ဥရောပ ကော်မရှင်က ထုတ်ပြန်ခဲ့သည်။
ယင်းမဟာခံစစ်တံတိုင်းပြီးစီးပါက ရုရှား၏ တိုက်ခိုက်လာမှုများသည် ဥရောပအတွင်းသို့ လွယ်လင့်တကူ မရောက်လာနိုင်တော့ဘဲ နာရီချီကြာပြီးမှ မစစ်ထုတ်နိုင်သည့် တိုက်ခိုက်လာမှုများကို ဖိုက်တာဂျက်လေယာဉ်များ၊ ခေတ်မီ ဒုံးခွင်းစနစ်များအား အကုန်အကျခံသုံးစွဲကာ ဆက်လက် ဖျက်ချ နိုင်မည်ဟု ဆိုသည်။ ထိုစီမံကိန်းအတွက် မည်မျှ ကုန်ကျခံကာ မည်မျှ ထိရောက်စွာ တားဆီးနိုင်မည် ဆိုခြင်းကိုမူ ဥရောပ ကော်မရှင်က လတ်တလော ထုတ်ပြန်ခြင်းမပြုသေးပေ။
ကိုကလင်း
Ref:Thesun
#MeKongNews
#ဥရောပ
#နေတိုး
#တတိယကမ္ဘာစစ်
#ရုရှား
