မဲခေါင်၊ အောက်တိုဘာ ၁၇
ကမ္ဘာတစ်ဝန်း Gen Z များ တော်လှန်ပုန်ကန်မှုများ ဆက်တိုက်ဖြစ်ပွားနေချိန် တောင်အမေရိကတိုက်ရှိ ပီရူးနိုင်ငံတွင်လည်း လူငယ်များ၏ အစိုးရဆန့်ကျင့်ဖြုတ်ချရေးလှုပ်ရှားမှု အုံကြွလာကာ အောက်တိုဘာ ၁၆ ရက်က လွှတ်တော်ထဲပါ ဝင်ရောက်ရန် ကြိုးစားရာမှ ရဲတပ်ဖွဲ့နှင့် ဆန္ဒပြသူများအကြား အဓိကရုဏ်းအသွင် ဆိုးရွားစွာဖြစ်ပေါ်ခဲ့ပြီး အနည်းဆုံး လူငယ်တစ်ဦး သေဆုံးခဲ့ရသည်။
ပြီးခဲ့သည့် ရက်ပိုင်းအတွင်းကမှ ယာယီနိုင်ငံခေါင်းဆောင်အဖြစ် ကျမ်းသစ္စာကျိန်ဆိုခဲ့သော သမ္မတ ဟိုဆေးဂျီရီ အစိုးရကို ဖြုတ်ချရန် Gen Z နှင့်အရွယ်ရောက်ပြီး လူငယ်များ အဓိက လှုပ်ရှားမှုအဖြစ် ဆန္ဒပြမှုများသည် လွှတ်တော်အတွင်း မိုလိုတော့ဗ်များ၊ ခဲများဖြင့် ပစ်ခတ်မှု၊ လုံခြုံရေးရဲတပ်ဖွဲ့များ နှင့် အုံလိုက်ကျင်းလိုက် တိုက်ခိုက်မှုများဖြစ်ပွားလာရာ ၃၂ နှစ်အရွယ် အက်ဂွါဒိုရုဇ်ဆန့်ဇ် သေဆုံးခဲ့ရပြီး လူပေါင်း အနည်းဆုံး ၁၀၂ ယောက် ဒဏ်ရာရခဲ့သည်။
ဒဏ်ရာရသူများထဲတွင် အရပ်သား ၂၄ ယောက်၊ ရဲတပ်ဖွဲ့ဝင် ၇၈ ယောက်အထိ ပါဝင်ခဲ့ကာ ရုပ်သံမှတ်တမ်းများအရ ရဲတပ်ဖွဲ့ဝင်များစွာ သွေးချင်းချင်းနီ ဒဏ်ရာရနေသည့် မြင်ကွင်းများ တွေ့ခဲ့ရသည်။
ပီရူး အမျိုးသားလူ့အခွင့်အရေး ညှိနှိုင်းရေးမှူးအဆိုအရ သေဆုံးသူကို သေနတ်ဖြင့် ပစ်ခတ်သူသည် အရပ်ဝတ်ဖြင့် ရဲအရာရှိဖြစ်ကြောင်း သိရှိရသည်။
ပီရူးတွင် နိုင်ငံမြို့တော်နှင့် မြို့ကြီးများ၌ လုံခြုံရေးအာမခံချက်အဖြစ် ဒုစရိုက်ဂိုဏ်းများက ဆတ်ကြေး ကောက်ခံနေမှုများ၊ ပြန်ပေးဆွဲ ငွေညှစ်မှုများ၊ ကြေးစား လူသတ်မှုများနှင့် လမ်းပေါ် ဓားထိုးသတ်ဖြတ် မှုများ ထူပြောလွန်းလာခဲ့သည်ကို အစိုးရက မည်သို့မျှ မတားဆီး၊ မချေမှုန်းနိုင်ခဲ့သည့်အတွက် နောက်ဆုံးသော သမ္မတ ဒီနာဘိုလာတီကို အမတ်များက အကျင့်ပျက်ခြစားမှု စွပ်စွဲချက်ဖြင့် ရုံးတင်ကာ ရာထူးမှ ဖြုတ်ချခဲ့သည်။
ထို့နောက် ယာယီသမ္မတအဖြစ်တင်မြှောက်လိုက်သော ဂျီရီသည်လည်း လိင်ပိုင်းဆိုင်ရာစော်ကားခဲ့မှုဟောင်းကြောင့် အမျိုးသမီးဝါဒီများက Gen Z များ၊ လူငယ်များ၊ ဘတ်စ်ကားနှင့်အလုပ်သမားသမဂ္ဂတို့ဖြင့် ပူးပေါင်းပြီး ဆန္ဒပြမှုများမှ မြို့များအနှံ့ ထောင်သောင်းချီ သော လူထုအုံကြွမှုများ ရက်သတ္တပတ်အနည်းငယ်အတွင်း ဖြစ်လာခဲ့ခြင်းဖြစ်သည်။
ဆန္ဒပြပွဲတစ်ခုတွင် ပါဝင်သည့် ပီရူးဂျာနယ်လစ်တစ်ဦးက ပြည်သူများ၏ အသက် အိုးအိမ်စည်းစိမ်းကို ဆတ်ကြေးရမှ ကာကွယ်မည်ဟု ခြောက်လှန်နေသော Los Pulpos နှင့် ဗင်နီဇွဲလားမှ မူးယစ်ရာဇဝတ်ဂိုဏ်း Tren de Aragua တို့အပါအဝင် ဂိုဏ်းများစွာသည် လက်တင် အမေရိကနိုင်ငံများတစ်ဝန်း ယခုလို မင်းမဲ့စရိုက်ပြုကျင့်နေသည်ကို ပီရူးအစိုးရ အဆက်ဆက်က အကာအကွယ်မပေးနိုင်ခဲ့ဘဲ ယခု ယာယီသမ္မတ ဂျာရီက စစ်ခင်းတိုက်ဖျက်ပေးမည်ဟု ကတိပြုခြင်း အပေါ်လည်း မယုံတော့သဖြင့် အစိုးရတစ်ရပ်လုံး ဖြုတ်ချရေး Gen Z လှုပ်ရှားမှုကြီးသည် နီပေါ Gen Z များကို နမူနာယူကာ ကျယ်ပြန့်လာခြင်းဖြစ်သည်ဟု ပြောသွားခဲ့သည်။
ကိုကလင်း
Ref: Thesun
#MeKongNews
#လူထုအုံကြွမှု
#လူငယ်မျိုးဆက်
#ပီရူး
#တောင်အမေရိက
