မဲခေါင်၊ အောက်တိုဘာ ၁၀
လွန်ခဲ့သည့် ၁၀ နှစ်ကျော်က ဝင်ဘယ်ဒန် ဂရင်းဆလင်းတင်းနစ်ပြိုင်ပွဲကြီးတွင် ဒိတ်ဒိတ်ကျဲ ကမ္ဘာ့ အဆင့် (၁) ဆွစ်ဇာလန်တင်းနစ်သမား ရော်ဂျာဖက်ဒါရာကိုပင် နိုင်ခဲ့သော ယူကရိန်း တင်းနစ်ကြယ်ပွင့်အဖြစ်မှ ယူကရိန်းစစ်သားအဖြစ် ခံယူခဲ့သည့် ဆာဂျီစတက်ခိုစကီးက အယ်လ်ဖာကွန်မန်ဒိုအဖြစ် ရုရှား၏ ဒေါ်လာ ၇ ဘီလီယံတန် စစ်ရေးယန္တရားကြီးကို ဖျက်ဆီးမှုတွင် ကူညီနိုင်ခဲ့သည်ဟု ဖွင့်ဟ ပြောဆိုလာသည်။
ယူကရိန်း အထူးတပ်ဖွဲ့ SBU Alpha သည် Operation Spiderweb စစ်ဆင်ရေးအဖြစ် ရုရှားနိုင်ငံ အတွင်းပိုင်းထဲအထိ စနစ်တကျဖြင့် အထိရောက်ဆုံး တိုက်ခိုက်ဖျက်ဆီးမှုများကို လုပ်ဆောင်ခဲ့ရာ စျေးပေါသော ဒရုန်း ၁၁၇ စင်းဖြင့် ရုရှားနိုင်ငံတွင်းမှ အလွန်တန်ကြေးကြီးသော မဟာဗျူဟာ နျူကလီးယားဗုံးကြဲလေယာဉ်များ၊ ယင်းလေယာဉ်များထားရာ လေတပ်အခြေစိုက်စခန်း ၄ ခု၊ စက်ရုံများ၊ ရေနံသန့်စင်သိုလှောင်ရုံများအပါ အဓိကကျသည့် အဆောက်အအုံများစွာကို ၁၈ လ ကြာ ကြိုတင်စီမံပြီး တိုက်ခိုက်ဖျက်ဆီးနိုင်ခဲ့သည်။
ယင်းတိုက်ခိုက်မှုကြောင့် ရုရှားဘက်မှ ဆုံးရှုံးပျက်စီးမှုသည် ဒေါ်လာ ၇ ဘီလီယံ (ပေါင် ၅ ဒသမ ၂ ဘီလီယံ) ရှိခဲ့ကာ ပူတင်၏ ဗုံးကြဲလေယာဉ်အုပ်စု ၄၁ စီးရှိသည့်အနက် ၃ ပုံ ၁ ပုံကို ဖောက်ခွဲ ဖျက်ဆီးနိုင်ခဲ့သည်ဟု ၂၀၂၂ ခုနှစ်တွင် ရုရှားကျူးကျော်စစ်ကြောင့် တင်းနစ်သမားအဖြစ်မှ ယူကရိန်းစစ်တပ်ထဲဝင်ခဲ့သူ ဆာဂျီစတက်ခိုစကီးက United24 မီဒီယာသို့ ပြောသွားခဲ့သည်။
ဆာဂျီစတက်ခိုစကီးက စစ်မှုစထမ်းစဉ် အမြောက်တပ်သားအဖြစ် တာဝန်ယူခဲ့ရာမှ ဒရုန်းအသေးစား များကို မောင်းနှင်တိုက်ခိုက်သည့် တပ်သို့ ပြောင်းခဲ့ပြီး မတ်လက ယူကရိန်းမှ ကီလိုမီတာ ၇၅၀ အကွာအဝေးတွင်သာရှိသော ရုရှားလေတပ်အခြေစိုက်စခန်းကို ဒုံးကျည်ဖြင့် ပစ်ခတ်ဖျက်ဆီးနိုင်ခဲ့မှုတွင် ထဲထဲဝင်ဝင်ပါဝင်စွမ်းဆောင်နိုင်ခဲ့ကြောင်း၊ အုပ်စုငယ်လေးများမှ ကြီးမားသည့် တိုက်ခိုက်ဖျက်ဆီးမှု ကို လုပ်ဆောင်နိုင်ရာတွင် ရုရှားထောက်ခံ ဝါဒဖြန့်သမားများ ရင်ထုမနာဖြစ်ရလေ မိမိတို့တိုက်ခိုက်မှု အတွက် ဂုဏ်ယူပြုံးပျော်ရလေဖြစ်သည်ဟု ပြောကြားခဲ့သည်။
ဆာဂျီစတက်ခိုစကီးသည် ဝင်ဘယ်ဒန်တင်းနစ်ပြိုင်ပွဲအပါအဝင် LTA မှ ကြီးမှူးကျင်းပသည့် တင်းနစ် ပွဲများ၌ ရုရှားနှင့် မဟာမိတ်ဘီလာရုစ်မှ ကစားသမားများကို ပါဝင်ခွင့်ပိတ်ပင်ခဲ့ခြင်းအတွက် မကျေမနပ်ဝေဖန်ခဲ့ကြသော ကမ္ဘာ့ထိပ်တန်း အားကစားလောကသားများကိုလည်း ပြင်းပြင်းထန်ထန် ဝေဖန်ခဲ့ဖူးသည်။
၂၀၂၂ ကမ္ဘာ့ဖလားပွဲ ခြေစစ်ပွဲအောင်စေရန် ကြိုးစားနေသည့် ရုရှားဘောလုံးအသင်းအား ထိုစဉ်က စပါးနည်းပြ အီတလီသား ကွန်တီက မဆိုင်သော လုပ်ရပ်ဟု ဝေဖန်ခဲ့သလို စပိန်တင်းနစ်အကျော်အမော် နာဒယ်ကလည်း အားကစားသမားများသည် စစ်နှင့်မဆိုင်၊ မမျှတသော ပိတ်ပင်မှုဟု ဝေဖန်ခဲ့ကြသည်။
ထိုဝေဖန်မှုများကို ဆာဂျီစတက်ခိုစကီးက ထိရောက်စွာဖြင့် ပြန်လည် ဝေဖန်ရာတွင် အိမ်မပြန်နိုင်သော ယူကရိန်းတင်းနစ်သမားများအဖြစ်က နာဒယ်တို့နှင့်ယှဉ်လျှင် မျှတမှုရှိမည်လား၊ မည်သည့် ရုရှားနှင့် ဘီလာရုစ် အားကစားသမားကမှ ရုရှားက ယူကရိန်းကို ကျူးကျော်မှုအား ကန့်ကွက် ရှုတ်ချမှုများ မပြုလုပ်ခဲ့ကြကြောင်း၊ ယူကရိန်းကလေးငယ်များ ဗုံးဒဏ်၊ ဒုံးကျည်ဒဏ်များကြောင့် မည်သူမျှ တင်းနစ်မကစားနိုင်ချိန်၊ ယူကရိန်းသားများ သေဆုံးနေချိန် ရုရှားအားကစားသမား များ အေးချမ်းစွာ ပြိုင်ပွဲဝင်နေခြင်းက တရားမျှတမှု ဖြစ်နိုင်မည်လားဟု တုံ့ပြန်ဝေဖန်ခဲ့သူဖြစ်သည်။
ကိုကလင်း
Ref: Thesun
#MeKongNews
#ရုရှား
#ယူကရိန်း
#တင်းနစ်ကစားသမား
#ဆာဂျီစတက်ခိုစကီး
