မဲခေါင်၊ အောက်တိုဘာ ၈
အောက်တိုဘာ ၅ ရက်ညက အိမ်နီးချင်း ဘီလာရုစ်နိုင်ငံဘက်မှ မိုးလေဝသလေ့လာမှုတွင် အသုံးပြုသည့် ဟီလီယံ ဓာတ်ငွေ့ဖြည့် မိုးပျံပူပေါင်းများ လစ်သူရေးနီးယားနိုင်ငံအတွင်း ဝင်ရောက်လာကာ ဗီလ်နီးယက်စ်လေဆိပ်ပေါ်မှပင် ဖြတ်ပျံသဖြင့် လေဆိပ်ကို ပိတ်ခဲ့ရကြောင်း သိရသည်။
ယခုရက်ပိုင်းများအတွင်း ရုရှားလက်ချက်ဟု သံသယရှိသော ဒရုန်းများ နေတိုးနှင့်ဥရောပသမ္မဂ အဖွဲ့ဝင်နိုင်ငံလေပိုင်နက်များအတွင်းသို့ ဆက်တိုက်ကျူးကျော်ဝင်ရောက်သဖြင့် အထိတ်တလန် ဖြစ်နေကြချိန် ပူတင်၏ အရင်းနှီးဆုံးမဟာမိတ် စစ်အာဏာရှင် လူကပ်ရှန်ကိုအုပ်ချုပ်သည့် ဘီလာရုစ် နိုင်ငံအတွင်းမှ ယခုလို မိုးပျံပူပေါင်း အနည်းဆုံး ၂၅ လုံးကျော် ဝင်ရောက်လာကာ ၂ လုံးသည် ဗီလ်နီးယက်စ်လေဆိပ်ပေါ် တည့်တည့်မှ ဖြတ်ပျံသဖြင့် လေကြောင်းခရီးစဉ် ၃၀ အထိ ဖျက်သိမ်းရပြီး ခရီးသည်ပေါင်း ၆၀၀၀ ကျော် လေဆိပ်တွင် သောင်တင်ခဲ့ရသည်။
ကျလာသည့် မိုးပျံပူပေါင်းများသည် ထူးဆန်းစွာဖြင့် မှောင်ခို စီးကရက်တုများစွာကို သယ်ဆောင်လာကြောင်း တွေ့ရှိရသော်လည်း လူကပ်ရှန်ကိုသည် ၂၀၂၂ ခုနှစ်ဖေဖော်ဝါရီလကတည်းက ရုရှား၏ ယူကရိန်းအပေါ် ကျူးကျော်မှုကို မိမိနိုင်ငံအား အသုံးပြုခွင့်ပေးကာ ရုရှားစစ်သားများအား ဘီလာရုစ် အားဖြတ်ပြီး ယူကရိန်းစစ်မျက်နှာပြင်သို့ ပို့ဆောင်ပေးခြင်း၊ ရုရှား၏ မဟာဗျူဟာ နျူကလီးယား လက်နက်များကို နိုင်ငံအတွင်း အခြေစိုက် တပ်ဆင်ပေးခြင်းများ ခွင့်ပြုပေးခဲ့သူဖြစ်ခြင်းကြောင့် ယခု ကိစ္စသည်လည်း ရုရှားနှင့် ဆက်စပ်နေနိုင်ကြောင်း သုံးသပ်နေကြသည်။
ပိုလန်၊ ရိုမေးနီးယား၊ အက်စတိုးနီးယား၊ ပြင်သစ်နှင့် ဂျာမနီနိုင်ငံများပေါ် ပြီးခဲ့သည့် ရက်ပိုင်းများအတွင်း ထူးဆန်းသော ဒရုန်းများစွာ ကျူးကျော်ပျံသန်းနေခြင်းကို ရုရှားဘက်ကမူ ၎င်းတို့ နှင့်သက်ဆိုင်ခြင်းမရှိဟု ငြင်းဆိုထားသည်။
ကိုကလင်း
Ref:Thesun
#MeKongNews
#ဘီလာရုစ်
#လစ်သူယေးနီးယား
#မိုးပျံပူပေါင်း
#ရုရှား
