မဲခေါင်၊ စက်တင်ဘာ ၂၁
စက်တင်ဘာ ၂၀ ရက်တွင် ယူကေရှိ လန်ဒန်ဟိသရိုးလေဆိပ်၊ ဘရပ်ဆဲလ်၊ ဘာလင်အပါအဝင် ဥရောပ ထိပ်တန်းလေဆိပ်ကြီးများ တစ်ပြိုင်တည်း ဆိုက်ဘာတိုက်ခိုက်မှုခံရသဖြင့် ခရီးစဉ်ပေါင်းများစွာ အနှောင့်အယှက်ဖြစ်ကာ ကြန့်ကြာခဲ့ရမှုတွင် တရားခံသည် ပူတင်သာဖြစ်မည်ဟု ကျွမ်းကျင်သူများက တစ်ညီတစ်ညွတ်တည်း ကောက်ချက်ချခဲ့ကြသည်။
ယင်းဆိုက်ဘာတိုက်ခိုက်မှုကြောင့် လေကြောင်းအချက်ပြစနစ်များ၊ check-in နှင့် လေယာဉ်ခရီးစဉ် ပရိုဂရမ်ရေးဆွဲမှုများအား ထိခိုက်ခဲ့ပြီး ခရီးသွားများစွာ လေဆိပ်များတွင် သောင်တင်ခဲ့ရသည်။
ဘရပ်ဆဲလ်လေဆိပ်တွင် automated systems များ မှန်ကန်စွာအလုပ်မလုပ်နိုင်တော့သဖြင့် manual check-in နှင့် boarding procedures များဖြင့်သာ လေကြောင်းခရီးစဉ်များကို ပြန်လည် စီမံရသဖြင့် ခရီးစဉ်များစွာ နှောင့်နှေးကြန့်ကြာခဲ့ရသလို ခရီးစဉ် ဖျက်သိမ်းရမှုများလည်း များစွာရှိခဲ့သည်။
အနောက်တိုင်းရှိ လုံခြုံရေးဆိုင်ရာ ကျွမ်းကျင်သူများက ယခုဖြစ်စဉ်သည် အက်စတိုးနီးယား လေပိုင်နက်အတွင်း ရုရှား MiG-31 ဖိုက်တာဂျက်လေယာဉ်များ နေတိုးပိုင်းလော့များ၏ အချက်ပြသတိပေး သည့်ကြားမှ ဂရုမစိုက်ဘဲ ဝင်လာခဲ့ပြီး ၂၄ နာရီမကြာမီ ဖြစ်ပွားခြင်းဖြစ်သောကြောင့် နေတိုးနိုင်ငံများ အား ရုရှားအစိုးရ စပွန်ဆာပေးပြီး ဆိုက်ဘာတိုက်ခိုက်မှုလုပ်ခြင်းသာဖြစ်မည်ဟု တထစ်ချ ယုံကြည် နေကြသည်။
လုံခြုံရေးနှင့်နိုင်ငံရေးဆိုင်ရာ ကျွမ်းကျင်သူ အန်တိုနီဂလီးစ်က ပူတင်သည် အနောက်နိုင်ငံများ၏ အခြေခံအဆောက်အအုံများကို ဆန္ဒရှိသည့်အတိုင်း တိုက်ခိုက်ဖျက်ဆီးနိုင်ကြောင်း သက်သေပြလိုခြင်း ကြောင့် ရုရှားလုပ်ရပ်ဖြစ်သည်ဆိုခြင်းမှာ သံသယရှိစရာမလိုဟု ကောက်ချက်ချ ပြောဆိုသွားခဲ့သည်။
လုံခြုံရေးစပါယ်ရှယ်လစ် ဝီလ်ဂက်ဒက်စ်ကလည်း အနောက်နိုင်ငံများသို့ အဆိုးရွားဆုံး တိုက်ခိုက်မှု တစ်ခုအဖြစ် ဆိုက်ဘာတိုက်ခိုက်မှုလုပ်ရာတွင် နောက်ကွယ်၌ ရုရှားရှိနေမည်မှာ သေချာကြောင်း၊ ယခု အနောက်တိုင်း လေဆိပ်ကြီးများတွင် အများဆုံးအသုံးပြုနေသည့် Collins Aerospace ထုတ် ဆော့ဖ်ဝဲလ်များသည် နေတိုးစစ်အခြေစိုက်လေတပ်စခန်းများတွင်လည်း အသုံးပြုနေသည်ဖြစ်သောကြောင့် ရုရှားဘက်မှ လွယ်ကူစွာ ဆိုက်ဘာတိုက်ခိုက်မှုလုပ်နိုင်သည်မှာ စိုးရိမ်စရာလည်းဖြစ်သည်ဟု ကောက်ချက်ချ ပြောဆိုသွားခဲ့သည်။
ကိုကလင်း
Ref:Thesun
#ဥရောပ
#ဆိုက်ဘာတိုက်ခိုက်မှု
#ရုရှား
#လေကြောင်းခရီးစဉ်
