မဲခေါင်၊ စက်တင်ဘာ ၂၀
ထိုင်းနိုင်ငံရေးသမိုင်းတွင် အရှိန်အဝါဩဇာကြီးမားခဲ့သော သက်ဆင်ရှင်နာဝပ်တရာထူထောင်သည့် ဖွေထိုင်းပါတီသည် ပါတီအာဏာမှတစ်ဆင့် နိုင်ငံတော်အာဏာကို သက်ဆင်မိသားစုပိုင် အာဏာအဖြစ် ဆက်လက်တည်ထောင်ရေး သားမက်ဖြစ်သူ နတ်တာပေါင်ကူနာကွန်ဝမ်ကို နောက်လာမည့် ရွေးကောက်ပွဲ၌ ဝန်ကြီးချုပ်အဖြစ် အဆိုပြုတင်မြှောက်ရန် စီစဉ်နေကြောင်း သတင်းများထွက်ပေါ်နေ သည်။
သက်ဆင်၊ ယင်းလတ်မှသည် ပေထောင်တန်အထိ သက်ဆင်မိသားစုဝင်များ ထိုင်းနိုင်ငံ ဝန်ကြီးချုပ် ရာထူးများလက်ခံရယူပြီး အာဏာသိမ်းမှုမှ ရှေ့၂ ဦး ထွက်ပြေးခဲ့ရသလို သမီးငယ်ပေထောာင်တန် သည်လည်း ကမ္ဘောဒီးယားအရေးကြောင့် ဝန်ကြီးချုပ်ရာထူးမှ ဖယ်ရှားခံခဲ့ရကာ ယခု ဘမ်ဂျိုင်ထိုင်း ပါတီခေါင်းဆောင် အနုတင်သည် ဝန်ကြီးချုပ်သစ်ဖြစ်လာပြီး စက်တင်ဘာ ၁၉ ရက်၌ ဘုရင်ထံ အစိုးရ အဖွဲ့သစ်ကို တင်ပြကာ ထောက်ခံလက်မှတ်ရယူခဲ့ပြီးဖြစ်သည်။
အစိုးရသစ်သည် ၄ လမှ ၆ လအတွင်း ရွေးကောက်ပွဲပြန်လည်ကျင်းပပေးရမည်ဖြစ်ရာ ဖွေထိုင်းပါတီ သည် ယခုကတည်းက မဲဆွယ်စည်းရုံးမှုများကို ပိုမို အရှိန်မြှင့်လုပ်ဆောင်တော့မည်ဟုဆိုကာ ၎င်းတို့ ပါတီမှ နောက်လာမည့် ဝန်ကြီးချုပ်လောင်းအနေဖြင့် သက်ဆင်၏ သမီးကြီး ပင်ထောင်တာ၏ ခင်ပွန်း နတ်တာပေါင်ကူနာကွန်ဝမ်ကို တင်မြှောက်ဖွယ်ရှိသည်ဟု လက်ရှိ ပါတီ၏ အရေးအပါဆုံးပုဂ္ဂိုလ်ဖြစ်သော ဒုဝန်ကြီးချုပ်နှင့် ပြည်ထဲရေးဝန်ကြီး ဖမ်သမ်ဝီချာရာချိုင်က ရိပ်ဖမ်းသံဖမ်း ပြောသွားခဲ့သည်။
“နတ်သာပေါင်က စမတ်ကျတယ်၊ ရုပ်ရည်လည်း ချောမောပြေပြစ်တယ်၊ ဘာလို့မဖြစ်နိုင်ရမှာလဲ” ဟု ဖမ်သမ်က ပြောသွားခဲ့ခြင်းဖြစ်သည်။
ပြီးခဲ့သည့်ရက်ပိုင်းက သက်ဆင် ထောင်တွင်း ၁ နှစ်ကျခံနေရစဉ် ပါတီအမတ်များဆီသို့ သက်ဆင်၏ ဇနီးဟောင်း လွန်ယင်းပေါ့ဂျမန်ဒမာပွန် ထူးခြားစွာ လာရောက်ခဲ့ပြီး အမတ်များအား ပါတီအတွက် အားမလျှော့စတမ်း ဆက်လက်တိုက်ပွဲဝင်ကြရန်၊ ရှင်တာဝပ်တရာ မိသားစု လဲပြိုသွားခြင်းမရှိဟု အားပေးစကားများ ပြောကြားခဲ့သေးသည်။
ကိုကလင်း
Ref: TheNation
#MeKongNews
#သက်ဆင်
#ထိုင်းနိုင်ငံရေး
#နတ်သာပေါင်
#ထိုင်းဝန်ကြီးချုပ်
