ထိုင်းနိုင်ငံ ဘန်ဘွန်းခရိုင် ပြည်သူ့ကာကွယ်ရေးအရန်တပ်ဖွဲ့ဝင်များနှင့် ရဲတပ်ဖွဲ့ဝင်များသည် အသေခံ ဗုံးခွဲဝတ်စုံနှင့် အမျိုးသားတစ်ဦးကို တွေ့ရသည်ဟု တိုင်တန်းလာမှုကြောင့် ပျာပျာသလဲဖြစ်ခဲ့ရပြီး လိုက်လံစုံစမ်းဖော်ထုတ်ပြီးမှ ရယ်စရာဖြစ်ခဲ့ရကြောင်း သိရသည်။
ယင်းဖြစ်စဉ်ကို ဖေ့စ်ဘုတ် Page อปพร.เขตบางบอน က မျှဝေထားခြင်းဖြစ်ပြီး အသေခံအကြမ်းဖက်လာ နိုင်သည့်အနေအထားကြောင့် ပြည်သူ့စစ်အရန်တပ်ဖွဲ့များနှင့် ရဲတပ်ဖွဲ့များ ပျာပျာသလဲ စုံစမ်းစစ်ဆေးရာ ဘန်ဘွန်းခရိုင်နေ အသက် ၆၀ အရွယ် ထိုင်းအမျိုးသားကြီးဝတ်ဆင်ထားသည်မှာ အသေခံဗုံးခွဲ ဝတ်စုံမဟုတ်ဘဲ အိတ်များစွာထဲ သဲများထည့်ထားခြင်းသာဖြစ်ကြောင်း တွေ့ရှိခဲ့ရသည်။
အနီးအနားနေထိုင်သူများက ယင်းအမျိုးသားကြီးသည် နေ့စဉ်မနက်တိုင်း ထိုဝတ်စုံဖြင့် အိတ်များအတွင်း သဲ ၂၀ ကီလိုဂရမ်အလေးချိန်ထည့်ကာ လေ့ကျင့်ခန်းများကို ဝိတ်ထည့် လုပ်ဆောင် လေ့ရှိခြင်းအပေါ် သိရှိကြသော်လည်း မသိသူများက အသေခံဗုံးခွဲဝတ်စုံဝတ်လူတစ်ဦးတွေ့သည်ဟု သတင်းပေးတိုင်ကြားရာမှ ယခုလို အမှုအခင်းဖြစ်ရသည်ဟု ရှင်းလင်းပြောဆိုကြသည်။
ဘန်ဘွန်းရဲတပ်ဖွဲ့ကမူ ရယ်ဖွယ်ရာ ဖြစ်စဉ်ဆိုသော်လည်း တာဝန်ရှိစွာဖြင့် အများပြည်သူ အန္တရာယ် ဖြစ်စေနိုင်မည့် သံသယရှိမှုအား သတိပေးတိုင်ကြားခြင်းအတွက် နိုင်ငံသားကောင်းလုပ်ရပ်ဟု ချီးကျူး ကြောင်း ထုတ်ပြန်ခဲ့သည်ဟု ဆိုသည်။
ကိုကလင်း
Ref: Bangkokpost
#MeKongNews
#ထိုင်းနိုင်ငံ
#အသေခံဗုံးခွဲ
#အသေခံဗုံးခွဲဝတ်စုံ
#လုံခြုံရေးတပ်ဖွဲ့ဝင်
#အကြမ်းဖက်မှု
