မဲခေါင်၊ စက်တင်ဘာ ၁၁
ထောင်ဒဏ် တစ်နှစ်ကျခံရန် အမိန့်ချမှတ်ခံရသော ထိုင်းဝန်ကြီးချုပ်ဟောင်း သက်ဆင်သည် ကိုဗစ် ကွာရန်တိုင်း ၅ ရက်ဝင်မှုကို ကလောင်ပရမ်ဗဟိုအကျဉ်းထောင်တွင် ဒုတိယညအဖြစ် ဖြတ်သန်းရာ ဖိအားကင်းစွာဖြင့် ကောင်းမွန်စွာစားသောက်၊ နှစ်ခြိုက်စွာ အိပ်စက်နိုင်ခဲ့သည်ဟု ထိုင်းမီဒီယာများ သတင်းရရှိခဲ့ကြောင်း သိရသည်။
အသက် ၇၆ နှစ်ရှိပြီဖြစ်မှ ထောင်တွင်းပထမဆုံးအကျဉ်းချခံရသည့် ထိုင်းဝန်ကြီးချုပ်ဟောင်းဘ၀ ရောက်ခဲ့ရသော်လည်း သက်ဆင်သည် မည်သည့် ဂနာမငြိမ်မှုမှမဖြစ်ဘဲ စိတ်ဓာတ်ကျခြင်းလည်းမရှိ၊ ပုံမှန်အတိုင်း အိပ်စက်နေနိုင်ခဲ့သည်ဟု ထောင်တွင်း သတင်းရင်းမြစ်အရ သိရခြင်းဖြစ်သည်။
ပထမ ထောင်ကျခံ ၂ ရက်တွင် ဧည့်တွေ့ခွင့်မပြုသလို ပြင်ပ အသုံးအဆောင်များလည်း လက်မခံရဆိုသော ထောင်စည်းကမ်းအတွင်း သက်ဆင်သည် ထောင်းတွင်းကျွေးသည့်အစားအစာများကို အကုန်စားသောက်နိုင်ကာ ညွှန်ကြားချက်များအတိုင်း အားလုံး ပူးပေါင်းလိုက်နာနေထိုင်နိုင်ခဲ့သည်ဟု ဆိုသည်။
ထိုင်းတရားရုံးချုပ်မှ သက်ဆင်ကိုထောင်ဒဏ် တစ်နှစ်ကျခံရန် အမိန်ချမှတ်သော်လည်း လွတ်ငြိမ်းချမ်း သာ ပြစ်ဒဏ်လျှော့ပေါ့ပေးမှုစည်းမျဉ်းအရ ထောင်သားများသည် စံနှုန်းများအတိုင်း နေထိုင်မှုတွင် အလွန်ကောင်း၊ သာမန်ကောင်းနှင့် အလွန့်အလွန်ကောင်းဆိုသည့် စံနှုန်း ၃ ရပ်နှင့်တိုင်တားပြီး မတူညီသော ထောင်ဒဏ်လျှော့ပေါ့ပေးခြင်းခံရမည်ဖြစ်သည်။
အလွန့်အလွန်နေထိုင်ကျင့်ကြံပုံ ကောင်းသူဆိုလျှင် ထောင်ဒဏ်လက်ကျန်ကာလ၏ ၃ ပုံ ၁ ပုံ (၄ လ) ထက်ပိုကျခံရမည်မဟုတ်ဘဲ အလွန်ကောင်း ဆိုသည့်စံနှုန်းရလျှင် လက်ကျန်ထောင်သက်၏ ၄ ပုံ ၁ ပုံ (၃ လ) ထက်မပို့သော ပြစ်ဒဏ်၊ ကောင်းသည်ဆိုလျှင် လက်ကျန်ထောင်သက်၏ ၅ ပုံ ၁ ပုံ ( ၂ လနှင့် ၁၅ရက်) ထက်မပိုသော ပြစ်ဒဏ်သာ ကျခံရမည်ဟု ပြဌာန်းထားသည်။
သို့သော် သက်ဆင်သည် စတင်ထောင်ဒဏ်ခံရချိန်တွင် အလယ်အလတ်အဆင့် ကျင့်ကြံနေနိုင်မှု စာရင်းမှသာ စတင်ရမည်ဖြစ်သောကြောင့် အထက်ဖော်ပြပါ ထောင်ဒဏ်လျှော့ပေါ့မှုစာရင်းအတွင်း ဝင်ပြီး အမြန်ဆုံးလွတ်နိုင်မည်ဆိုလျှင်ပင် ထောင်ဒဏ် အနည်းဆုံး ၆ လကျခံပြီးမှ လွတ်မြောက်နိုင် မည်ဖြစ်သည်။
အထူးလွှတ်ငြိမ်းခွင့်အစီအစဉ်ထဲ၌ အသက် ၇၀ ကျော်ပြီး အလွန်ဖျားနာပါက လျှော့ရက်အမြင့်ဆုံးရနိုင်မှုသည်လည်း ထောင်ဒဏ် ၆ လကျခံရခြင်းမှာ အနည်းဆုံး အဆင့်ဖြစ် ကြောင်း သိရသည်။
လက်ရှိတွင် ဝန်ကြီးချုပ်ဟောင်း ထောင်ဒဏ်ကျခံရမှုကြောင့် ထိုင်းအကျဉ်းဦးစီးဌာနသည် ထောင်တွင်း ထောင်သားများအား အထူးသင်တန်းပေးထားသော ကျွမ်းကျင်ဆေးဘက်ဆိုင်ရာ ထူးချွန်သူများထားရှိ ပေးခြင်း၊ လုံခြုံရေးအရ မကျေနပ်သူများ၏ အန္တရာယ်မှ လွတ်မြောက်နိုင်ရန် တင်းကြပ်စွာစောင့်ထား စေခြင်းများအပြင် ဥပမာအားဖြင့် အထူးအခွင့်အရေးအဖြစ် ထောင်တွင်းပြစ်ဒဏ်ကျခံနေရသော ထိုင်းနာမည်ကြီးအဆိုတော် ဆက်ဆန်ဆွန်ပီမိုင် သို့မဟုတ် ဆက်လိုဆိုတို့အား ဂီတသင်ယူတတ်မြောက်ရေး အစီအစဉ်အရ သက်ဆင်အား ဂီတဖြင့်ဖျော်ဖြေခြင်း၊ သင်တန်းပေးခြင်းများဖြင့် စိတ်ပျော်စေရန် ထားရှိနိုင်ကြောင်းလည်း သုံးသပ်နေကြသည်။
ကိုကလင်း
Ref: Khaosod
#MeKongNews
#ထိုင်းဝန်ကြီးချုပ်
#သက်ဆင်
#ထိုင်းနိုင်ငံရေး
#ကျန်းမာရေး
