မဲခေါင်၊ ဩဂုတ် ၃၀
အမေရိကန်သမ္မတဒေါ်နယ်ထရမ့်ဦးဆောင်ကာ ယူကရိန်းစစ်ပွဲ ငြိမ်းချမ်းရေးရရန် ကြိုးပမ်းခဲ့သော် လည်း ရုရှားသမ္မတပူတင်သည် ငြိမ်းချမ်းရေးကိုမလိုလားသည်မှာ ထင်ရှားခဲ့ပြီဖြစ်ကာ ယူကရိန်း အနေဖြင့် စစ်ရှုံး လက်နက်ချအညံ့ခံသည့်သဘောဖြင့် တောင်းဆိုမှုများကို လိုက်လျှောမှသာ ငြိမ်းချမ်း ရေးဆွေးနွေးမည်ဟု သိရသည်။
ဒုတိယသက်တမ်းဖြင့် သမ္မတမဖြစ်မီ မိမိသာသမ္မတဖြစ်ပါက ရုရှား၏ ယူကရိန်းကျူးကျော်စစ်ကို တစ်ရက်အတွင်း ရပ်တန့်ပေးနိုင်သည်ဟု ဒေါ်နယ်ထရမ့် ပြောဆိုခဲ့သလို ပြီးခဲ့သည့်ရက်ပိုင်းက အလက်စကားသို့ ပူတင်အား ဖိတ်ခေါ်ကာ ယူကရိန်းနှင့် ထာ၀ရငြိမ်းချမ်းရေး စာချုပ်နိုင်ရေး ကြားဝင်ပွဲစားလုပ်ကာ ၂ ပတ်အတွင်း ပူတင်နှင့် ယူကရိန်းသမ္မတ ဇီလန်းစကီးတို့ မျက်နှာချင်းဆိုင် တွေ့ဆုံဆွေးနွေးကြမည်ဟုလည်း ပြောကြားခဲ့သည်။
သို့သော် ထရမ့်ကို ခေါင်းထဲပင်မထားသည့်သဘောဖြင့် ပူတင်ဘက်က ငြိမ်းချမ်းရေးလိုချင်လျှင် ယူကရိန်းဘက်မှ အလုံးစုံ လက်နက်ဖျက်သိမ်းပေးခြင်း၊ အနောက်မဟာမိတ်အားလုံးနှင့် စစ်ရေး ဆက်ဆံမှုအားလုံး ဖြတ်တောက်ခြင်း၊ နာဇီဝါဒ ဖျက်သိမ်းခြင်း၊ ကြားနေနိုင်ငံအဖြစ်သာ နေထိုင်ပေး ခြင်း၊ .မဟာမိတ်မထား၊ နျူကလီးယားမရှိသည့် နိုင်ငံအဖြစ် နေထိုင်ပေးမှသာ ဆွေးနွေးမည်ဟု ရုရှား သတင်းထုတ်ပြန်ရေး အကြီးအကဲ မာရီယာဇာခါရိုဗာက ထုတ်ပြန်ပြောဆိုသွားခဲ့သည်။
ထိုအခြေအနေမှာ ယူကရိန်းဘက်မှ မည်သို့မျှ လက်မခံနိုင်သည့်တောင်းဆိုမှုများဖြစ်ကာ အော်သိုဒေါ့ ခရစ်ယာန်ဘာသာဝင်များကို စော်ကားညှင်းပန်းခြင်းများလည်း မပြုလုပ်ရ၊ ရုရှားစကားပြောသော ပြည်သူတိုင်း ရုရှားဘာသာစကားကိုအသုံးပြုမှု ကာကွယ်ပိုင်ခွင့်ပေးရန်တို့ကိုပါ ထည့်သွင်းတောင်းဆို သွားခဲ့သည်။
ဇီလန်းစကီးသည် အနောက်မဟာမိတ်များ အကူအညီမရှိပါက ရုရှား၏ နောက်ထပ် နယ်မြေသိမ်းပိုက် မှုများအား မည်သို့မျှ ကာကွယ်နိုင်ဖွယ်မရှိသောကြောင့် ပူတင်ဘက်မှ တောင်းဆိုမှုများကို မည်သို့မျှ လက်ခံနိုင်ဖွယ်မရှိပေ။
ရုရှားအစိုးရပြောရေးဆိုခွင့်ရှိသူ ဒီမီထရီပက်စ်ကော့ဗ်ကလည်း ပူတင်သည် လတ်တလော ဇီလန်းစကီးနှင့်မျက်နှာချင်းဆိုင်တွေ့ဆုံရန် အစီအစဉ်ပင်မရှိသေးဟု ပြောခဲ့သောကြောင့် ဒေါ်နယ်ထရမ့်၏ ကြားဝင်ကြိုးပမ်းမှုများ အရှက်တကွဲဖြစ်ရကြောင်း သုံးသပ်နေကြသည်။
ကိုကလင်း
Ref: Thesun
#MeKongNews
#ရုရှား
#ယူကရိန်း
#ငြိမ်းချမ်းရေး
#ဒေါ်နယ်ထရမ့်
