မဲခေါင်၊ ဇူလိုင် ၉
တရုတ်သိမ်းပိုက်ခံ တိဗက်မှ ဘာသာရေးခေါင်းဆောင် ဒလိုင်းလားမား အသက် ၉၀ ပြည့်မွေးနေ့တွင် အမေရိကန်နိုင်ငံခြားရေးဝန်ကြီး မာကိုရူဘီယို ထောက်ခံအားပေးသည့် သဝဏ်လွှာပို့မှုကြောင့် တရုတ်ဘက်မှ တိဗက်အရေး အမေရိကန်အနေဖြင့် လက်ညှိုးထိုးစရာမည်သည့် အကြောင်းမှ မရှိဟု တုံ့ပြန် သတိပေးသွားခဲ့သည်။
ဇူလိုင် ၆ ရက် တနင်္ဂနွေနေ့တွင် တိဗက်မှ အိန္ဒိယသို့ ထွက်ပြေးတိမ်းရှောင်နေရသော ဒလိုင်းလားမား အသက် ၉၀ ပြည့် မွေးနေ့ပွဲကျင်းပရာတွင် ၎င်းနေရာ ဝင်စားမည့် ဒလိုင်းလားမားသစ်မှာ တရုတ်အစိုးရ အသိအမှတ်ပြုမှ ဖြစ်လာမည့် ဘာသာရေးခေါင်းဆောင်သစ်မဟုတ်ကြောင်း၊ မိမိတို့သာ ဒလိုင်းလားမားသစ်ကို ရွေးချယ်ရမည်ဖြစ်ကြောင်း ပြောဆိုခဲ့သည်။
ထိုမွေးနေ့ပွဲအထိမ်းအမှတ်အဖြစ် အမေရိကန်နိုင်ငံခြားရေးဝန်ကြီး ရူဘီယိုက သဝဏ်လွှာပေးပို့ရာတွင် ဒလိုင်းလားမားသည် တိဗက်ပြည်သူများကို ကိုယ်စားပြုသော စည်းလုံးမှု၊ ငြိမ်းချမ်းမှု၊ ကရုဏာ၏ ပြယုဂ်ဖြစ်ကြောင်း၊ ဘာသာရေးခေါင်းဆောင်ကို အနှောင့်အယှက်မရှိဘဲ လွတ်လပ်စွာရွေးချယ်ပြီး ကြည်ညိုလေးစားနိုင်မှု အပါအဝင် တိဗက်လူမျိုးများ၏ ထူးခြားသော ဘာသာစကား၊ ယဉ်ကျေးမှုနှင့် ဘာသာရေးအမွေအနှစ်များအား ထိန်းသိမ်းနိုင်ရေး ကြိုးပမ်းမှုများကို ထောက်ခံကြောင်း ရေးသားပေးပို့ ခဲ့သည်။
ဇူလိုင် ၈ ရက်တွင် ပုံမှန်လုပ်နေကြသတင်းစာရှင်းလင်းပွဲ၌ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာအိုနင်းက ဒလိုင်းလားမားသည် နိုင်ငံရေးအရ တရုတ်ဆန့်ကျင်ရေး၊ ခွဲထွက်ရေးလှုပ်ရှားသူ ပြည်ပြေးသာဖြစ်ကြောင်း၊ ဒလိုင်းလူနည်းစုအတွက်သာ အကျုံးဝင်သူသည် တိဗက်အနာဂတ်၊ တိဗက်ပြည်သူများအတွက် ကိုယ်စားပြုသူမဟုတ်ကြောင်း၊ ထိရှလွယ်သည့် အနေအားကို အမေရိကန်အနေဖြင့် အသိအမှတ်ပြုရမည်ဖြစ်ကာ တိဗက်အရေး မည်သည့် လက်ညှိုးညွှန်မှုမှ လုပ်ခွင့်မရှိဟု ထုတ်ပြန်သွားခဲ့သည်။
ကိုကလင်း
Ref: asiaone
#MeKongNews
#တရုတ်
#အမေရိကန်
#တိဗက်
#ဒလိုင်းလားမား
