မဲခေါင်၊ ဇူလိုင် ၂
ဇူလိုင် ၁ ရက် ဒေသစံတော်ချိန် နံနက် ၁ နာရီဝန်းကျင်တွင် ဘန်ကောက် နာမည်ကြီးကုန်တိုက်ပေါ်၌ပင် ဘတ် ၃ ဒသမ ၄ သန်း ဓားပြတိုက်သွားသော ဒုစရိုက်သမား ၇ ယောက်ထဲမှ ၂ ယောက်ကို ဖမ်းဆီးရမိခဲ့ကြောင်း ထိုင်းရဲတပ်ဖွဲ့က ထုတ်ပြန်သည်။
ပသုမ်ဌာနီခရိုင်၊ လတ်လမ်ကေးရို ခရိုင်ရှိ တည်းခိုရိပ်သာတစ်ခုတွင် ငွေသား ဘတ် ၁ ဒသမ ၉ သန်း၊ ဓားပြတိုက်စဉ်ဝတ်ဆင်ခဲ့သည့် အဝတ်အစားများ၊ အခြားသော ရာဇဝတ်မှုများမှ ရယူထားသည့် ပစ္စည်းများ၊ ဘဏ်အကောင့်များ၊ ATM ကတ်များ၊ ခိုးရာပါ ပစ္စည်းများကိုလည်း ချီရာဖတ်နှင့် နာနာဆိုသူ တရားခံ နှစ်ယောက်ထံမှ သိမ်းဆည်းရမိခဲ့သည်။
ဓားပြတိုက်ပုံမှာ ခရစ်ပတိုငွေကြေး ဘတ် ၃ ဒသမ ၄ သန်း ယူဆောင်လာပြီး ငွေလဲလှယ်လျှင် ဘတ် ၆၀၀၀၀ အမြတ်ရမည်ဟု မက်လုံးပေးကာ ကုန်တိုက်သို့ ခေါ်ယူတွေ့ဆုံရာမှာ သေနတ်နှင့် ဓားများပြပြီး ပါလာသည့် ငွေအားလုံးကို ဓားပြတိုက်ခဲ့ခြင်းဖြစ်ကြောင်း သိရသည်။
ဓားပြတိုက်ခံရသူများမှာလည်း ယခင်နှစ်ကြိမ် လိမ်လည်ခံရမှုတွင် ဘတ် ၅၀၀၀၀၀ ပါသွားသော်လည်း အမြတ်လိုချင်သောကြောင့် ငွေသား ဘတ် ၃ ဒသမ ၄ သန်းယူဆောင်လာကာ ငွေနှင့် ခရစ်ပတို ငွေကြေးလဲရန် လုပ်ရာမှာ ဓားပြတိုက်ခံရခြင်း ဖြစ်သည်။
ဖမ်းဆီးခံရသူ တစ်ဦးမှာ ထိုအမှုတွင် လိမ်လည်ခံရသူများအား ဟွန်ဒါဆီဗစ်ကားဖြင့် ခေါ်ဆောင်လာသူဖြစ်ကာ ၎င်းရရှိမည့်ခွဲတမ်း ဘတ် ၁ ဒသမ ၅ သန်းကို ယူဆောင်ကာ လွတ်ရာရှောင်ပုန်းခဲ့သလို တခြား အဖွဲ့ ဝင် ၅ ယောက်ကိုလည်း ရှောင်တိမ်းရန် စီစဉ်ပေးခဲ့သူဟု သိရကာ အဖွဲ့ကို ခေါင်းဆောင်သူမှာ ပွန် ဆိုသော သူသာဖြစ်သည်ဟု ထွက်ဆိုကြောင်း၊ ရဲတပ်ဖွဲ့က အဆိုပါ လွတ်နေသေးသော တရားခံ ၅ ဦးနှင့် ဓားပြတိုက်သွားသည့် ငွေများကို ပြန်လည်ရရှိရန် အပူတပြင်း လိုက်လံရှာဖွေနေသည်ဟု ဆိုသည်။
ကိုကလင်း
Ref: The Nation
#MeKongNews
#ဘန်ကောက်
#ဓားပြတိုက်
#ခရစ်ပတို
#ဖမ်းမိ
