မဲခေါင်၊ ဇွန် ၁၇
ဇွန် ၁၇ ရက်မနက်ပိုင်းတွင် အီရန်ဘက်မှ အစ္စရေးနိုင်ငံ ဗဟိုချက်နေရာများသို့ ဒုံးကျည်များဖြင့် ပစ်ခတ် တိုက်ခိုက်ခဲ့ရာ မြေပြင်သို့ ကျရောက်ပေါက်ကွဲပျက်စီးမှုများ ရှိခဲ့ကြောင်း သိရသည်။
ယင်းသတင်းနှင့်ပတ်သက်ပြီး ၂နိုင်ငံလုံးဘက်မှ ဖော်ပြနေမှုများသည် မတူညီသော အချက်အလက်များသာဖြစ်နေပြီး အစ္စရေးဘက်က ဒုံးကျည် ၂၀၊ ၃၀ ဝန်းကျင်၌ ၂ လုံးသည် တဲလ်အဗစ်မြို့ မြောက်ပိုင်း မည်သူမျှ မရှိသည့် ဘတ်စ်ကားဂိတ်သို့သာ ကျရောက်ပြီး ဘတ်စ်ကား မီးလောင်ပေါက်ကွဲသော်လည်း သေဆုံးမှု တစ်ဦးမျှမရှိဟု ထုတ်ပြန်ခဲ့သည်။
ဂိုလန်ကုန်းမြင့်သို့ ဦးတည်လာသော အီရန်ဒရုန်းများကိုလည်း ဖျက်ချနိုင်ခဲ့သည်ဟု အစ္စရေးဘက်မှ ထုတ်ပြန်ပြီး ကယ်ဆယ်ရေးဆေးမှူးတစ်ဦးကမူ ၁၀ ဦး ခန့် အသေးစားဒဏ်ရာများရရှိခဲ့သည်ဟုသာ ဆိုခဲ့သည်။
သို့သော် အီရန် သတင်းဌာနများတွင်မူ အစ္စရေးသည် အစောပိုင်း လူမှုကွန်ရက်များပေါ်တွင် ထွက်ပေါ် လာသော ထိခိုက်မှုများအား ပြန်လည်ဖျက်ချခဲ့ပြီး သေဆုံးမှုမရှိ၊ ထိခိုက်မှုမများဟု ထုတ်ပြန်သော် လည်း တဲလ်အဗစ်မြို့ ဗဟိုချက်များသို့ ဒုံးကျည် ၅ လုံးကျရောက် ထိမှန်ကြောင်း၊ ၈ထပ်တိုက်တစ်လုံး ပြိုကျကြောင်း၊ ဟာဇလီယာအရပ်သို့ ဒုံးကျည်များစွာ ကျရောက်ကြောင်း၊ ပါလက်စတိုင်းထံမှ သိမ်းပိုက်ထားပြီး အစ္စရေးတပ်စွဲထားသည့် West Bank သို့လည်း ဒုံးကျည်များကျရောက်သဖြင့် ထိခိုက် သေဆုံးမှုများပြားနိုင်သည်ဟု ဖော်ပြနေကြသည်။
အမေရိကန်သမ္မတ ဒေါ်နယ်ထရမ့်ကမူ ၎င်း၏ လူမှုကွန်ရက်တွင် အီရန်အနေဖြင့် ချက်ချင်း နျူကလီးယားလက်နက် မပိုင်ဆိုင်ရဆိုသော သဘောတူညီချက်တွင် လက်မှတ်ထိုးလိုက်ပါက ချက်ချင်း ပဋိပက္ခ အဆုံးသတ်သွားမည်ဖြစ်ကာ လက်ရှိတွင်မူ တီဟီရန်မြို့တော်မှ အားလုံး ချက်ချင်း တိမ်းရှောင် ကြသင့်သည်ဟု ရေးတင်ထားသည်ကို တွေ့ရသည်။
ကိုကလင်း
Ref: jpost & mehrnews
#MeKongNews
#အီရန်
#အစ္စရေး
#ဒုံးကျည်ကျရောက်
#တဲလ်အဗစ်မြို့
