မဲခေါင်၊ ဇွန် ၁၁
TNLA ရဲတပ်ဖွဲ့မှ ထိန်းချုပ်နယ်မြေအတွင်း ဖမ်းဆီးရမိထားသည့် ကျားဖြန့်လုပ်ကိုင်သူ အမျိုးသား ၁၂ဦးကို ဇွန်လ ၁၀ရက်၊ နံနက် ၉နာရီတွင် တရုတ်ပြည် ရဲတပ်ဖွဲ့ထံ လွဲပြောင်းပေးအပ်ခဲ့ကြောင်း TNLA သတင်းနှင့် ပြန်ကြားရေးဌာနက ထုတ်ပြန်သည်။
ဖမ်းဆီးရမိသူများမှာ နမ့်ခမ်းမြို့နယ်မှ ၄ဦး၊ ကွတ်ခိုင်မြို့နယ်မှ ၅ဦးနှင့် နမ္မတူမြို့နယ်မှ ၃ဦးတို့ဖြစ်ပြီး နမ့်ခမ်းနှင့် ကွတ်ခိုင်မြို့နယ်မှ ဖမ်းဆီးရမိသူများကို မြို့နယ်ရဲတပ်ဖွဲ့မှ စစ်ဆေးရေးဂိတ်တွင် ဖမ်းဆီးရမိခြင်းဖြစ်ကြောင်း TNLA က ထုတ်ပြန်သည်။
နမ္မတူမြို့နယ်မှ ဖမ်းဆီးရမိသည့် ၃ဦးမှာ ကျားဖြန့်လုပ်ငန်းလုပ်ရန် စီစဉ်နေချိန်အတွင်း မြို့နယ်ရဲတပ်ဖွဲ့သတင်းရရှိ၍ သွားရောက်စစ်ဆေးဖမ်းဆီးခဲ့ခြင်းဖြစ်ပြီး ၎င်းတို့ကို စစ်ဆေးမှုအရ ကျားဖြန့်လုပ်ကိုင်သူဖြစ်ကြောင်း ထွက်ဆိုကြသည်ဟု သိရသည်။
ကျားဖြန့်လုပ်ကိုင်သူများ၏အမည်များမှာ ဝမ်ထန်လင်၊ ဝမ်ကေ့ကန်၊ ကျန့်ရှောင်ချိန်၊ ခုန်ချင့်ဆော့၊ ထန်မောင်ချွန်း၊ ကျုံးချွင်းဟုန်၊ချန်ကျားလင်၊ ကျောင်းယွီ၊ ဟုန်ချန်ရှင်း၊ အားဟောင်၊ အားဟွမ်နှင့် အားယွမ်တို့ဖြစ်ကြပြီး ၎င်းတို့သည် တရုတ်နိုင်ငံသားများ ဖြစ်ကြသည်ဟု သိရသည်။
ဖမ်းဆီးရမိထားသူသည့်၁၂ဦး ကို လွှဲပြောင်းပေးရာတွင်တွင် တစ်ဦးမှာ ခြေထောက်တွင် ဒဏ်ရာရှိထားသောကြောင့် မြို့နယ် ရဲတပ်ဖွဲ့မှ ဆေးကုသပေးခဲ့ပြီး လူမှုကူညီရေးယာဉ်ဖြင့် လွှဲပြောင်းပေးအပ်ခဲ့သည်ဟု သိရသည်။
တရုတ််နိုင်ငံဘက်မှ ကျားဖြန့်အလိုရှိသူများကို ဖမ်းဆီးရာတွင် မြန်မာနိုင်ငံအတွင်းရှိ သက်ဆိုင်ရာ တိုင်းရင်းသား လက်နက်ကိုင်တပ်ဖွဲ့များနှင့် စစ်ကောင််စီတပ်တို့ထံ နာမည်နှင့် နေရာအတိအကျပေးကာ ဖမ်းဆီးခိုင်းခြင်းဖြစ်ပြီး တိုင်းရင်းသားတပ်များမှ အတိအကျဖမ်းဆီးလွှဲပြောင်းပေးသော်လည်း မြန်မာစစ်တပ်ကမူ လာဘ်စားကာ ထိန်ချန်ထားမှုများ ရှိကြောင်း သတင်းရင်းမြစ်များထံမှ သိရသည်။
ယခုလွှဲပြောင်းမှုနှင့် ပတ်သက်ပြီး TNLA မှ ထုတ်ပြန်ရာတွင် လွှဲပြောင်းပေးသည့် နယ်စပ်ဂိတ်ကို ဖော်ပြထားခြင်း မရှိသော်လည်း ရှမ်းပြည်မြောက်ပိုင်းရှိ TNLA ထိန်းချုပ်ထားသည့် နမ့်ခမ်းမြို့နယ်ရှိ နောင်တောင်းနယ်စပ်ဂိတ်ဟု ကနဦးသိရပြီး အတည်ပြုနေဆဲဖြစ်သည်။ ယင်းနယ်စပ်ဂိတ်များမှာ ယခင်က SSPP ထိန်းချုပ်သည့် ဂိတ်များဖြစ်ပြီး လက်ရှိတွင် SSPPနှင့် TNLA ကြား မည်သို့ သဘောတူထားသည်ကို မသိရပေ။
