မဲခေါင်၊ ဇွန် ၄
နှစ်နိုင်ငံနယ်စပ် အငြင်းပွားနယ်မြေပေါ်တွင် မေ ၂၈ ရက်က အပြန်အလှန်ပစ်ခတ်မှုကြောင့် ကမ္ဘောဒီးယား စစ်သည်တစ်ဦး ကျဆုံးခဲ့ရမှုနှင့် ထိုင်းဘက်မှ ပစ်ခတ်မှုများကြောင့် ကမ္ဘောဒီးယား အစိုးရသည် နိုင်ငံတကာတရားရုံး ICJ သို့ ပြဿနာဖြေရှင်းပေးရန် အဆိုတင်သွင်းခြင်း သို့မဟုတ် တခြားသော တတိယအဖွဲ့အစည်းမှတစ်ဆင့် ဖြေရှင်းပေးရန် တောင်းဆိုတော့မည်ဟု သိရသည်။
ထိုင်း၊ လာအို၊ ကမ္ဘောဒီးယား ၃ နိုင်ငံဆုံရာ နယ်စပ်ဒေသ ပိုင်ဆိုင်မှုအတွက် နှစ်ပေါင်းများစွာ အငြင်းပွားခဲ့ရာ မေ ၂၈ ရက်က ဝင်ရောက်ခြင်းမပြုရန် သဘောတူထားသည့်နယ်ထဲ ကမ္ဘောဒီးယားစစ်သားများ ကင်းလှည့်ခြင်းကြောင့် ထိုင်းဘက်မှ ပစ်ခတ်ရာမှ အပြန်အလှန် ပစ်ခတ်မှု ၁၀ မိနစ်နီးပါး ဖြစ်ခဲ့ပြီး ကမ္ဘောဒီးယားစစ်သည်တစ်ဦး ကျဆုံးခဲ့ရသည်။
ထိုင်းနိုင်ငံ ယူဘွန်းရတ်ချာသာနီခရိုင် ချွန်ဘွတ်ခ် နယ်မြေတွင် ဖြစ်ပွားခဲ့သည့် ယင်းတိုက်ခိုက်မှုကြောင့် နှစ်နိုင်ငံ နယ်စပ်သို့ စစ်အင်အားများ တိုးမြှင့်ပို့ဆောင်နေရာ ထိုင်းဘက်မှ တင့်ကားများ၊ စစ်သည်အင်အားအများအပြားနှင့် အမြောက်တပ်များကိုပါ အလုံးအရင် ချထားပြီး နယ်စပ်တစ်လျှောက် ကတုတ်ကျင်းများ၊ ဘန်ကာများတည်ဆောက်ကာ အရပ်သားများ အန္တရာယ်ဇုန်ရှိရာ နေရာမှာ ရှောင်ရှားနေထိုင်ကြရန် သတိပေးမှုများလည်း ရှိနေသည်။
ဇွန် ၄ ရက်မနက်တွင် ထိုင်း အစိုးရအဖွဲ့က ထိုသို့ စစ်အင်အားတိုးမြှင့်စေလွှတ်ရခြင်းမှာ နိုင်ငံ အချုပ်အခြာအာဏာပိုင်ဆိုင်မှုကို ကာကွယ်ရေးနှင့် ပြည်သူများကို ကာကွယ်ရေးက အဓိက ဦးစားပေး သန္နိဌာန်ဖြစ်သည်ဟုဆိုကာ နှစ်နိုင်ငံ ဆက်ဆံရေး ယန္တရားအရ နှစ်နိုင်ငံကြား အငြိမ်းချမ်းဆုံးနည်လမ်းဖြင့် ဆွေးနွေးအဖြေရှာသွားမည်ဟု ထိုင်းကာကွယ်ရေးဝန်ကြီးလည်းဖြစ် နိုင်ငံဒုတိယဝန်ကြီးချုပ်လည်း ဖြစ်သူ ဖမ်သမ် ဝီချာရာချိုင်က ထုတ်ပြန်သွားခဲ့သည်။
ကိုကလင်း
Ref: Bangkokpost
#MeKongNews
#ထိုင်းနိုင်ငံ
#ကမ္ဘောဒီးယား
#အငြင်းပွားနယ်မြေ
#နယ်စပ်ဒေသ
