မဲခေါင်၊ မေ ၂၈
ပြီးခဲ့သည့် သီတင်ပတ်ကုန်က မြောက်ကိုရီးယားနိုင်ငံ၏ နောက်ဆုံးပေါ် တန် ၅၀၀၀ တိုက်သင်္ဘောကြီး ရေချပွဲအခမ်းအနားတွင် မအောင်မြင်ဘဲ ပျက်စီးဆုံးရှုံးမှုများစွာရှိခဲ့ရာ ကနဦး တာဝန်ရှိသူ ၃ ဦးကို ဖမ်းဆီးခဲ့ပြီး နောက်ဆုံး တစ်ယောက်ထပ် ဖမ်းဆီးပြီးနောက် ထိုသူများသည် ကင်ဂျုံအန်အမျက်ဒေါသ ကြောင့် ပစ်သတ်ခံရရန်သာရှိသည်ဟု မြောက်ကိုရီးယားခေါင်းဆောင်စောင့်ကြည့်ရေးအဖွဲ့ ထူထောင်သူ မစ်ချယ်မက်ဒန်က သုံးသပ်ပြောဆိုသွားခဲ့သည်။
နိုင်ငံတကာက ယင်းတန် ၅၀၀၀ တိုက်သင်္ဘောကြီးသည် နျူကလီးယားတင်ဆောင် ပစ်ခတ်နိုင်စွမ်း မည်မျှရှိမည်ကို စိတ်ဝင်တစားစောင့်ကြည့်နေကာ မြောက်ကိုရီးယား အစိုးရပိုင်မီဒီယာ၏ ခေါင်းကြီး မျက်နှာဖုံးသတင်းအဖြစ် တင်ရန် စီစဉ်ထားသော အခမ်းအနားသတင်းအဖြစ် လျာထားခဲ့သည်။
ဂြိုဟ်တုဓာတ်ပုံများအရ သင်္ဘောသည် အတော်ပျက်စီးသွားပြီး ကရိန်းအပြာရောင်တပ်ဆင်ကာ ပြန်လည် ပြင်ဆင်နေသည်ကို တွေ့ရသည်။
သင်္ဘောရေချရာ ချုံဂျင်းမြောက်ဘက် သင်္ဘောဆိပ်သို့ တက်ရောက်ဖွင့်လှစ်စဉ် ကိုယ်တိုင်မြင်ခဲ့ရသဖြင့် နမော်နမဲ့နိုင်လွန်းသော ရာဇဝတ်မှုကျူးလွန်ခြင်းဟု ကင်ဂျုံအန်ကိုယ်တိုင်က ဒေါသတကြီး ပြောဆိုခဲ့ကာ အင်ဂျင်နီယာချုပ် ကန်ဂျောင်ချူး၊ အလုပ်သမားအဖွဲ့ ခေါင်းဆောင် ဟန်ကျောင်ဟက်၊ လက်ထောက်မန်နေဂျာ ကင်ယောင်ဟက်တို့ကို ကနဦးဖမ်းဆီးခဲ့ပြီး ယခုနောက်ဆုံး သင်္ဘောကျင်းမှ အရာရှိတစ်ဦးကို ထပ်ဖမ်းဆီးခဲ့ကြောင်း သိရသည်။
ထိုအခြေအနေနှင့်ပတ်သက်ပြီး မြောက်ကိုရီးယားစောင့်ကြည့်ရေးအဖွဲ့ထူထောင်သူ မစ်ချယ် မက်ဒန်က ကင်ဂျုံအန်လက်သုံးစကားဖြစ်သည့် မျောက်ခြောက်ရန် ကြက်ကိုသတ်ရမည် ဆိုသည့်အတိုင်း ဖမ်းဆီး ခံရသူများမှာ ပစ်သတ်ခံရရန်သာ သေချာသလောက်ရှိနေသည်ဟု သုံးသပ်ပြောဆိုသွားခဲ့သည်။
ကိုကလင်း
Ref:The Sun
#MeKongNews
#မြောက်ကိုရီးယား
#တိုက်သင်္ဘော
#ကင်ဂျုံအန်
#သေဒဏ်
