မဲခေါင်၊ မေ ၆
မေ ၆ ရက်ညပိုင်းက အိန္ဒိယ၏ ပါကစ္စတန်ပိုင်နက် ကက်ရှ်မီးယားဒေသရှိ ပစ်မှတ် ၉ ခုကို ဒုံးကျည်များ ဖြင့်လေကြောင်းတိုက်ခိုက်မှု ပြုလုပ်အပြီး ယူအေးအီးနှင့် တောင်အာရှမှ အိန္ဒိယနှင့်ပါကစ္စတန်သွား လေကြောင်းခရီးစဉ်များ ရပ်ဆိုင်းပြီး ကမောက်ကမ ဖြစ်ကုန်ကြောင်းသိရသည်။
ဒူဘိုင်းအပြည်ပြည်ဆိုင်ရာ လေဆိပ်၏ ထုတ်ပြန်ချက်အရ Emirates နှင့် Flydubai လေကြောင်းလိုင်း များအပါအဝင် လေကြောင်းလိုင်းများစွာသည် ခရီးစဉ်များစွာကို ရွှေ့ဆိုင်း၊ ဖျက်သိမ်းခဲ့ကြောင်းနှင့် အဘူဒါဘီတွင်လည်း Zayed အပြည်ပြည်ဆိုင်ရာလေဆိပ်မှ လေကြောင်းလိုင်းများစွာ ရွှေ့ဆိုင်းဖျက်သိမ်းခဲ့ရသည်ဟု Gulf News မှ ဖော်ပြခဲ့သည်။
Qatar လေကြောင်းလိုင်းကလည်း ပါကစ္စတန်သို့ မောင်းနှင်မည့် လေကြောင်းလိုင်းများ ယာယီရပ်ဆိုင်းကြောင်း ကြေညာသလို Air France၊ Lufthansa၊ British Airway၊ Swiss International Air Lines နှင့် Emirates လေကြောင်းလိုင်းအားလုံး ပါကစ္စတန်လေပိုင်နက်ကို ဖြန်ကျော်ရမည့် ခရီးစဉ်များ အားလုံးရှောင်ရှားလိုက်သည်ဟု ကြေညာသွားခဲ့သည်။
အိန္ဒိယ ကုန်တင်လေကြောင်းလိုင်း IndiGo နှင့် SpiceJet တို့ကလည်း ခရီးသွားအကြံပေးများမှ တစ်ဆင့် အိန္ဒိယနိုင်ငံမြောက်ပိုင်းရှိ Srinagar၊ Jammu၊ Amritsar၊ Leh၊ Chandigarh၊ Dharamshala နှင့် Bikaner လေဆိပ်များမှ ခရီးသွားမှုများ မပြုလုပ်မီ ခရီးစဉ်များ ပျက်နိုင်သဖြင့် ကြိုတင်မေးမြန်းကြရန် ထုတ်ပြန်ခဲ့သည်။
ဧပြီ ၂၂ ရက်နေ့က နှစ်နိုင်ငံ အငြင်းပွားဖွယ်ရာ နယ်စပ် ကက်ရှ်မီးယားရှိ ပဟယ်လ်ဂမ်ဒေသတွင် ပါကစ္စတန်တွင်းအခြေစိုက်သော စစ်သွေးကြွများက ခရီးသွား အိန္ဒိယနိုင်ငံသား ဟိန္ဒူဘာသာဝင် ၂၅ ဦးနှင့်နီပေါနိုင်ငံသား တစ်ဦးကို နာမည်နှင့်ဘာသာမေးမြန်းပြီး အနီးကပ် ပစ်သတ်ခဲ့ရာ ထိုအကြမ်းဖက် သမားများသည် ပါကစ္စတန်နယ်စပ်တွင် အခြေစိုက်နေထိုင်သဖြင့် ၎င်းတို့ကိုသာ ပစ်မှတ်ထားပြီး နေရာ ၉ နေရာကို ပစ်ခတ်တိုက်ခိုက်ကြောင်း အိန္ဒိယဘက်က ကြေညာခဲ့သည်။
နျူကလီးယားပိုင် နှစ်နိုင်ငံ စစ်ရေးစတင်ချိန်တွင် ကုလသမဂ္ဂအတွင်းရေးမှူးချုပ် ဂူတာရက်စ်ကလည်း အိန္ဒိယနှင့်ပါကစ္စတန်အရေးကို ကမ္ဘာက ဝင်ရောက်တားမြစ်နိုင်မည်မဟုတ်ကြောင်းနှင့် စစ်ရေး အလွန် အကျွံ့ တိုက်ခိုက်ခြင်းမလုပ်ကြရန် တိုက်တွန်းရေးသာ တတ်နိုင်မည်ဖြစ်ကြောင်း ထုတ်ပြန်ပြောဆိုသွား ခဲ့သည်။
ကိုကလင်း
Ref: onmanorama
#MeKongNews
#အိန္ဒိယ
#ပါကစ္စတန်
#လေကြောင်းလိုင်း
#တောင်အာရှ
