မဲခေါင်၊ ဧပြီ ၁၂

ဧပြီ ၁၂ ရက်နေ့တွင် ပါလက်စတိုင်းပိုင် ဂါဇာကမ်းမြောင်ဒေသမှ ရာဖာမြို့ကို အစ္စရေးတပ်က အလုံးစုံ သိမ်းပိုက်ထိန်းချုပ်လိုက်ပြီဖြစ်ကြောင်း အတည်ပြုကြေညာခဲ့သည်။

အစ္စရေးသည် တပ်အင်အားအလုံးအရင်းဖြင့် ဂါဇာနှင့်အစ္စရေးနိုင်ငံအကြားရှိ တောင်ပိုင်းမြို့တော် ရာဖာကို သိမ်းပိုက်ပြီးနောက် ခွန်းယူနစ်မြို့နှင့် အစ္စရေးနယ်စပ်အကြား ထိုမြို့အား လုံခြုံရေးစင်္ကြန်မြို့အဖြစ် ထားရှိကာ ယင်းနယ်မြေကို ဂျူးရိုးရာနာမည် Morak ဟု ခေါ်တွင်စေမည်ဖြစ်ကာ နောက်ထပ် ဂါဇာကမ်းမြောင်ဒေသ နေရာအသီးသီးသို့ ထပ်မံ စစ်ကြောင်းထိုးနယ်မြေချဲ့ထွင်သွားဦးမည်ဟုပါ သတိပေးချက် ထုတ်ပြန်ခဲ့သည်။

အစ္စရေး၏ ရာဖာမြို့ကို ကြားခံနယ်အဖြစ် သိမ်းပိုက်ခြင်းအပေါ် ရာဖာမြို့ခံများနှင့် ပါလက်စတိုင်းဘက်မှ နိုင်ငံတကာ စည်းမျဉ်းစည်းကမ်းကို ဖောက်ဖျက်ပြီး တရားဝင်နယ်မြေကို သိမ်းပိုက်ခြင်းဖြစ်သည်ဟု တုံ့ပြန်သော်လည်း အစ္စရေးဘက်က ဟားမက်စ်တို့ ဖမ်းထားသည့် ဓားစာခံ ၅၉ ယောက် (၂၄ ယောက်မှာ ရှင်သန်နေသေး) ကို ပြန်လွှတ်ပေးခြင်းမရှိပါက ဆက်လက် နယ်မြေချဲ့တွင် တိုက်ခိုက်သွားမည်ဖြစ်ကြောင်း ပြောဆိုသည်။

ထို့ကြောင့် ပါလက်စတိုင်းပြည်သူများ စစ်ဇုန်မှ ဘေးလွတ်ရာပြောင်းရွှေ့ကြရန် သတိပေးချက်ထုတ်ပြန်သလို တိုက်တွန်းသည့်အတိုင်း လိုက်ပါလုပ်ဆောင်ပါမှသာ ငြိမ်းချမ်းရေး ဆွေးနွေးမှု ပြန်စတင်နိုင်မည်ဟု ထုတ်ပြန်ခဲ့သည်။

အစ္စရေး၏ တိုက်ခိုက်မှုကြောင့် ဂါဇာကမ်းမြောင် ဒေသအတွင်း ပါလက်စတိုင်း ၅၀၀၀၀ ကျော်သေဆုံးခဲ့ပြီး ထိုထဲတွင် ဟားမက်စ် ၂၀၀၀၀ ပါသည်ဟု အစ္စရေးဘက်မှ ထုတ်ပြန်သော်လည်း ဟားမက်စ်ဖြစ်ကြောင်း အထောက်အထား ပြသနိုင်ခြင်းမရှိဟု သိရသည်။

ကိုကလင်း
Ref: timesofindia
#MeKongNews
#အစ္စရေး
#ပါလက်စတိုင်း
#ဂါဇာ
#ရာဖာမြို့

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)