မဲခေါင်၊ ဧပြီ ၁၃
တောင်ကြီး စရဖတပ်မှူးဖြစ်သူ ဗိုလ်မှူးဇေယျာထွန်းမှာ ၎င်း၏ လက်အောက်ခံ တပ်ဆွယ် (တပ်စိတ်) နှင့် တပ်စုများထံမှ လစဉ်ကြေး သိန်းရာနှင့်ချီတောင်းခံပြီး မပေးပါက ရာထူးနေရာပြောင်းပစ်မည်ဟု ခြိမ်းခြောက်မှုများ ပြုလုပ်နေကြောင်း သတင်းရင်းမြစ်များထံမှသိရသည်။
တောင်ကြီး စရဖလက်အောက်ရှိ တပ်ဆွယ်များဖြစ်သည့် မိုင်းပျဉ်း၊ ကျိုင်းခမ်းနှင့် နောင်ဝိုး အစရှိသည့် တပ်ဆွယ်များမှ တာဝန်ခံများကို ခေါ်ယူကာ လစဉ်ကြေးအဖြစ် ကျပ်သိန်းတစ်ရာနှင့်အထက် တောင်းခံကြောင်း၊ မပေးနိုင်ပါက ခြေလျင်/ခြေမြန်များသို့ ပို့ဆောင်မည်ဟု ခြိမ်းခြောက်ကြောင်း စရဖတပ်နှင့် နီးစပ်သည့် သတင်းရင်းမြစ်တစ်ဦးက ပြောသည်။
ထို့ပြင် တောင်ကြီးစရဖ လက်အောက်ရှိ တပ်စုများဖြစ်သည့် အောင်ပန်း၊ ရပ်စောက်၊ လွိုင်ကော် စသည့်တပ်စုများအနေဖြင့်လည်း တပ်ရေးဗိုလ်ကြီး အသုံးစရိတ်အဖြစ် တစ်လလျှင် ကျပ်သိန်း ၃၀ လစဉ်ပေးရကြောင်း၊ ငွေကြေးအဆင်ပြေသည့် အခြားတပ်ဆွယ်များမှလည်း ငွေကြေးအဆင်ပြေမှုအပေါ် မူတည်ပြီး တပ်ဆွယ်အလိုက် ကျပ် ၅သိန်းမှ ကျပ်သိန်း ၆၀ အထိ ပေးဆောင်ရကြောင်း သိရသည်။
ဗိုလ်မှူးဇေယျာထွန်းမှာ တောင်ကြီးစရဖတပ်မှူးအဖြစ် ၂၀၂၃ ခုနှစ်၊ နိုဝင်ဘာလတွင် ရောက်ရှိလာသူဖြစ်ပြီး ယခင်က မန္တလေးတွင် တာဝန်ကျခဲ့သူဖြစ်ကြောင်း၊ ၎င်း၏ ဇနီးဖြစ်သူ ဒေါ်ဖြူသန္တာထွန်းမှာလည်း တပ်တွင်း၌ ရဲမေများအပေါ် ပြောဆိုဆက်ဆံရာတွင် မောက်မာရိုင်းစိုင်းသူဖြစ်ကြောင်း၊ ဒေါ်ဖြူသန္တာထွန်း၏ ပြောဆိုဆက်ဆံမှုများကြောင့် ရဲမေများလည်း စိတ်ဆင်းရဲနေရကြောင်း၊ သို့သော်မည်သူ့ကိုမျှ မဖွင့်ပြောရဲကြောင်း ၎င်းတို့နှင့် နီးစပ်သူ တစ်ဦးက ပြောသည်။
“တစ်ခုခုတိုင်လို့ လာစစ်ရင်လည်း ဘယ်သူမှ သူတို့နဲ့ပတ်သက်တာ အမှန်ကို မပြောရဲကြဘူး။ ပြောရင် ခြေလျင်၊ ခြေမြန်ပို့မယ် ခြိမ်းခြောက်တယ်။ တပ်မှူးကတော်က သူ့အမေကိုတောင်သူအိမ်ပေါ်က မောင်းချတာ” ဟု ၎င်းကပြောသည်။
စစ်ဘက်ရေးရာလုံခြုံရေးတပ်ဖွဲ့ – စရဖတပ်များသည် တိုင်းစစ်ဌာနချုပ်များ အခြေစိုက်သည့် နေရာများ၌ တပ်ထိုင်ပြီး ရှမ်းပြည်အတွင်း၌ စရဖတပ် ၄ တပ်အခြေစိုက်ကြောင်း၊ ၎င်းတို့မှာ တောင်ကြီး၊ ခိုလန်၊ ကျိုင်းတုံနှင့် လားရှိုး(ယခင်က) တို့တွင် အခြေစိုက်ကြောင်း သိရသည်။
ဇော်မြင့်
#MeKongNews
#တောင်ကြီးမြို့
#စရဖ
#လစဉ်ကြေး
#ငွေတောင်းခံ
#ဗိုလ်မှူးဇေယျာထွန်း
