မဲခေါင်၊ ဧပြီ ၄
ရှမ်းပြည်အရှေ့ပိုင်း၊ မိုင်းဆတ်မြို့နယ်အတွင်ရှိ တရုတ်ရွှေမိုင်းတွင်းများကြောင့် ချင်းမိုင်နှင့်ချင်းရိုင် ခရိုင်များမှ ပြည်သူများ Kok မြစ်(နမ့်ခုတ်မြစ်) ရေကို မသုံးစွဲကြရန် ချင်းမိုင်ခရိုင် သဘာ၀ပတ်ဝန်းကျင်နှင့် လေထုညစ်ညမ်းမှုထိန်းချုပ်ရေးဌာန ညွှန်ကြားရေးမှူး Arveera Pakamat က သတိပေးအကြံပြုချက် ထုတ်ပြန်ခဲ့သည်။
မတ် ၁၉ ရက်နေ့က မယ့်အိုင်ခရိုင်မှ ဖြတ်စီးဆင်းသော နမ့်ခုတ်မြစ်ရေကို နမူနာယူ စမ်းသပ်စစ်ဆေးရာ တွင် သာမန်သဘာ၀ရေရင်းမြစ်များတွင် အာစင်းနစ်ဓာတ် တစ်လီတာ၌ ၀.၀၁ မီလီဂရမ်သာ ပါဝင်ရာ ယခု စစ်ဆေးမှုတွင် ဘေးကင်းမှုစံနှုန်းထက် အာစင်းနစ်အက်ဆစ်ဓာတ် ၂ ဆ ပိုများပြီး တစ်လီတာတွင် ၀.၀၂၆ မီလီဂရမ်ပါဝင်နေသောကြောင့် လူသားများအတွက် အဆိပ်သင့်ဘေးအန္တရာယ်ရှိနေသဖြင့် မသုံးကြရန် သတိပေးထုတ်ပြန်ခြင်းဖြစ်သည်။
နမ့်ခုတ်မြစ် ရေနမူနာထဲတွင် အာစင်းနစ်ဓာတ်သာမက Heavy Metals များဖြစ်သည့် ကဒ်မီယမ်နှင့် ခဲ ဓာတ်များလည်း တွေ့ရှိရပြီး ယင်းအာစင်းနစ်ပါသောရေကို သောက်သုံးမိလျှင် အစာအိမ်နာကျင်ခြင်းဖြစ်စေကာ အမြဲတမ်းသောက်မိလျှင် ကင်ဆာဖြစ်စေပြီး အရေပြားယားယံခြင်းများလည်း ဖြစ်စေသည် ဟု Arveera Pakamat က သတိပေးထုတ်ပြန်ခဲ့သည်။
၂၀၂၀ ခုနှစ်အထိ ရှမ်းပြည်နယ်တွင် ရွှေမိုင်းလုပ်ကွက်များ မရှိသေးဘဲ နောက်ပိုင်းမှ တရုတ်ကုမ္ပဏီများ၏ ရွှေမိုင်းတွင်းလုပ်ကွက်များပေါ်ပေါက်လာကာ မိုင်းဆတ်မှာပင် တရုတ်နိုင်ငံသား ၃၀၀ ကျော်ဖြင့် ရွှေမိုင်းတွင် ၄ ခု လုပ်ဆောင်နေကြောင်း မြန်မာလူ့အခွင့်အရေးအဖွဲ့အစည်းများ၏ မှတ်တမ်းများအရ သိရှိရသည်။
ကိုကလင်း
Ref: thaipbs
#MeKongNews
#နမ့်ခုတ်မြစ်
#မိုင်းဆတ်
#အာဆင်းနစ်
#ရွှေမိုင်း
ပုံအညွှန်း – နမ့်ခုတ်မြစ်ပေါ်ရှိ ရွှေမိုင်းတစ်ခု
