မဲခေါင်၊ ဖေဖေါ်ဝါရီ ၁၈
နေ့စဉ်နီးပါး မြေပြင်တိုက်ပွဲဖြစ်ပွါးနေသည် မိုးဗြဲမြို့နယ်၊ KNDF တပ်ရင်း(၃)လှုပ်ရှားနယ်မြေဖြစ်သည့် စစ်မြေပြင်၌ စစ်ကောင်စီ၏ အဓမ္မစစ်မှုထမ်းစေခိုင်းခံရသူများထဲမှ လက်နက်နှင့်တကွ ငါးဦး၊ လက်နက်မပါ ရှစ်ဦး KNDF ပြည်သူ့ဘက်ရပ်တည်ခိုလှုံလာသည်။
ထို ၁၃ ဦးကို KNDF မှလက်ခံခေါ်ဆောင်ပြီး ဗဟိုဌာနများ၌ လုံခြုံစွာထားရှိကြောင်း ယနေ့ထုတ်ပြန်ချက်၌ ဖေါ်ပြထားသော်လည်း ပြည်သူ့ဘက်ခိုလှုံလာသည့် နေ့ရက်၊ စွန့်ခွါလာသည့်တပ်ရင်းနံပတ်များကို ဖေါ်ပြထားခြင်းမရှိသလို ဆက်သွယ်မေးမြန်းသော်လည်း ဖြေကြားခြင်းမရှိချေ။
KNDF တပ်ရင်း(၃)က တပ်ရင်းမှူးနှင့် အဓမ္မစစ်မှုထမ်းစေခိုင်းခံရသူတစ်ဦးနှင့် အမေးအဖြေပြုလုပ်ထားသည့် ဗွီယိုဖိုင်တစ်ခုလည်း တပ်ရင်း(၃)ကထုတ်ပြန်ထားသည်။
ထိုဗွီယိုဖိုင်၌ ရင်း(၃)တပ်ရင်းမှူးမေးသမျှကိုဖြေကြားနေသူသည် ၂၀၂၄ ခုနှစ်၊ ဩဂုတ်လ ၁၅ ရက် ရဲနှင့် အခြေအတင် စကားများရာမှ ဖမ်းဆီးခံရကာ သင်တန်းကျောင်းသို့ပို့ဆောင်ခံရပြီး စက်တင်ဘာ ၉ ရက်တွင် အခြေခံစစ်သင်တန်း သုံးလတက်ခဲ့ရသည်၊ ထို့နောက် ယခုလတွင် စစ်မြေပြင်ကိုပို့ဆောင်ခံရပြီး ၁၃ ရက်ခန့်အကြာတွင် KNDF နှင့်ချိတ်ဆက်ခိုလှုံခြင်းဟုဆိုသည်။
၎င်းက “လူငယ်တစ်ယောက်ဆိုရှိရင် ဖုန်းပျောက်လို့ ရဲစခန်းသွားတိုင်တာ အလုပ်ရှုပ်လို့ဆိုပြီးတော့ တခါတည်း ဆွဲထည့်လိုက်တာ” ဟု ပြောသည်။
KNDF ထံ ပြည်သူ့ဘက်ရပ်တည်ခိုလှုံလာသူများ၏ ပြောဆိုချက်နှင့် မြေပြင်တွေ့ရှိချက်များအရ အင်အားချိနဲ့နေသော စစ်ကောင်စီသည် ရှေ့တန်းစစ်မြေပြင်များ၌ အသက်မပြည့်သေးသည့် ကလေးစစ်သားများကို အသုံးပြုနေကြောင်း ထုတ်ပြန်ချက်တွင် ပါရှိသည်။
စစ်ကောင်စီမှ လူငယ်များကို တပ်သားသစ်များအဖြစ် အဓမ္မဖမ်းဆီးကာ စစ်မှုထမ်းစေခြင်းများကြောင့် ပြည်သူနှင့် လူငယ်များအနေဖြင့် သတိပြုနေထိုင်ကြရန်နှင့် တပ်သားများအဖြစ် စုဆောင်းခံရကာ ရှေ့တန်းစစ်မြေပြင်သို့ ပို့ဆောင်ခံရပါက နီးစပ်ရာ တော်လှန်ရေးတပ်ဖွဲ့များနှင့် ချိတ်ဆက်ကာ ဘက်ပြောင်းခိုလှုံကြရန် KNDF ဗဟိုမှ အသိပေးအကြံပြုတိုက်တွန်းထားသည်။
သုဝဏ္ဏခွန်
#MeKongNews
#KNDF
#အဓမ္မစစ်မှုထမ်းခိုင်းစေ
#ပြည်သူ့ဘက်ရပ်တည်
#ရဲနှင့်စကားများ
