မဲခေါင်၊ ဖေဖော်ဝါရီ ၈

အစ္စရေးဝန်ကြီးချုပ်နက်တန်ယာဟုက ပါလက်စတိုင်းကို အဓိကထောက်ပံ့ပေးနေသည့် ဆော်ဒီနိုင်ငံသည် လူဦးရေနှင့်ယှဉ်လျှင် လွန်စွာ ကျယ်ဝန်းသောကြောင့် ပါလက်စတိုင်းများကိုခေါ်ကာ တိုင်းပြည်ထောင်ပေးနိုင်သည်ဟု Channel 14 နှင့် အင်တာဗျူးတွင်ပြောကြားသွားခဲ့သည်။

ဆော်ဒီသည် ပါလက်စတိုင်းအား ငွေကြေးအင်အား များစွာထောက်ပံ့ပေးနေသောနိုင်ငံဖြစ်ကာ ကျဉ်းမြောင်းလှသော ပါလက်စတိုင်းနိုင်ငံတွင် လူဦးရေ ၅ သန်းသာ ရှိပြီး ဂါဇာကမ်းမြောင်ဒေသတွင် ပါလက်စတိုင်း ၂ သန်းသာ နေထိုင်ကြသည်။

လူဦးရေ ၃၂ သန်းသာရှိပြီး နိုင်ငံအကျယ်အဝန်း ၈၃၀၀၀၀ စတုရန်းမိုင်ရှိသော ဆော်ဒီအနေဖြင့် အာရှ ပဉ္စမအကြီးမားဆုံး နိုင်ငံ၊ ကမ္ဘာ့အကြီးမားဆုံးနိုင်ငံများထဲတွင် အဆင့် (၁၂)၊ အရှေ့အလယ်ပိုင်းဒေသ အကြီးမားဆုံးနိုင်ငံဖြစ်သောကြောင့် ပါလက်စတိုင်းများအား ခေါ်ယူကာ နိုင်ငံထူထောင်ပေးသင့်ကြောင်း နက်တန်ယာဟုက ပြောသွားခဲ့ခြင်းဖြစ်သည်။

အင်တာဗျူးတွင် ပါလက်စတိုင်အား ဆွေးနွေးညှိနှိုင်း စစ်ပြေငြိမ်းပြီး တည်ငြိမ်အေးချမ်းစွာနဂိုအတိုင်း ယှဉ် တွဲနေထိုင်နိုင်မည်လားဟု မေးမြန်းရာ နက်တန်ယာဟုက အစ္စရေးကို အန္တရာယ်ပေးနေသော သူများနှင့် မည်သို့ မျှ ငြိမ်းချမ်းရေးဆွေးနွေးရနိုင်မည်မဟုတ်ဟု ဖြေကြားခဲ့သည်။

အထူးသဖြင့် အောက်တိုဘာ ၇ ရက်က အစ္စရေး နိုင်ငံအတွင်း ဝင်ရောက်ကာ ဟားမက်စ်များက လူအစုလိုက်အပြုံလိုက်သတ်သွားခြင်း၊ Holocaust လူသတ်ပွဲပြီးလျှင် အကြီးမားဆုံး လူသတ်ပွဲကျူးလွန်သူမှာ ဂါဇာကို ထိန်းချုပ်ထားသော ဟားမက်စ်တို့ ဖြစ်သောကြောင့် ဆော်ဒီလိုကျယ်ဝန်းလွန်းသော ကျောထောက်နောက်ခံနိုင်ငံက ပါလက်စတိုင်းများအား ခေါ်ယူကာ နိုင်ငံ ထူထောင်ပေးနိုင်ကြောင်း နက်တန်ယာဟုက အရွဲ့တိုက် တုံ့ပြန်သွားခဲ့ခြင်းဖြစ်သည်။

Ref: jpost
ကိုကလင်း
#MeKongNews
#ပါလက်စတိုင်း
#ဆော်ဒီ
#ထရမ့်
#ဂါဇာ
#ကမ်းမြောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)