မဲခေါင်၊ ဇန်နဝါရီ ၃၀
၂၀၂၅ ခုနှစ်၊ ဇန်နဝါရီ ၂၉ ရက်မှာကျရောက်တဲ့ တရုတ်နှစ်သစ်ကူးနေ့မှာ စစ်ကောင်စီ ထိန်းချုပ်ထားတဲ့ မူဆယ်-၁၀၅ မိုင် လမ်းဖွင့်ပေးလိုက်ပေမယ့် နေ့တစ်ဝက်နဲ့ သွားလာဖြတ်သန်းခွင့်ရပေမယ့် ဂိတ်လေးဂိတ်ကို ဖြတ်သန်းခအဖြစ် ခရီးသည်တင်ကားတစ်စီးကို ကျပ်ငါးသောင်းပေးရတယ်လို့သိရပါတယ်။
ရှမ်းပြည်မြောက်ပိုင်း၊ မူဆယ်-၁၀၅ မိုင်နဲ့ မူဆယ်မြို့လမ်းကို ညီနောင်မဟာမိတ် သုံးဖွဲ့ရဲ့ ၁၀၂၇ စစ်ဆင်ရေးစတင်ကတည်းက စစ်ကောင်စီက တစ်နှစ်ကျော်နီးပါး ဖြတ်သန်းသွားလာခွင့်ပိတ်ပင်ထားခဲ့တာဖြစ်ပြီး မနေ့က (ဇန်နဝါရီ ၂၉)တရုတ် နှစ်သစ်ကူးနေ့မှာ ပြန်ဖွင့်ပေးခဲ့တာပါ။
အဲဒီလို ပြန်ဖွင့်ပေးရာမှာလည်း နံနက် အစောပိုင်းကနေ နေလယ် ၁၂ နာရီအထိသာ ခရီးသည်တင်ယာဉ်တွေနဲ့ ဆိုင်ကယ်တွေကိုသာဖြတ်သန်းခွင့် ပေးခဲ့တာဖြစ်တယ်လို့ မူဆယ်ဒေသခံအမျိုးသမီးတစ်ဦးက မဲခေါင်ကိုပြောပါတယ်။
“မူဆယ်ကနေ ၁၀၅ မိုင် အမြန်လမ်းပေါ့လေ အခုလိုဖွင့်ပေးတာက ဒါပထမဆုံးပဲ၊ တခြားကွင်းလမ်းကတော့ မူဆယ် ၁၀၅ မိုင်သွားလို့ရပါတယ်”လို့ သူက ပြောပါတယ်။
အခုလိုဖြတ်သန်းခွင့်ပြုရာမှာလည်း ၁၀၅ မိုင်နဲ့ မူဆယ်မြို့လမ်းတလျှောက် စစ်ကောင်စီဂိတ် ငါးဂိတ်မှ စစ်ဆေးမေးမြန်မှု တွေပြုလုပ်ခဲ့ပြီး ဂိတ်လေးဂိတ်ကို ဖြတ်သန်းခအဖြစ် ခရီသည်တင်ယာဉ် တစ်စီးကို ကျပ် ၅၀၀၀၀ ပေးရပြီး ဆိုင်ကယ်နဲ့ ဒေသခံတွေကိုတော့ လက်ဘက်ရည်ဖိုးတောင်းပြီးမှ ဖြတ်သန်းသွားလာကြတယ် လို့ မူဆယ်-လားရှိုး ခရီးသည်ပို့ဆောင်ရေး ယာဉ်မောင်းတစ်ဦးကပြောပါတယ်။
“ဒီတကြောကသွားတာ ပိုမြန်တာ၊ ကုန်စည်နဲ့ပတ်သက်ပြီးဖြတ်သန်းခွင့်မပေးထားဘူး၊ ကုန်ကားနဲ့ ခရီးသည်တင်တဲ့ကားအများစုက မူဆယ်-၁၀၅ မိုင်ကွင်းလမ်းကပဲ ဖြတ်ပြီး သွားကြပါတယ်၊ ပတ်ပြီးသွားရတဲ့ နမ့်ဖတ်ကာနဲ့ နမ်းခမ်းလမ်းကိုအသုံးပြုကြတယ်”လို့ သူကပြောပါတယ်။
“လမ်းကခဏဖွင့်ပေးလိုက်တဲ့ပုံစံ မျိုးပါ၊ နှစ်ဖက်စလုံးက စစ်ရေးအရပြင်ဆင်ထားတာတွေက အများကြီးရှိတာပေါ့နော်၊ မျက်နှာ ချင်း ဆိုင်လို့တောင်ပြေလို့ရတယ်၊ နှစ်ဖက်တပ်တွေက ပြောရမယ်ဆို တစ်ဖာလုံလောက်ပဲဝေးတာပေါ့၊ သူတို့ဂိတ်တွေ တပ်တွေကခေါင်းချင်းဆိုင်ထားတာ”လို့ ဒေသခံအမျိုးသားတစ်ဦးက ပြောပါတယ်။
ညီနောင်မဟာမိတ် သုံးဖွဲ့ဖြစ်တဲ့ MNDAA ၊ TNLA ၊ AA တပ်ဖွဲ့တွေဟာ မြန်မာ-တရုတ်နယ်စပ် မူဆယ်မြို့နယ်ရှိစစ်ကောင်စီ လက်အောက်ခံ ၁၀၅ မိုင် စစ်ဗျူဟာကုန်းကို ၂၀၂၃ ခုနှစ် ဒီဇင်ဘာ ၁၅ ရက်ကတိုက်ခိုက်သိမ်းပိုက်ထားကာ လက်ရှိမှာတော့ ၁၀၅ မိုင် နယ်စပ်ကုန်သွယ်ရေးဇုန်ကို သုံးဖွဲ့လုံးက ပူးတွဲထိန်းချုပ်နေတာဖြစ်ပါတယ်။
CJ-017
#MeKongNews
#မူဆယ်၁၀၅မိုင်လမ်း
#နေ့တဝက်ဖွင့်
#ဂိတ်ဖြတ်သန်းခ
#ကျပ်၅၀၀၀၀ပေးရ
