မဲခေါင်၊ ဇန်နဝါရီ ၂၁
၂၀၂၄ခုနှစ်၊ တစ်နှစ်အတွင်း စစ်ကောင်စီကြောင့် မြန်မာနိုင်ငံတဝှမ်းကအမျိုးသမီး ၄၇၈ ဦးသေဆုံးတဲ့အထဲမှာ ရှမ်းပြည်က ဒုတိယအများဆုံးဖြစ်ကြောင်း မြန်မာ့အမျိုးသမီးသမဂ္ဂက မနေ့က(ဇန်နဝါရီလ ၂၀ ရက်)ထုတ်ပြန်ပါတယ်။
ရှမ်းပြည်နယ်က အမျိုးသမီး ၉၂ ဦး သေဆုံးကာ အများဆုံးက ရခိုင်ပြည်နယ်ကဖြစ်တယ်လို့ ဖော်ပြထားပါတယ်။
သေဆုံးမှုတွေဟာ စစ်တပ်က လေကြောင်းတိုက်ခိုက်တာ၊ လက်နက်ကြီးပစ်ခတ်တာ၊ မြေမြှုပ်မိုင်းနင်းမိတာ၊ အကျဉ်းထောင်တွေထဲမှာ ညှဉ်းပန်းနှိပ်စက်ခံရတာ၊ လိင်ပိုင်းဆိုင်ရာ အကြမ်းဖက်ခံရတာနဲ့ မတရား သတ်ဖြတ်ခံရတာတွေကြောင့်ဖြစ်တယ်လို့ ဆိုပါတယ်။
မြန်မာ့အမျိုးသမီးသမဂ္ဂ တွဲဖက်အထွေထွေအတွင်းရေးမှူး(၂) မယဉ်မျိုးလှိုင်က “အမျိုးသမီးတွေကို အကြမ်းဖက်တိုက်ခိုက်တာတွေက ဆက်တိုက်ဖြစ်နေတယ်၊ ကျူးလွန်ခံရတဲ့အမျိုးသမီးတွေအတွက် တရားမျှတမှုရအောင် ဒီအချက်အလက်တွေကို ထုတ်ဖော်တာဖြစ်တယ်” လို့ မဲခေါင်ကို ပြောပါတယ်။
ထုတ်ပြန်ချက်မှာဖော်ပြတဲ့ အမျိုးသမီးသေဆုံးမှုစာရင်းဟာ မြန်မာ့အမျိုးသမီးသမဂ္ဂရဲ့ အမျိုးသမီးမှတ်တမ်းနဲ့ သုတေသနလုပ်ငန်းစဉ်အနေနဲ့ တိကျခိုင်လုံတဲ့ သတင်းမီဒီယာအချက်အလက်များနဲ့ မြေပြင်မှရရှိတဲ့ အချက်အလက်များကို စုဆောင်းမှတ်တမ်းတင်ထားခြင်း ဖြစ်တယ်လို့ မဲခေါင်ကို ပြောပါတယ်။
စစ်ကောင်စီ အာဏာသိမ်းပြီးချိန်ကစတင်ပြီး တော်လှန်ရေးကာလ ၄ နှစ်ဝန်းကျင်ကို ရောက်ရှိလာချိန်အထိ စစ်ရာဇဝတ်မှုနဲ့ လူသားမျိုးနွယ်များအပေါ် ကျူးလွန်သောရာဇဝတ်မှုများ အပါအဝင် လူ့အခွင့်အရေးချိုးဖောက်မှုတွေကို နည်းမျိုးစုံနဲ့ ကျုးလွန်နေတာကြောင့် အမျိုးသမီးများမှာ နေ့စဉ်နှင့်အမျှ အသက်ဆုံးရှုံးနေရတယ်လို့ ဖော်ပြထားပါတယ်။
စစ်ကောင်စီက အမျိုးသမီးတွေကိုလေကြောင်းကနေ တိုက်ခိုက်သတ်ဖြတ်တာတွေ၊ စစ်ပဋိပက္ခကြားမှာ လိင်ပိုင်းဆိုင်ရာကျူးလွန်တာတွေဟာ နိုင်ငံတကာဥပဒေတွေအရ ရာဇဝတ်မှုမြောက်ကြောင်းနဲ့ နောက်ထပ် အမျိုးသမီးတွေ အကြမ်းဖက်မခံရအောင်လည်း ကျူးလွန်သူတွေကို ထိထိရောက်ရောက် အရေးယူဖို့လိုအပ်ကြောင်း မြန်မာ့အမျိုးသမီးသမဂ္ဂ အထွေထွေအတွင်းရေးမှူးက ပြောပါတယ်။
အခုလ ၁၇ ရက်က ရှမ်းပြည်နယ်တောင်ပိုင်း ညောင်ရွှေမြို့ကို လက်နက်ကြီးနဲ့ပစ်ခတ်ခဲ့တာကြောင့် အသက်မပြည့်သေးတဲ့ အမျိုးသမီးတစ်ဦး အပါအဝင် သုံးဦး သေဆုံးခဲ့ပါတယ်။
၂၀ ရက်ကလည်း ရှမ်းပြည်တောင်ပိုင်း၊ ဖယ်ခုံမြို့ကို လက်နက်ကြီးပစ်ခတ်ခဲ့တာကြောင့် ကိုယ်ဝန်ဆောင်အမျိုးသမီးတစ်ဦး အပါအဝင် လေးဦး ဒဏ်ရာရရှိခဲ့ပါတယ်။
MK – 016
#MeKongNews
#နိုင်ငံတဝှမ်း
#အမျိုးသမီးသေဆုံး
#ရှမ်းပြည်က
#ဒုတိယအများဆုံး
