မဲခေါင်၊ ဒီဇင်ဘာ ၁၈
ရှမ်းပြည်အရှေ့ပိုင်း၊ တာချီလိတ်ခရိုင်ရဲရုံးအနီးရှိ ငွေလဲဆိုင်ပိုင်ရှင်ကို ပြန်ပေးဆွဲသွားသူ ခြောက်ဦးကို ဒီနေ့(ဒီဇင်ဘာ ၁၈)မနက်ကဖမ်းမိတယ်လို့ ပြန်ပေးဆွဲခံရသူနဲ့ နီးစပ်တဲ့သတင်းအရင်းအမြစ်က ပြောပါတယ်။
ပြန်ပေးဆွဲပြီး ၅ ရက်အကြာ ဒီကနေ့မှာ တရားခံ ခြောက်ဦးကို ပါဆတ်ရပ်ကွက်ရှိ အိမ်တစ်အိမ်မှာ လက်နက်တွေနဲ့အတူ ဖမ်းမိတာဖြစ်ပြီး ပြန်ပေးဆွဲခံရတဲ့ ငွေလဲပိုင်ရှင် အသက်(၇၈)နှစ်ရှိ တရုတ်အမျိုးသား ဦးရန်ထင်ချန်းလဲ ပြန်လည်လွတ်မြောက်လာပြီလို့သူ့မိသားစုနဲ့နီးစပ်သူတွေက အတည်ပြု ပြောကြားပါတယ်။
“ရဲတွေ ညနေက အိမ်ကိုပြန်ပို့သွားတယ်၊ ခြောက်ဦးမိတယ်ပဲပြောတယ်၊ ဘယ်သူတွေ ဖမ်းတာ ဘာညာတော့ ရဲက ဘာမှမပြောဘူး” လို့ ဆွေမျိုးနီးစပ်က ပြောပါတယ်။
ပြန်ပေးဆွဲခံရတဲ့နေရာဟာ ကမ္ဘောဇဘဏ်ခွဲ (၂) ရဲ့ အရှေ့က ဖြစ်ပြီး တာချီလိတ်ခရိုင်ရဲရုံးနဲ့ မီတာ ၇၀ ခန့်သာ ကွာဝေးတယ်လို့ သိရပါတယ်။
ဒီဇင်ဘာ ၁၃ ရက်နံနက်က Mark 2 ကားပေါ်ကို အဓမ္မဆွဲတင်ခေါ်ဆောင်သွားခဲ့တဲ့ အဲ့ဒီဖြစ်စဉ်ကို မဲခေါင်က သတင်းဖေါ်ပြခဲ့ပါသေးတယ်။
တာချီလိတ်မှာ ပြန်ပေးဆွဲဖြစ်စဉ်တွေ မကြာခဏဖြစ်ပွါးလေ့ရှိပြီး ဒီဇင်ဘာ ပထမပတ်ကလည်း ပုံလိုလမ်း အင်တာနေရှင်နယ်ကျော်အနီး လူတစ်စုက ကားပေါ်အဓမ္မဆွဲတင်တဲ့ ပြန်ပေးဆွဲဖြစ်စဉ် ဖြစ်ပွါးခဲ့ပါသေးတယ်။
MK-012
#MekongNews
#တာချီလိတ်
#တာချီလိတ်
#ပြန်ပေးဆွဲ
#၅ရက်အကြာ
