မဲခေါင်၊ ဒီဇင်ဘာ ၁၆
စစ်ကောင်စီရေတပ်က ပစ်ခတ်ဖမ်းဆီးထားတဲ့ ထိုင်းနိုင်ငံသား ၄ ယောက် ပြန်လွတ်တော့မယ်လို့ သတင်းတွေထွက်ခဲ့ပေမယ့် စစ်ကောင်စီဟာ ထောင်ဒဏ် ၆ နှစ်နဲ့ ၄ နှစ် အသီးသီးချမှတ်လိုက်တယ်လို့ ထိုင်းမီဒီယာတွေမှာ ဖော်ပြပါတယ်။
နိုဝင်ဘာ ၃၀ က ထိုင်းငါးဖမ်းစက်လှေ ၁၅ စီးခန့်ဟာ မြန်မာရေပိုင်နက်အတွင်း ငါးဖမ်းနေတုန်း စစ်ကောင်စီရေတပ် စစ်သင်္ဘော ၃ စီးက သတိမပေးဘဲ ပစ်ခတ်တာကြောင့် တစ်ဦးသေဆုံးပြီး ငါးဖမ်းစက်လှေ ၂ စီး ဖမ်းဆီးခံခဲ့ရတာ ဖြစ်ပါတယ်။
ဒီငါးဖမ်းစက်လှေတွေပေါ်မှာ မြန်မာနိုင်ငံသား ၂၇ ယောက် နဲ့ ထိုင်းနိုင်ငံသား ၄ ယောက် ပါဝင်ခဲ့လို့ ထိုင်းဘက်က သူတို့နိုင်ငံသား ၄ ယောက်ကို ပြန်လွှတ်ပေးဖို့နဲ့ ဖမ်းဆီးထားတဲ့ ငါးဖမ်းစက်လှေ ၂ စီးပြန်ပေးဖို့ တောင်းဆိုနေခဲ့တာပါ။
မြန်မာဘက်က ထိုင်း-မြန်မာ နယ်စပ်ကော်မတီဘက်က ဒီအရေးဟာ နေပြည်တော်က ကိုယ်တိုင်ဦးစီးတဲ့ ကိစ္စဖြစ်လို့ နှစ်ဖက်နယ်စပ် ကော်မတီအချင်းချင်း ညှိနှိုင်းမှုနဲ့မပြီးကြောင်း ဖွင့်ပြောအပြီး ဒီဇင်ဘာ ၁၆ ရက်မှာ ထိုင်း Khaosod မီဒီယာက အသက် ၆၁ နှစ်နဲ့ ၆၉ နှစ်ကြား စက်လှေပိုင်ရှင် အပါအဝင် ထိုင်းနိုင်ငံသား ၄ ယောက်ကို ကော့သောင်းခရိုင်တရားရုံးက ထောင်ဒဏ် အသီးသီးချမှတ်ခဲ့တယ်လို့ ဖော်ပြသွားပါတယ်။
စက်လှေပိုင်ရှင်ကို မြန်မာရေပိုင်နက်မှာ ခွင့်ပြုချက်မရှိဘဲ တရားမဝင် ငါးခိုးဖမ်းမှုကြောင့် ထောင်ဒဏ် ၅ နှစ်၊ မြန်မာနိုင်ငံပိုင်နက်ထဲ တရားမဝင်ခိုးဝင်မှုနဲ့ ထောင်ဒဏ် ၁ နှစ် စုစုပေါင်းထောင်ဒဏ် ၆ နှစ်နဲ့ ဒဏ်ငွေ ကျပ် ၂ သိန်း ချမှတ်ခဲ့ကြောင်း၊ ကျန် ၃ ယောက်ကို တရားမဝင် ငါးဝင်ခိုးဖမ်းခြင်းနဲ့ ထောင်ဒဏ် ၃ နှစ်၊ နိုင်ငံပိုင်နက်ထဲ တရားမဝင် ခိုးဝင်မှုနဲ့ ထောင်ဒဏ် ၁ နှစ် စုစုပေါင်း ထောင်ဒဏ် ၄ နှစ်စီနဲ့ ဒဏ်ငွေ ကျပ် ၃ သောင်း ချမှတ်ခဲ့တယ်လို့ ဆိုပါတယ်။
ဒါပေမဲ့ ထိုင်းအစိုးရဘက်က ဒီရေပိုင်နက်ဟာ ရှုပ်ထွေးနေပြီး ဗြိတိသျှ ချမှတ်ပေးသွားကတည်းက နားလည်မှု အယူလွဲနိုင်တဲ့အနေအထားရှိတာကြောင့် ပြန်လည် ဆန်းစစ်ရမှာဖြစ်ကြောင်းနဲ့ သက်ညှာခွင့်အရ ၂၀၂၅ နှစ်သစ်ကူး ပွဲတော်ရက်တွေမှာ ထိုင်းနိုင်ငံသား ၄ ယောက်ကို မြန်မာဘက်က ပြန်လွှတ်ပေးမယ်လို့ ယုံကြည်မျှော်လင့်ကြောင်း အဆိုပါသတင်းမှာ ဖော်ပြသွားပါတယ်။
ကျန် ဖမ်းဆီးရမိတဲ့ မြန်မာနိုင်ငံသား ၂၇ ယောက်ကိုလည်း ကော့သောင် ခရိုင်တရားရုံးက ထောင်ဒဏ် ၁ နှစ် ချမှတ်ခဲ့ကြောင်း သိရှိရပါတယ်။
Ref:Khaosod
MKF-001
#MeKongNews
#စစ်ကောင်စီ
#ဖမ်းဆီး
#ထောင်ချ
#ထိုင်းငါးဖမ်းသမား
#နှစ်သစ်
#ပြန်လွတ်
