မဲခေါင်၊ ဒီဇင်ဘာ ၁၅
ရှမ်းပြည်မြောက်ပိုင်း၊ လားရှိုးမြို့ပြန်လည်ထူထောင်ရေးလုပ်ငန်းတွေကြောင့် မြို့တွင်းတည်ငြိမ်အေးချမ်းမှုရရှိလာကာ ပြန်လည်နေထိုင်သူများလာကာ စည်းကားမှုတွေရှိလာပြီလို့ မြန်မာအမျိုးသားဒီမိုကရက်တစ်မဟာမိတ်တပ်မတော် (ကိုးကန့်တပ်-MNDAA) က ပြောပါတယ်။
လာရှိုးမြို့ရဲ့ လက်ရှိအနေအထားမှာ ဌာနဆိုင်ရာ၀န်ထမ်းတွေက ပြန်လည်ထူထောင်ရေးလုပ်ငန်းတွေကို အားကြိုးမာန်တက် လုပ်ဆောင်လျက်ရှိနေတာကြောင့် ပြန်လည်၀င်ရောက်နေထိုင်သူ ပြည်သူများပြားကာ ပြန်လည်စည်ကားလာပြီဖြစ်တယ်လို့ ဆိုပါတယ်။
မနေ့က (ဒီဇင်ဘာ ၁၄ ) အထူးဒေသ (၁) လားရှိုးမြို့ ဆေးရုံကြီးရှိ ကျန်းမာရေး၀န်ထမ်းတွေက ဌာနဆိုင်ရာအာဏာပိုင်တွေထံ ခရစ္စမတ်အကြို (Carol’s Singing) သွားရောက်သီဆိုနှုတ်ခွန်းဆက် ဆုတောင်းပေးခဲ့ကြပါတယ်၊ လားရှိုးမြို့ စစ်ရေးအုပ်ချုပ်ရေးကော်မတီရဲ့ တာ၀န်ရှိသူတွေကလည်း အတူတကွ ဓမ္မသီချင်းများ သီဆိုဆုတောင်းကြပြီးလက်ဆောင် ပစ္စည်းတွေနဲ့အလှူငွေပြန်လည်ပေးအပပါတယ်။
“ဒီလိုဘာသာရေးပွဲတွေ၊ တိုင်းရင်းသားရိုးရာပွဲတွေ ပြန်လည်ကျင်းပနိုင်တဲ့အပေါ် အများကြီး၀မ်းသာမိပါတယ်၊ ရှေ့လျှောက်လည်း ဒီလိုအခမ်းအနားပွဲမျိုးတွေ ဖြစ်မြောက်အောင် ကြိုးစားလုပ်ဆောင်သွားဖို့ ရှိပါတယ်” လို့ ကိုးကန့်တပ်တာဝန်ရှိသူက အဲ့ဒိပွဲမှာပြောပါတယ်။
“အခုတလောတော့တည်ငြိမ်တယ်ဗျ၊ မြို့ထဲမှာတော့ ပြန်လည်ပတ်နေပါပြီ၊ မြို့ထဲပြန်၀င်လာတဲ့လူလည်း ရှိတယ်၊ ထွက်သွားတဲ့လူလည်း ရှိတယ်ပေါ့၊ ကုန်ဈေးနှုန်းတွေကတော့ တက်မြဲပဲဗျ၊ စက်သုံးဆီဆို တစ်လီတာ ၇၅၀၀ လောက် မြင့်တက်လာတာပေါ့ဗျာ၊ တခြားကုန်ဈေးနှုန်းတွေကတော့ ပြောနေစရာမလိုဘူးပေါ့နော့၊ ကုန်ဈေးနှုန်းတွေက မြင့်တယ်” လို့ လားရှိုးမြို့ဒေသခံတစ်ဦးက မဲခေါင်ကိုပြောပါတယ်။
ကိုးကန့်တပ် (MNDAA) ထိန်းချုပ်ထားတဲ့ လားရှိုးမြို့ကို တရုတ်နဲ့ “၀” ဘက်ကနေ ကုန်စည်စီးဆင်းမှုဖြတ်တောက်ထားတာ၊ ဖိအားပေးတားမြစ်တာတွေရှိသလို စစ်ကောင်စီကလည်း ကုန်စည်၀င်ရောက်မှုကို အဘက်ဘက်က ပိတ်ဆို့နေတာကြောင့် လားရှိုးမြို့ အခြေခံလူတန်းစားတွေအနေနဲ့ ကုန်ဈေးနှုန်းကြီးမြင့်တဲ့ဒဏ်ကို ရင်ဆိုင်နေရပါတယ်။
လက်ရှိ MNDAA ဟာ လားရှိုးမြို့မှာ အုပ်ချုပ်ရေးခိုင်မာအောင် လုပ်ဆောင်နေပြီး ဒေသခံပြည်သူလူထုလုံခြုံရေးအတွက် တိုင်းရင်းသားလူမျိုးပေါင်းစုံပါ၀င်တဲ့ လုံခြုံရေးတပ်ဖွဲ့တွေ ရပ်ကွက်ကျေးရွာအလိုက် ဖွဲ့စည်းထားပြီး ကင်းလှည့်တာ၊ ခိုးဆိုးလုယက်မှုနဲ့ မှုခင်းကိစ္စရပ်တွေကို ရဲတပ်ဖွဲ့နဲ့ ပူးပေါင်းဖြေရှင်းတာတွေ လုပ်ဆောင်နေတယ်လို့ သိရပါတယ်။
CJ-017
#MekongNews
#ကိုးကန့်တပ်
#လားရှိုးမြို့
#ပြန်လည်စည်ကား
#အထူးဒေသ(၁)
#ကျန်းမာရေး
