မဲခေါင်း၊ ဒီဇင်ဘာ ၇
အခုနှစ်၊ ဇွန်လနဲ့နိုဝင်ဘာမှာ ဗုံးကြဲခံထားရတဲ့ ရှမ်းပြည်မြောက်ပိုင်း ၊ကျောက်မဲမြို့ကို ထပ်မံဗုံးကြဲနိုင်ချေရှိနေတယ်လို့ဒေသခံတွေဆီကသိရပါတယ်။
နိုဝင်ဘာ ၃၀ ရက် ည ၆ နာရီခွဲဝန်းကျင်က ဒုတိယအကြိမ် ဗုံးမကြဲခင်ရက်တွေမှာ ကျောက်မဲမြို့ပေါ် စစ်ကောင်စီရဲ့ဒရုန်းတွေပျံဝဲနေကာ ဗုံးမကြဲခင်တစ်ရက်အလိုမှာ ဒရုန်းတွေမလာတော့ပဲ နောက်ရက်မှာဂျက်ဖိုက်တာနဲ့ ဗုံးကြဲခဲ့သလိုမျိုး အခုလည်း ဒီဇင်ဘာ ၅ ရက်ကစပြီး ဒရုန်းတွေပျံဝဲနေတာကြောင့် နောက်တစ်ဗုံးထပ်ကြဲနိုင်ချေရှိနေတယ်လို့ ဒေသခံတွေက ယူဆကြပါတယ်။
“အခုလည်း အဲရပ်ကွက်ကို နှစ်ညရှိပြီ ထပ်ပြီးဒရုန်းတွေဝဲနေတယ်၊ ရပ်ကွက်နေပြည်သူတွေကတော့ ကြောက်နေကြတယ်” လို့ကျောက်မဲမြို့ ဒေသခံအမျိုးသမီးတစ်ဦးက ပြောပါတယ်။
ထပ်မံဗုံးကြဲနိုင်ချေရှိတယ်လို့ တွက်ဆထားတဲ့ဒေသခံပြည်သူတွေဟာ ထိပ်လန့်ပြီး ဘေးလွတ်ရာကိုရွေ့ပြောင်းတိမ်းရှောင်နေကြပါပြီ။
နိုဝင်ဘာ ၃၀ ကဗုံးကြဲခဲ့တဲ့ ကျောက်မဲမြို့၊ အင်ကြင်းတောင်ရပ်ကွက်အတွင်းမှာ လက်နက်ကိုင် ဘယ်အဖွဲ့အစည်းမှ ရုံးစိုက်ထားတာမျိုး မရှိတာကြောင့် စစ်ကောင်စီရဲ့ဗုံးကြဲတာက ပြည်သူတွေကိုအဓိက ပစ်မှတ်ထားပြီးတိုက်ခိုက်တာဖြစ်တယ်လို့ ဒေသခံတွေကယူဆကြပါတယ်။
အဲဒီဖြစ်စဉ်မှာ အောင်ဆုပန်ကျောင်းတိုက်မှ ကိုရင်တစ်ပါးနဲ့ ဒေသခံ ခြောက်ဦး နေရာတွင်ပင် သေဆုံးခဲ့ကာ ပြင်းထန်ဒဏ်ရာရရှိသူက ၁၂ ဦး ရှိခဲ့ပါတယ်။ ဒဏ်ရာရရှိသူတွေထဲမှ ဆေးရုံးအရောက် နှစ်ဦး သေဆုံးခဲ့ပါတယ်။ ပြင်းထန်ဒဏ်ရာနဲ့ဆေးရုံးမှာ ဆေးကုသမှုခံယူနေတဲ့ ဦးအိုက်စံမှာ ဒီဇင်ဘာ ၅ ရက်မှာ ထပ်မံသေဆုံးခဲ့တာကြောင့် စုစုပေါင်းသေဆုံးသူ ကိုးဦးအထိ ရှိလာခဲ့ပါတယ်။ ဗုံးထိမှန်ပြီး အိမ် ၂၀ အဆိုးရွားဆုံးထိခိုက်ပျက်စီးဆုံးရှုံးခဲ့ပြီး အပေါ်ပိုင်းထိခိုက်ပျက်စီးခဲ့တဲ့နေအိမ် ၂၈ လုံး ရှိခဲ့တယ်လို့ သိရပါတယ်။
ကျောက်မဲမြို့ကို ပထမအကြိမ်အဖြစ် ဇွန် ၃၀ ည ၁၂ နာရီက ဂျက်ဖိုက်တာနဲ့ ပေါင် ၅၀၀ ဗုံးကြဲခဲ့တုန်းကလည်း အမျိုးသမီး တစ်ဦး သေဆုံးကာ ဘုန်းကြီးကျောင်း အပါအဝင် နေအိမ် ၂၀ ခန့် ပျက်စီးပြီး ဆီဆိုင်တစ်ဆိုင် မီးလောင်ခဲ့ပါတယ်။
စစ်ကောင်စီရဲ့ အမှတ်(၁)စစ်ဆင်ရေးကွပ်ကဲမှုဌာနချုပ် စကခ(၁) အခြေစိုက်တဲ့ကျောက်မဲမြို့ကို သြဂုတ် ၆ ရက်မှာ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ကသိမ်းပိုက်ခဲ့တာပါ။
ပြီးခဲ့တဲ့ နို၀င်ဘာ တစ်လအတွင်းမှာ စစ်ကောင်စီရဲ့ လေယာဉ်ဖြင့်ဗုံးကြဲမှုကြောင့် တအောင်းဒေသအတွင်း အရပ်သား ၃၈ ဦး သေဆုံးပြီး ဒဏ်ရာရရှိသူ ၇၀ ဦးအထိရှိခဲ့တယ်လို့ တအောင်းတပ်မတော် (TNLA) က ဒီဇင်ဘာ ၂ ရက်က ထုတ်ပြန်ထားပါတယ်။
CJ-017
#MekongNews
#ကျောက်မဲမြို့
#ပေါင်၅၀၀ဗုံး
#ဒရုန်းပျံဝဲ
#TNLA
#စကခ(၁)
