မဲခေါင်၊ ဇူလိုင် ၂၈
စစ်ကောင်စီက နိုင်ငံရေးနဲ့ စီးပွားရေးအရ နိုင်ငံတကာမှာ ထွက်ပေါက်ရဖို့ အကျဥ်းချ ခံထားရတဲ့ ဒေါ်အောင်ဆန်းစုကြည် ကို အသုံးချ နေတယ်လို့ စစ်ကောင်စီနဲ့ နီးစပ်တဲ့ အမည်မဖော်လိုသူ သတင်းရင်းမြစ် တစ်ဦးက မဲခေါင်သတင်းဌာနကို ပြောပါတယ်။
နိုင်ငံတကာ အနေနဲ့ ဒေါ်အောင်ဆန်းစုကြည် ကို မြန်မာ့နိုင်ငံရေး အကြပ်အတည်း ဖြေရှင်းနိုင်ဖို့ တစ်ခုတည်းသော အဖြေလို့ ယူဆထားတာကြောင့် စစ်ကောင်စီက တော်လှန်ရေး အင်အားစုတွေကို ချိနဲ့သွားဖို့၊ နိုင်ငံရေးနဲ့ စီးပွားရေးအရ ထွက်ပေါက်ရဖို့ အသုံးချနေတာ ဖြစ်တယ်လို့ သူကဆိုပါတယ်။
“စစ်ကောင်စီမှာက တော်လှန်ရေး အင်အားစုတွေ ချိနဲ့သွားအောင် ဒေါ်စုကို ပထမအကြိမ် ထိုင်းနိုင်ငံခြားရေး ၀န်ကြီးနဲ့ တွေ့တယ်ဆိုပြီး ထုတ်သုံးတယ်။ အဆင်မပြေတော့ အခုတစ်ခါထပ်ပြီး နေအိမ်အကျယ်ချုပ်ထားမယ်၊ ပြန်လွှတ်ပေးမယ် ဆိုပြီး သတင်းလွှင့်နေတယ်လေ။ အာဆီယံ နိုင်ငံတွေကလည်း တွေ့ခွင့် တောင်းထားတယ်။ ပေးတွေ့မလား၊ မတွေ့ဘူးလား ဆိုတာတော့ ကြည့်ရမယ်” လို့ စစ်ကောင်စီနဲ့ နီးစပ်သူ သတင်းရင်မြစ်က ပြောပါတယ်။
ဒီကနေ့မှာတော့ AFP သတင်းဌာနက အမျိုးသား ဒီမိုကရေစီ အဖွဲ့ချုပ်-NLD ပါတီ တာ၀န်ရှိသူ တစ်ဦးကို ကိုးကားပြီး ဒေါ်အောင်ဆန်းစုကြည်နဲ့ လွှတ်တော် ဥက္ကဌ ဦးတီခွန်မြတ် တို့ တွေ့ဆုံကြောင်း တရုတ်အစိုးရရဲ့ အာရှရေးရာ အထူးကိုယ်စားလှယ် Deng Xijuan နဲ့လည်း တွေ့ဆုံဖို့ ရှိတယ်လို့ သတင်း ဖော်ပြထားပါတယ်။
ဇူလိုင်လ ၂၄ ရက် ကလည်း ဒေါ်အောင်ဆန်းစုကြည် ကို စစ်ကောင်စီ နေပြည်တော် အကျဥ်းထောင်ထဲက ထုတ်ပြီး နေပြည်တော်က ၀န်ကြီးအဆင့် နေထိုင်တဲ့ အဆင်မြင့် အိမ်ရာတစ်ခုကို ပြောင်းရွေ့ထားတယ်လို့ AFP သတင်းဌာနက ရေးသားထားပေမဲ့ သီးခြား အတည်မပြုနိုင်သေးပါဘူး။
ဒီလို သတင်းတွေ လွှင့်နေတာဟာ နိုင်ငံရေး သာမက စီးပွားရေးအရပါ ဒေါ်အောင်ဆန်းစုကြည် ကို အသုံးချပြီး စစ်ကောင်စီက ထွက်ပေါက်ရှာနေတာ ဖြစ်တယ်လို့ စီးပွားရေးပညာရှင် တစ်ဦးက သုံးသပ် ပြောဆိုထားပါတယ်။
လက်ရှိ ဒေါ်အောင်ဆန်းစုကြည် ကို စစ်ကောင်စီက နေအိမ်အကျယ်ချုပ် ထားမယ်လို့ သတင်းတွေ ထွက်ပေါ်နေတာနဲ့ ပတ်သက်ပြီး အမျိုးသား ညီညွတ်ရေး အစိုးရ-NUG၊ ကာကွယ်ရေး၀န်ကြီးဌာန၊ ဒုတိယ အတွင်း၀န် ဦးမောင်မောင်ဆွေက အင်တာဗျူး တစ်ခုမှာ အခုလို ပြောဆိုထားပါတယ်။
“အမေ့ (ဒေါ်အောင်ဆန်းစုကြည်) ကို နေအိမ်အကျယ်ချုပ် ထားမယ် ဆိုတာကလည်း စေတနာရှိလွန်းလို့တော့ မဟုတ်ပါဘူး။ နိုင်ငံရေးအရ သွေးခွဲချင်တယ်။ အမေ မပြောတဲ့ စကားကို ပြောပါတယ် ဆိုပြီး ပြောပါတယ် လုပ်မယ်။ ပြောပါတယ် ဆိုတော့လည်း ဘယ်မှာလဲ အသံဖိုင်ပြဆိုတော့လည်း မပြနိုင်ဘူး။ တကယ်သာ အဲ့အသံဖိုင် ရှိကြည့်ပါလား။ စကစ ထဘီ အလံထူပြီးတော့ ကမ္ဘာပတ် ကြွားနေပြီ။ နိုင်ငံတကာမှာ ထွက်ပေါက် ပိတ်နေတယ်။ ဘယ်နိုင်ငံကမှ တရား၀င် အသိအမှတ် မပြုဘူး။ သူတို့ (စစ်ကောင်စီ) အင်မတန် အားကိုးပါတယ် ဆိုတဲ့ တရုတ်တို့၊ ရုရှား တို့တောင်မှာ အသိအမှတ် မပြုဘူး” လို့ ဦးမောင်မောင်ဆွေက ပြောဆိုထားပါတယ်။
နိုင်ငံတော် အတိုင်ပင်ခံ ဒေါ်အောင်ဆန်းစုကြည် ဟာ စစ်တပ် အဏာသိမ်းတဲ့ ပြီးခဲ့တဲ့ ၂၀၂၁ ခုနှစ်၊ ဖေဖော်၀ါရီ ၁ ရက်နေ့ ကတည်းက ဖမ်းဆီးခံခဲ့ရတာ ဖြစ်ပါတယ်။
MK-007
#MeKongNews
#အာဆီယံ
#ဒေါ်အောင်ဆန်းစုကြည်
#စစ်ကောင်စီ
