မဲခေါင်၊ အောက်တိုဘာ ၂၇
ရှမ်းပြည်နယ်မြောက်ပိုင်း၊ နမ့်ခမ်း-နမ့်ဖတ်ကာလမ်းကြားက စစ်ကောင်စီတပ်နဲ့ ပြည်သူ့စစ်တပ်စခန်း ၂ ခုကို တအာင်းအမျိုးသားလွတ်မြောက်ရေးတပ်မတော်- TNLAတပ်က ဒီနေ့မနက် ၉ နာရီဝန်းကျင်မှာ သိမ်းပိုက်နိုင်ခဲ့တယ်လို့ ဒေသခံတွေက ပြောပါတယ်။
ဒီကနေ့ အောက်တိုဘာလ ၂၇ ရက်နေ့ မနက် ၄ နာရီဝန်းကျင်ကစပြီး စစ်ကောင်စီတပ်နဲ့ ပြည်သူ့စစ်တို့ ပူးပေါင်းနေထိုင်တဲ့ ၁၂မိုင် ပြည်သူ့စစ် စခန်းနဲ့ မိုက်ခရိုဝိတ်တပ်စခန်း ၂ ခုကို တိုက်ခိုက်သိမ်းပိုက်ခဲ့တာဘဲ ဖြစ်ပါတယ်။
” မနက်အစောကတည်းက တိုက်နေတာ အခုတော့ သိမ်းနိုင်ပြီ။ မနေ့ညထဲက TNLAက အဲစခန်းကိုသိမ်းဖို့ အင်အားအများနဲ့ တက်သွားတာတွေ့တယ်။ အခုတော့ ငြိမ်နေပြီ “လို့ တိုက်ပွဲဖြစ်ပွားရာနဲ့ နီးစပ်တဲ့ အမျိုးသမီးတစ်ဦးက ပြောပါတယ်။
ဒီစခန်းသိမ်း တိုက်ပွဲမှာ စစ်ကောင်စီတပ်နဲ့ ပြည်သူ့စစ်ဘက်က ထိခိုက်သေဆုံးမှု အများအပြားရှိသလို TNLAဘက်က ထိခိုက်ဒဏ်ရာရသူရှိပေမယ့် အတိအကျတော့ မသိရသေးဘူးလို့လည်း ဆိုပါတယ်။
စစ်ကောင်စီတပ်စခန်း ၂ ခု သိမ်းပိုက်ခံရချိန် တစ်ပြိုင်နဲ့ နမ့်ခမ်းမြို့ သာယာကုန်းရပ်ကွက်အနီးမှာ ရှိတဲ့ စစ်ကောင်စပ်အထိုင်ချ တပ်စခန်းသစ်မှာလည်း ပစ်ခတ်ခံခဲ့ရတယ်လို့ နမ့်ခမ်းမြို့ခံတွေက ပြောပါတယ်။
ဒါ့အပြင် တရုတ် – မြန်မာနယ်စပ် မုံးကိုးမြို့နဲ့ ဖောင်းဆိုင်ကြားက စစ်ကောင်စီတပ်စခန်းတွေကို MNDAAတပ်က ဒီနေ့မနက် ၄ နာရီဝန်းကျင်မှာ ဝင်ရောက်တိုက်ခိုက်ခဲ့ပါတယ်။
အဲဒီတိုက်ခိုက်မှုဟာ ၈ နာရီခွဲဝန်းကျင်အထိ တိုက်ပွဲဖြစ်ပွားခဲ့ပြီး နှစ်ဖက်တပ်ရဲ့ ထိခိုက်သေဆုံးမှု အတိအကျကိုတော့ လက်ရှိအချိန်ထိ မသိရသေးပါဘူး။
ဒီနေ့မှာတော့ ရှမ်းပြည်နယ် မြောက်ပိုင်း၊ မုံးကိုး၊ ဖောင်းဆိုင်၊ မန်းယန်၊ နမ့်ခမ်း၊ စခန်းသစ်ကုန်း၊ နမ့်ဖတ်ကာ၊ ကွတ်ခိုင်၊ မုံးစီး၊ သိန္နီ ရေပူ၊ လားရှိုး ခမရ (၆၈) နဲ့ (၄၁) လောက်ကိုင်၊ ချင်းရွှေဟော် စတဲ့ စစ်ကောင်စီ စခန်းတွေကို ကိုးကန့် MNDAA ၊ မြောက်ပိုင်းမဟာမိတ် ညီနောင်အဖွဲ့နဲ့ PDF ပူးပေါင်းအဖွဲ့တို့က တပြိုင်ထဲ ထိုးစစ်ဆင် တိုက်ခိုက်နေတာပါ။
CJ – 014
#MeKongNews
#မုံးကိုး
#နမ့်ခမ်း
#1207
#TNLA
#MNDAA
#စစ်ကောင်စီ
