မဲခေါင်၊ ဇူလိုင် ၂၅
ရှမ်းပြည်နယ် တောင်ပိုင်း၊ ရွှေညောင်မြို့နယ်၊ အင်းလေး အနောက်ကန်ပတ်လမ်းပေါ်ရှိ ရေပယ်ကျေးရွာ အနီးမှာ စစ်ကောင်စီက လူတစ်ဦးကို ပစ်သတ်ပြီးတဲ့နောက် ကားတွေကို မနက် ၅ နာရီမှ ညနေ ၅ နာရီအထိသာ ဖြတ်သန်းခွင့် ပြုတော့တယ်လို့ ဒေသခံတွေက ပြောပါတယ်။
ဇူလိုင်လ ၂၃ ရက်နေ့မှာ တောင်လေးလုံးဘက်ကလာတဲ့ SURF ကားတစ်စီးကို ရေပယ်ရွာ အနီး စစ်ကောင်စီ ဂိတ်က ပစ်ခတ်လို့ ကားပေါ်ပါလူ ၂ ဦးအနက် တစ်ဦးသေဆုံးပြီး တစ်ဦး ထွက်ပြေး လွတ်မြောက်ခဲ့ပါတယ်။
အဲ့ဒီဖြစ်စဉ် ဖြစ်ပြီးနောက် စစ်ကောင်စီတပ်ဟာ အင်းလေး အနောက်ကန်ပတ်လမ်းပေါ်မှာရှိတဲ့ ညောင်ရွှေ – ခေါင်တိုင် – တောင်လေးလုံး လမ်းဆုံဂိတ်ကို ကားဖြတ်သန်းခွင့် ကန့်သတ်လိုက်တာ ဖြစ်ပါတယ်။
“မနေ့က စပြီး ကန့်သတ်လာတာဗျ။ မနက် ၅ ကနေ ညနေ ၅ နာရီအထိပဲ ပေးဖြတ်မယ် အဲ့အချိန်တွင်း မဟုတ်ရင် မပေးဖြတ်ဘူး။ ရှိတဲ့နေရာမှာပဲ နေရမယ်လို့ ကားသမားတွေကို စစ်ကောင်စီဂိတ်က ပြောတာဗျ။ အဲ့ဒီ ပစ်ခတ်မှု ဖြစ်ပြီးတော့ အခုလို ကန့်သတ်လာတာ ဖြစ်တယ်ဗျ” လို့ အင်းလေး ဒေသခံ တစ်ဦးက ပြောပါတယ်။
ပစ်ခတ်မှု ဖြစ်ပြီးနောက် စစ်ကောင်စီ ဂိတ်ကို ဖြတ်သန်းတဲ့ကားတွေ တစ်စီး ၂ သောင်းမှ ၃ သောင်းအထိ ငွေတောင်းတယ်လို့လည်း နောက်ထပ် ဒေသခံ တစ်ဦးက ပြောပါတယ်။
“မဆီမဆိုင် အဲလိုဖြစ်ပြီးတော့ ကားတွေကို တစ်စီး ၂ သောင်း ၃ သောင်း တောင်းတယ်တဲ့ဗျာ။ ထွက်ပြေး လွတ်မြောက်တဲ့ တစ်ယောက်ကိုလည်း ကားနဲ့ကော လမ်းလျှောက်ပြီးတော့ကော သူတို့ လိုက်ရှာတာ မတွေ့သေးဘူး” လို့ သူကပြောပါတယ်။
ဇူလိုင်လ ၂၃ ရက်နေ့က ဖြစ်ပွားခဲ့တဲ့ ပစ်ခတ်မှုဟာ PDF တွေက ကားနဲ့ ဂိတ်ကို ဖြတ်ဖို့ကြိုးစားလို့ ပစ်ခတ်တာလို့ စစ်ကောင်စီက ဒေသတွင်း သတင်းလွှင့်ထားတယ်လို့ ဒေသခံတွေက ပြောပါတယ်။
ဒါပေမယ့် အပစ်ခံရသူတွေဟာ PDF တွေ ဟုတ်မဟုတ် မသိရပေမယ့် တောင်လေးလုံး ထောင်ကို ဖောက်ပြီး ထွက်ပြေးလာတဲ့ လူတွေလို့ သတင်းထွက်သလို စစ်ကောင်စီ တပ်ပြေးတွေလို့လည်း သတင်းထွက်တယ်လို့ ဒေသခံတွေက ပြောပါတယ်။
အပစ်ခံရတဲ့သူတွေနဲ့ ပတ်သက်ပြီး မဲခေါင်သတင်းဌာန အနေနဲ့ သီးခြား အတည်မပြုနိုင်သေးပါဘူး။
“တောင်လေးလုံး ထောင်ကနေ ဖောက်ပြေးလာတဲ့ သူတဲ့ဗျာ။ ခေါင်းပွင့်ပြီး သေသွားတယ်တဲ့ဗျာ။ အဲတာကို စစ်ခွေးတွေက PDF တွေ ကားနဲ့ဖြတ်လို့ ပစ်တာလို့ သတင်းလွှင့်ထားတယ်ဗျာ။ သူတို့လူ ထွက်ပြေးတယ်လို့လည်း ပြောနေကြ တယ်ဗျာ” လို့ အင်းလေး ဒေသခံ တစ်ဦးက ပြောပါတယ်။
စစ်ကောင်စီတပ်ဟာ ညောင်ရွှေမြို့နယ် အနောက်ကန်ပတ်လမ်းပေါ်မှာရှိတဲ့ ရေပယ်ရွာနဲ့ ပေါင်းပိန်းဂိတ်တွေမှာ ဂိတ်ဖွင့်လှစ်ပြီး ကားတွေကို စစ်ဆေးနေတဲ့အပြင် ကုန်တင်ကားတွေကို ငွေတောင်းနေတယ်လို့ ဒေသခံတွေက ပြောပါတယ်။
CJ-002
#MeKongNews
#ညောင်ရွှေမြို့နယ်
#အင်းလေး
#စစ်ကောင်စီ
