မဲခေါင်၊ ဧပြီ ၂၈

ရှမ်းပြည်နယ် အရှေ့ပိုင်း၊ တာချီလိတ်မြို့မှာ ညဘက် ပန်ကာ ဖွင့်အိပ်တဲ့ အမျိုးသား တစ်ဦး ဦးနှောက် သွေးကြောပြတ်ကာ ဒီကနေ့ သေဆုံးသွားတယ်လို့ ဒေသခံ တစ်ဦးက မဲခေါင်သတင်းကို ပြောပါတယ်။

“ကျွန်တော်တို့ သူ့မိသားစုဝင်တွေဆီက သိတာတော့ ညက ပန်ကာ တစ်ညလုံး ဖွင့်အိပ်တယ်လို့ ပြောတယ်။ နဂိုကလည်း အဲ့လို ဖွင့်အိပ်တတ်တဲ့ အကျင့်ကလည်း ရှိတယ်တဲ့။ မနက် ၉ နာရီလောက်ကျတော့ နှိုးတာ မရလို့ ဆေးရုံပို့တာ ဟိုရောက်တော့ ဆရာဝန်က ဆုံးနေပြီတဲ့။ ဦးနှောက်သွေးကြော ပြတ်တာလို့ ပြောတယ်” လို့ သူကပြောပါတယ်။

သေဆုံးသူဟာ တာချီလိတ်မြို့၊ ဆန်ဆိုင်း-ဝမ်မိုင် ရပ်ကွက်မှာ နေတဲ့ အသက် ၂၇ နှစ်အရွယ် အမျိုးသား ဖြစ်ပြီး လက်ရှိ မိသားစုဝင်တွေက ဈာပန ပြုလုပ်ဖို့ ပြင်ဆင်နေတယ်လို့ မြို့ခံတစ်ဦးက ပြောပါတယ်။

နိုင်ငံတစ်ဝှမ်း အပူချိန်တွေ စံချိန်တင် မြင့်တက်နေလို့ ညဘက် ပန်ကာ ဖွင့်အိပ်တတ်တဲ့ ပြည်သူတွေ အနေနဲ့ ဦးခေါင်းတည့်တည့်မှာ ပန်ကာနဲ့ လေအေးပေးစက်တွေ ဖွင့်မထားဖို့ လူမှုကူညီရေး အသင်းတွေက သတိပေးထားပါတယ်။

MK-007

#MeKongNews

#တာချီလိတ်

#ဦးနှောက်သွေးကြောပြတ်

#ပန်ကာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)