မဲခေါင်၊ ဖေဖော်ဝါရီ ၁၈
တာချီလိတ်မြို့နယ်အတွင်းက အထက (မိုင်းကိုး)မှာ ကျောင်းအုပ်ဆရာမကြီး ကျောင်းသားတွေထံကနေ လစဉ်မီတာခနဲ့ စာမေးပွဲဖြေဆိုနေကြေးများ ကောက်ခံနေကြောင်း ကျောင်းသားမိဘတွေက မဲခေါင်သတင်းဌာနကို တိုင်ကြားပြောဆိုပါတယ်။
စစ်ကောင်စီကဖွင့်လှစ်တဲ့ ဒီစာသင်နှစ်မှာ တနှစ်ပတ်လုံး စာမေးပွဲ ၄ကြိမ်ဖြေဆိုရပြီး ပထမ ၃ကြိမ်က တစ်ကြိမ်ကို ကျောင်းသားတစ်ဦး ၁၀ဘတ်(ကျပ်၈၅၀ခန့်) ကောက်ခံခဲ့ပြီး နောက်ဆုံးအကြိမ် ဖေဖော်ဝါရီလ ဒုတိယပတ်စာမေးပွဲမှာတော့ ၂၀ဘတ် (ကျပ် ၁၇၀၀ခန့်) ကောက်ခံခဲ့တယ်လို့ မိုင်းကိုးကျေးရွာအုပ်စုအတွင်းက ကျောင်းသားမိဘတစ်ဦးက မဲခေါင်ကိုပြောပါတယ်။
“နောက်ဆုံးစာမေးပွဲမှာ ၂ဆ တိုးပြီးကောက်တယ်။ ဒီလိုကောက်တာက တစ်ဦးချင်းအတွက် ဘာမှဖြစ်တဲ့ ပမာဏမဟုတ်ဘူးဆိုပေမယ့် ကျောင်းသားများတဲ့ မိဘတွေအတွက်ကျတော့ အခက်အခဲဖြစ်တယ်။ ပြီးတော့ ကျေးရွာဘက်တွေဆိုတာ မြို့ပေါ်တွေလို ဝင်ငွေကောင်းကြတာ မဟုတ်ဘူး” လို့ သူက ပြောပါတယ်။
ဒါ့အပြင် လစဉ်တိုင်းလည်း မီတာခလို့ဆိုပြီး ကျောင်းသားတစ်ဦးကို ၁၀ဘတ် ကောက်ခံသေးတယ်လို့ နောက်ထပ်ကျောင်းသားမိဘတစ်ဦးက ပြောပါတယ်။
စာမေးပွဲကြေးနဲ့ လစဉ်မီတာကြေးတွေကို ကျောင်းသားတွေဆီကနေ ကောက်ခံခွင့်မရှိသလို ရေဖိုး၊ အမှိုက်ဖိုးတွေလည်း ကောက်ခံခွင့်မရှိဘူးလို့ တာချီလိတ်မြို့နယ်အတွင်းက အခြေခံပညာကျောင်းဆရာမတစ်ဦးက မဲခေါင်ကို ပြောပါတယ်။
ဒါပေမယ့် အထက မိုင်းကိုးမှ မဟုတ်ဘဲ အခြားကျောင်းတွေမှာလည်း ကျောင်းသားတွေဆီကနေ လစဉ်အကြောင်းအမျိုးမျိုးပြပြီး ကောက်ခံနေတာမျိုး ရှိတယ်လို့ သူက ထပ်ပြောပါတယ်။
စစ်တပ်အာဏာမသိမ်းခင်ကာလက သက်ဆိုင်ရာလွှတ်တော်ကိုယ်စားလှယ်တွေကနေတဆင့် ပြည်သူတွေ နစ်နာရသမျှကို တိုင်ပြပြောပြလို့ ရပေမယ့် အခုအချိန်မှာတော့ လွတ်လပ်တဲ့သတင်းဌာနတွေကိုသာ အရဲစွန့်ပြီး ပြောနေရတယ်လို့ တာချီလိတ်ဒေသခံတွေက ဆိုပါတယ်။
MK – 004
#MeKongNews
