မိုင်းလားကုန်လမ်းကြောင်း တရားမဝင်လမ်းကြေး ပိုများလာပြီး ကုန်တင်ခတွေ ဈေးတက်
မဲခေါင်၊ မတ် ၇
ရှမ်းပြည်အရှေ့ပိုင်း၊ မိုင်းလားအထူးဒေသသို့ ကုန်ပစ္စည်းပို့ဆောင်သည့် လမ်းကြောင်းတွင် တရားမဝင်ဂိတ်ကြေး၊ လမ်းကြေးများ ပိုမိုများပြားလာပြီး ကုန်တင်ခများဈေးတက်လာကြောင်း ကုန်တင်ကားဂိတ်နှင့် ယာဥ်မောင်းများထံမှ သိရသည်။
မန္တလေးမှ မိုင်းလားသို့ ကုန်စည်ပို့သည့်လမ်းတွင် တရားမဝင်လမ်းကြေးတောင်းခံမှုများမှာ တောင်ကြီးမှ မိုင်းလားအထိရှိပြီး ယင်းထဲမှ မိုင်းပျဥ်းစုပေါင်းဂိတ်ကြေးမှာ ပိုမိုများပြားလာနေကြောင်း ယာဉ်မောင်းများထံမှ သိရသည်။
ယခုလပိုင်းအတွင်း ကုန်ပါသည့် ကုန်ကားတစ်စီးလျှင် ကျပ် ၃သိန်းမှ ၃သိန်းခွဲ၊ ကုန်မပါသည့် ကုန်ကားတစ်စီးလျှင် ကျပ် ၅ သောင်းမှ ၈ သောင်းအထိ ပိုမိုတောင်းခံလာကြောင်း ယာဉ်မောင်းတစ်ဦးက ပြောသည်။
“ကျနော်တို့က ဂျူတီစာရွက်တွေပြတာ၊ ဘာမှလာမပြနဲ့ သတ်မှတ်ထားတဲ့ငွေကိုပဲ ပေးဖို့တောင်းတယ်။ မပေးနိုင်ရင် လမ်းဘေးကားရပ်ထားလို့ပြောတာ၊ ဒီလိုပဲ ဟိုပုံးတိုးဂိတ်အကျော်က လုံခြုံရေးတပ်ဂိတ်လည်းအတူတူပဲ” ဟု ၎င်းက ပြောသည်။
မိုင်းလားသို့ လာသည့် ကုန်တင်ကားများမှာ အပြန်ကုန်မရသဖြင့် ရက်ကြာစောင့်ဆိုင်းရသည်များရှိကြောင်းလည်း ယာဉ်မောင်းများထံမှ သိရသည်။
ယင်းအခြေအနေများကြောင့် ယခင်က မန္တလေး – မိုင်းလား ကုန်တင်ခမှာ ကားတစ်စီးလျှင် ကျပ် ၈၅ သိန်းသာရှိရမှ ယခုအခါ ကျပ်သိန်း ၁၀၀ အထိရှိလာကြောင်း မန္တလေးကုန်တင်ယာဉ်ဂိတ်တစ်ခုမှ တာဝန်ရှိသူက ပြောသည်။
“အရင် မန္တလေးက မိုင်းလားကိုကုန်ခ ၈၅သိန်းပဲရှိတာ။ ကားသမားတွေ အပြန်ကုန်မရလို့ မကိုက်တာနဲ့ လမ်းကြေးတွေများလာတာကြောင့် ညှိနှိုင်းပြီး သိန်း၁၀၀အထိ ပေးလာတာ” ဟု ၎င်းက မတ်လ၆ရက်တွင် မဲခေါင်ကိုပြောသည်။
မန္တလေးမှ မိုင်းလားအထိ ၁၂ဘီး ကုန်ဂျူတီအပြည့်တန် ၁၇တန်အတွက် တခြမ်းခါလီစျေး ကျပ်သိန်း၁၀၀ရှိပြီး ချောင်းဦးဘက်တွင် သိန်း၁၅၀ရှိကာ ကျောက်ဆည်၊ မိတ္ထီလာတို့မှ တင်ပို့ပါက ကျပ်သိန်း၉၀အထိ ရှိလာကြောင်း၊ ပဲခူးတိုင်းဘက်မှကားခ ကျပ် သိန်း ၁၇၀ရှိပြီး သွားတင်ရသည့် နေရာဒေသအလိုက်ကားခအတိုးအလျော့ရှိကြောင်း ယင်းတာဝန်ရှိသူက ပြောသည်။
ယင်းသို့ ကုန်စည်ပို့ဆောင်ခများ တိုးရသော်လည်း တရားမဝင်လမ်းကြေးများ များပြားလာခြင်းအပြင် အပြန်ကုန်ရရန် ခက်ခဲခြင်းကြောင့် ယာဉ်မောင်းများအတွက်မူ ငွေပိုကျန်ခြင်းမရှိကြောင်း ကုန်တင်ယာဉ်မောင်းများက ပြောသည်။
လတ်တလောတွင် မိုင်းလားသို့ ကျောက်ဆည်မှ ငှက်ပျောတင်ပို့ပြီး မန္တလေးမှ ရာဘာ၊ မြစ်သားဘက်ကြက်သွန်နီနှင့် ဒေသအစုံမှ ဖရဲသခွားများ တင်ပို့နေကြောင်း သိရသည်။
မိုင်းလားအပြန်ကုန်မရသူများအနေဖြင့် နမ့်စန်မှကျောက်ဆည်အထိ ကျောက်မီးသွေးတစ်တန် တစ်သိန်းနှုန်းဖြင့် ဝင်တင်နိုင်ကြောင်း ကုန်တင်ယာဉ်မောင်းများထံမှ သိရသည်။
#MeKongNews
