ကြွက်ဘေး ကျရောက်သဖြင့် ကျိုင်းတုံမြို့နယ် တောင်ပေါ်ဒေသ၌ ဆန်ထွက်ရှိမှု သိသိသာသာကျဆင်းလာ

မဲခေါင်၊ ဖေဖော်ဝါရီ ၂၅

ရှမ်းပြည်အရှေ့ပိုင်း၊ ကျိုင်းတုံမြို့နယ်၊ တောင်ပေါ်ဒေသ ၇၀ ရာခိုင်နှုန်းခန့် တောင်ယာစိုက်ခင်းများ ဆန်စပါးထွက်နှုန်းသိသိသာသာကျဆင်းသည်အထိ ကြွက်ဘေးကျရောက်နေကြောင်း တောင်ပေါ်ဒေသ၌ ပရဟိတလုပ်ဆောင်နေသည့်ဆရာဝန် ဒေါက်တာ နန်းမာလာဝမ်းကပြောသည်။

ဒေါက်တာ နန်းမာလာဝမ်းသည် တောင်ပေါ်ဒေသကို ၂၀၁၈ ခုနှစ်ကတည်းက ပရဟိတခရီးစဉ်များသွားရောက်ခဲ့သူဖြစ်သည်။ တောင်ယာဆန်ထွက်ရှိသော ဒေသဖြစ်၍ ဒေသခံများ စားနပ်ရိက္ခာအတွက် ဆန်လိုအပ်ခြင်းမရှိသဖြင့် တစ်ကြိမ်တစ်ခါမျှ ဆန်သယ်ဆောင်ရခြင်း မရှိခဲ့သော်လည်း ယခုအခါ တောင်ယာစိုက်ခင်းများ ကြွက်ဖျက်ဆီးသဖြင့် ဆန်လိုအပ်ချက် မြင့်မားလာပြီဟုပြောသည်။

“ ဒီနှစ်တော့ တောင်ပေါ်မှာ စိုက်ပျိုးတဲ့ စပါးတွေ၊ ပြောင်းတွေ အခြား ကောက်ပဲသီးနှံတွေကို ကြွက်စားကုန်တာကြောင့် အရမ်းကို ခက်ခဲကုန်ကြပြီ၊ တောင်ပေါ်မှာက ပိုက်ဆံ ၅၀၀၀၊ ၁၀၀၀၀ ရဖို့မလွယ်ပါဘူး၊ မိသားစုဦးရေများရင် ဆန်ဝယ်စားဖို့ အရမ်းခက်သွားပါပြီ၊ ကျွန်မရဲ့နောက်လခရီးစဉ်အတွက် Data တွေကောက်တော့ ခုလိုပဲပြောလာပါတယ်၊ ခုချိန်မှာ သူတို့အတွက် အရေးကြီးလိုအပ်ချက်က ဆန်ဖြစ်နေတယ်” ဒေါက်တာ နန်းမာလာဝမ်းကပြောသည်။

ယခု နှစ်တွင် ကြုံတွေ့ရသည့်ကြွက်ဘေးကျရောက်သည့် ကျေးရွာများအနက် ကျေးရွာပေါင်း ၃၀ ကျော် အတွက် အလှူရှင်များကိုယ်စား ဒေါက်တာ နန်းမာလာဝမ်းက ဆန်များပေးပို့နေသည်။

ကျိုင်းတုံမြို့နယ်၊ တောင်ပေါ်ဒေသ၇၀ ရာခိုင်နှုန်း ကြွက်ဘေးကျရောက်နေပြီး ပန်ကြူ၊ မိုင်းအင်း၊ မိုင်းလပ်၊ လွိုင်မွေ၊ တာပင်း၊ ဝမ်တာပုံပင်းတောက်၊ ကတ်ထိုက်၊ မိုင်းခွန်၊ မိုင်းပတ်၊ မိုင်းပန်၊ စသည့် ကျေးရွာအုပ်စုများ ကြွက်ဘေးကျရောက်နေသည်။

အစာကွင်းဆက်အရ ကြွက်သည် မြွေ၏သားကောင်ဖြစ်၍ မြွေရှားပေါသောဒေသ သို့မဟုတ် မြွေကို ဟင်းလျှာအဖြစ်အဓိက စားသုံးသောဒေသ၊ သို့မဟုတ် တခြားနည်းလမ်း တစ်မျိုးမျိုးကြောင့် မြွေရှားပါးလာသည့်ဒေသ၌ ယေဘူယျအားဖြင့် ကြွက်ပေါများလေ့ရှိသည်။

မဟာ
#MeKongNews

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)