နမ့်စန်မြို့မှာ ဆူပူမှုအကြောင်းပြချက်နဲ့ အမျိုးသားငါးဦး စစ်သင်တန်း ပို့ဆောင်ခံရ
မဲခေါင်၊ ဒီဇင်ဘာ ၂၃
ရှမ်းပြည်တောင်ပိုင်း၊ နမ့်စန်မြို့မှာ ဒီဇင်ဘာ ၁၉ ရက်ကနေ ၂၁ ရက်အထိ ၃ ရက်အတွင်း စစ်ကောင်စီက အမျိုးသား ငါးဦးကို ဆူပူမှုအကြောင်းပြချက်နဲ့ ဖမ်းဆီးကာ စစ်မှုထမ်းသင်တန်း တက်ရောက်ဖို့ ကျိုင်းတုံမြို့ကို ပို့ဆောင်လိုက်တယ်လို့ မိသားစုဝင်တွေထံကနေ သိရပါတယ်။
နမ့်စန်မြို့၊ အမှတ် ၃ ရပ်ကွက်နေ ဦးမြင့်နိုင်၊ ကိုအောင်မျိုး၊ ကိုစန်းမောင်ဝင်း၊ ကိုမျိုးတင့်၊ ကိုကျော်စိန်တို့ကို ရပ်ကွက်ဥက္ကဌ ဦးထွန်းနဲ့ ထွေအုပ်စာရေးဝန်ထမ်း ဦးကျော်မိုးဝင်း၊ စစ်ကောင်စီတပ်၊ ရဲတပ်ဖွဲ့တို့က ဆူပူမှုနဲ့ ဖမ်းဆီးသွားတယ်လို့သိရပါတယ်။
သူတို့ဟာ အိမ်တွင်းရေးပြဿနာနဲ့ မိသားစု စကားများတာကို ဆူပူမှုနဲ့ဖမ်းဆီးတာလို့ မိသားစုဝင်နဲ့ နီးစပ်သူကပြောပါတယ်။
ဖမ်းဆီးခံရသူတွေကို ကျိုင်းတုံမြို့သို့ စစ်မှုထမ်းသင်တန်းတက်ရောက်ဖို့ ပို့ဆောင်လိုက်ပြီလို့ ထွေအုပ်စာရေး ဦးကျော်မိုးဝင်းဆိုသူက မိသားစုဝင်တွေထံ ဒီဇင်ဘာ ၂၂ ရက်ကဖုန်းဆက်ပြောပြီး ရဲစခန်းကို အဝတ်အစားနဲ့ အသုံးအဆောင်တွေ ထည့်ပေးဖို့ ပြောလာတယ်လို့ ဆိုပါတယ်။
“ ရပ်ကွက်လူကြီး ဦးထွန်းကို အိမ်ကလူတွေက ဖုန်းတွေဆက်၊ တောင်းတောင်းပန်ပန်နဲ့ပြောလည်း လုံးဝမရဘူး။ တွေ့ဖို့ အိမ်အထိသွားတော့ အပြင်ရောက်နေတယ်လို့ ပြောတယ်။ ရှိတဲ့နေရာလိုက်လာခဲ့ပါ့မယ်ပြောလည်း မရဘူး။ အခုနောက်ဆုံး ဖုန်းပါစက်ပိတ်သွားတယ်”လို့ မိသားစုဝင်တွေနဲ့ နီးစပ်သူကပြောပါတယ်။
ဖမ်းဆီးခံရ ဦးမြင့်နိုင်မှာ အသက်၃၂နှစ်ရှိပြီ ဖြစ်ပြီး ကျန်လေးဦးမှာလည်း အသက် ၃၀ နဲ့ ၄၀ အရွယ်ကြားရှိသူတွေ ဖြစ်သလို ဇနီးမယားတွေနဲ့ သားသမီးရှိသူတွေဖြစ်ပါတယ်။
အခုနှစ်၊ ဧပြီလ ဒုတိယပတ်တုန်းက နမ့်စန်မြို့မှာ မူးယစ်ဆေးစွဲနေသူတွေထဲက လူဦးရေ ၃၀ ကျော်ကိုစစ်မှုထမ်းဖို့ အဓမ္မဖမ်းဆီးခဲ့ပါသေးတယ်။ အဲ့ဒိနောက်ပိုင်းမှာလည်း စစ်မှုထမ်းဖို့အမည်ပါသူတွေကို စစ်သင်တန်းပို့ဆောင်တာတွေလည်း ပြုလုပ်နေဆဲပါ။
နိုင်ငံတဝန်းလုံးမှာ စစ်မျက်နှာဖွင့်ထားရတဲ့ စစ်ကောင်စီတပ်က စစ်ရေးကျရှုံးနေသလို အသေအပျောက် များပြားနေတာကြောင့် မြို့ပေါ်ရပ်ကွက်နဲ့ ကျေးလက်တောရွာတွေမှာ လူငယ်နဲ့ လူလတ်ပိုင်းအရွယ် အမျိုးသားတွေကို ရရာနည်းလမ်းနဲ့ ဖမ်းဆီးပေါ်တာဆွဲပြီး စစ်မှုထမ်းသင်တန်းတက်ရောက်စေကာ ရှေ့တန်းကို ပို့ဆောင်နေတာ ဖြစ်ပါတယ်။
CJ-003
#MeKongNews
