မိုင်းဖုန်းဆရာတော် သက်တော် ၆၁နှစ်ပြည့် မွေးနေ့ပွဲကို ၆ ရက်ကျင်းပမယ်
မဲခေါင်၊ ဒီဇင်ဘာ ၁၆
ရှမ်းပြည်အရှေ့ပိုင်း၊ တာချီလိတ်မြို့နယ်၊ မိုင်းဖုန်း(က)မှာ သီတင်းသုံးတော်မူတဲ့ သဒ္ဓမ္မဇောတိကဓဇ အဂ္ဂမဟာ ကမ္မဋ္ဌာနာစရိယ မိုင်းဖုန်းဆရာတော် ဘဒ္ဒန္တဉာဏသံဝရရဲ့ ဝိဇာတမွေးနေ့ပွဲတော်ကို ၂၀၂၅ ခုနှစ်၊ ဇန်နဝါရီလ ၁ ရက်ကနေ ၆ ရက်အထိ ကျင်းပပြုလုပ်သွားမယ်လို့ ပွဲတော်ကျင်းပရေးအဖွဲ့ထံက သိရပါတယ်။
ဝိဇာတ မွေးနေ့ပွဲတော်ရက်အတွင်း နေ့စဉ်တရားဓမ္မတွေကို လွန်လိန်းတရားနယ်မြေရှိ တရားဟောစင်ကနေ ဇန်နဝါရီ ၁ ရက်နဲ့၂ ရက်မှာ မနက် ၁ဝ နာရီနဲ့ညနေ ၃ နာရီခွဲတရားဟောပါမယ်၊ ၃ရက် မနက် ၁၀ နာရီမှာ နှစ်(၇၀)ပူတာအိုစေတီတော်ကို ထီးတော် တင်လှူမှာပြီး ညနေ ၃ နာရီခွဲမှာ တရားဟောပါမယ်၊ ၄ရက် မနက်မှာတော့ ဝိဇာတမွေးနေ့မင်္ဂလာ ကျင်းပပြုလုပ်မှာဖြစ်ပြီး ညနေ ၃ နာရီမှာ တရားဟောပါမယ်၊ ၅ ရက်မှာ ဆရာတော်ကြီး ဝစိပိတ်အဓိဌာန်ဝင်မှာဖြစ်ပြီး ၆ ရက်မှာတော့ လွန်းလိုင်းဓမ္မာရုံကြီးမှာ မွေးနေ့ပွဲအလှူကို ရေစက်ချအမျှဝေ သာဓုအနုမောဒနာ ခေါ်တော်မူမယ်လို့ သိရပါတယ်။
“ ဆရာတော်ကြီးကမွေးနေ့ကစပြီး အဓိဌာန်ဝင်တတ်တာဖြစ်လို့ ၄ရက်နေ့မှာ ရက်ကြို ပြုလုပ်တာပါ” လို့ မိုင်းဖုန်းဆရာတော်ကြီးရဲ့ လက်ထောက်ဆရာတော် ဦးဉာဏသီရိက မဲခေါင်သတင်းဌာနကို မိန့်ကြားပါတယ်။
ဆရာတော်အနေနဲ့ ပြုနေကြအတိုင်း မိုင်းဖုန်းဆရာတော်ကြီးတရားပွဲတွေရဲ့ ရှေ့ကြို ၊ နောက်ဆင့်အနေနဲ့ တရားဓမ္မတွေ ဟောကြားသွားဖို့ရှိတယ်လို့လည်း မိန့်ကြားပါတယ်။
“ရန်ကုန်မှာ ရွှေတိဂုံ၊ မန္တလေးမှာ မဟာမုနိ၊ ပူတာအိုမှာ ကောင်းမှုလုံဆိုပြီး ဆရာတော်ကြီးက သူ့အသက် ၇၀ အထိမ်းအမှတ်အနေနဲ့ တည်တာပါ၊ ကြိုတည်တာပေါ့ ကြားထဲမှာပျံလွန်တော်မမူခင် ထီးတော်တင်တာပါ” လို့ဦးဉာဏသီရိက မိန့်ကြားပါတယ်။
“ ဆရာတော်ကြီး က ၃ရက် ၃လ အဓိဌာန် ဝင်သလို ၅ရက် တစ်ပတ်ဝင်တာလဲရှိတယ်၊ ထိုင်းနိုင်ငံ၊ လန်ပန်းခရိုင်က ငါးအိုဆုမှာ ဝင်တတ်သလို မိုင်းဖုန်းတောင်ထိပ်မှာလည်း တစ်ပါးတည်း အဓိဌာန်ဝင်တတ်ပါတယ်”လို့ဆရာတော်က မိန့်ကြားပါတယ်။
ဝိဇာတမွေးနေ့ ရက်များအတွင်း အနယ်နယ်အရပ်ရပ်က မွေးနေ့ပွဲလာ ပရိတ်သတ်တွေအတွက် စတုဒီသာ စားသောက်စရာများကိုအလှူရှင်တွေက ဧည့်ခံကျွေးမွေးသွားမှာဖြစ်တယ်လို့ သိရပါတယ်။
ဆရာတော်ကြီး မွေးနေ့ပွဲတော်အတွင်း မွေးနေ့မင်္ဂလာအထိမ်းအမှတ် ပေးလှူတာတွေ၊ စတုဒီသာကျွေးမွေးတာတွေ၊ ပုံတော်၊ ပုတီး၊အဆောင် စတာတွေ လှူဒါန်းဖို့ အလှူရှင်တွေအခုကတည်းက စုစည်းပြင်ဆင်နေကြပြီလို့ သိရပါတယ်။
ဆရာတော်ကြီးရဲ့မွေးနေ့ပွဲတော်ကို ဆရာတော်ကြီး သီတင်းသုံးရာနေရာများမှာ နှစ်စဉ်ကျင်းပမြဲဖြစ်ကာ ပြည်တွင်းကသာမက ထိုင်း၊ လာအို ၊ တရုတ်၊ ဘူတန်စတဲ့နိုင်ငံတွေက ဆရာတော်ကြီးကို ကြည်ညိုကြတဲ့ ရဟန်း၊ သံဃာ၊ လူ အများအပြားလာရောက် ဖူးမျှော်ကြတယ်လို့ သိရပါတယ်။
MK-012
#MekongNews
