ရှမ်းပြည်နယ် မြောက်ပိုင်းနဲ့ ထိစပ်နေတဲ့ နမ့်တစ်၊ မန်မဆိုင်နဲ့ မိုင်းမော ဒေသက “ဝ” နယ်စပ်ဂိတ်တွေကို ဒီကနေ့ နိုဝင်ဘာ ၇ ရက်က စတင်ပြီး ပြန်ဖွင့်ပေးနေပြီလို့ သိရပါတယ်။
အခြေအနေ အမျိုးမျိုးကြောင့် ပိတ်ထားတဲ့ “ဝ”နယ်စပ်ဂိတ်တွေထဲက ရှမ်းပြည်နယ်မြောက်ပိုင်း ဘက်က ဂိတ်တွေ ပြန်ဖွင့်တာ ဖြစ်တယ်လို့ “ဝ” ဒေသ ပြန်ကြားရေးအဖွဲ့ တာဝန်ရှိသူ တစ်ဦးက မဲခေါင်သတင်းကို ပြောပါတယ်။
“ရှမ်းမြောက်နဲ့ ထိစပ်တဲ့ ဂိတ်တွေကို ပြန်ဖွင့်လိုက်ပြီ။ ကျန်တာကတော့ ထုတ်ပြန်ထားတဲ့ အတိုင်းပါပဲ” လို့ ၎င်းက ပြောပါတယ်။
“ဝ” ဒေသကို ဝင်ရောက်လာမယ့်သူတွေ အနေနဲ့ ပြည်နယ် ပြင်ပ ဆက်ဆံရေးရုံးတွေမှာ စာရင်း ပေးသွင်းနိုင်ပြီး မိမိနေထိုင်တဲ့ သက်ဆိုင်ရာ စစ်ကောင်စီ တိုင်းစစ်ဌာနချုပ်တွေက စိစစ်ခွင့်ပြုရင် ဝင်ရောက်နိုင်တယ်လို့ အသိပေးထားပါတယ်။
ဝင်ရောက်လာမယ့်သူတွေ အနေနဲ့ နယ်စပ်ဂိတ်တွေမှာ ကိုဗစ်-၁၉ ရောဂါပိုး ရှိ၊ မရှိ စစ်ဆေးခံယူပြီး စစ်ဆေးခံယူခ တရုတ်ယွမ် ၃၀ ကျသင့်တာ ပေးဆောင်ကာ ရောဂါပိုး မရှိမှသာ ဝင်ရောက်ရမှာ ဖြစ်ပါတယ်။
ကိုဗစ်-၁၉ ရောဂါပိုး တွေ့ရှိပါက နယ်စပ် Quarantine Center တွေမှာ ဆေးကုသမှု ခံယူရပြီး ကုန်ကျငွေကို မိမိတို့ကသာ ပေးဆောင်ရမှာ ဖြစ်တယ်လို့ သိရပါတယ်။
အခု ဖွင့်ပေးလိုက်တဲ့ ဂိတ်တွေကို စက်တင်ဘာလက အခြေနေ အမျိုးမျိုးကြောင့် ခေတ္တပိတ်ထားခဲ့ပြီး ဂိတ်တွေ ပြန်လည်ဖွင့်လှစ်ဖို့ စစ်ကောင်စီရဲ့ အရှေ့မြောက်ပိုင်းတိုင်း စစ်ဌာနချုပ်က အကြောင်းကြားတဲ့ အတွက် အခုလို ပြန်လည်ဖွင့်လှစ်တာ ဖြစ်တယ်လို့ သိရပါတယ်။
