မဲခေါင် စက်တင်ဘာ ၁၀
တာချီလိတ် ရပ်ကွက်အချို့က နေအိမ်ဒုတိယအထပ်ထိ ရေတက်နေတာကြောင့် နေအိမ်အတွင်းပိတ်မိနေပြီး အရေးပေါ် ကယ်ဆယ်ဖို့အတွက် လိုအပ်နေတယ်လို့ ဒေသခံတွေဆီက သိရပါတယ်။
အရေးပေါ် ကယ်ဆယ်ရေးအတွက် ထုတ်ပြန်ထားတဲ့ ဖုန်းတွေဆက်သွယ်ဖို့ ခက်ခဲနေပြီး အချို့ရေနစ်မြုပ်နေသူတွေ ရှိနေတဲ့အတွက် ကယ်ဆယ်ဖို့ လိုအပ်နေတာပါ။
“ပုန်းထွန်ထဲမှာ တစ်ချို့အိမ်တွေ အောက်ထပ် တစ်ထပ်လုံးမြုပ်သွားပြီ ။ အပေါ်ထပ်တောင် ရေဝင်နေပြီ အရေးပေါ်ကယ်ဆယ်ဖို့ လိုအပ်နေတယ်။ ကယ်ဆယ်ရေးဖုန်းတွေ ဆက်တာလဲ ဆက်မရဘူး”လို့ နေအိမ်အတွင်းပိတ်မိနေသူ တစ်ဦးက ပြောပါတယ်။
တာချီလိတ်မှာ မိုးဆက်တိုက် ရွာသွန်းနေပြီး စိုးရိမ်ရေမှတ်ကျော်လွန်ကာ ဆက်တိုက်ရေတက်နေပြီး မြို့တွင်းရပ်ကွက်အကုန်လုံးနီးပါး ရေဘေးဒုက္ခရောက်နေတာဖြစ်ပါတယ်။
ပုန်းထွန် မြို့အစွန်က ဗိုလ်ချုပ်လမ်းမပေါ် ဆယ်ပေနီးပါးထိ ရေတက်နေပြီး နေအိမ်တော်တော်များများ စိုးရိမ်နေရတဲ့အခြေအနေဖြစ်နေတာပါ။
အဓိက တောင်နံရံနဲ့ကပ်နေတဲ့ အိမ်တွေ မြေပြိုနိုင်တဲ့အတွက်လဲ စိုးရိမ်ရတယ်လို့ ဒေသခံတွေဆီက သိရပါတယ်။
“ဒီညမိုးမတိတ်ဘူးဆိုရင် ဘယ်လောက်ထိ ရေဆက်တက်မလဲမသိဘူး ရေမတက်ဘူးတဲ့နေရာတောင် ရေရောက်နေပြီ၊ တစ်ချို့ဆို ဘာမှမစားရသေးဘူး ။ တံတား(၂)မြို့တွင်းဘက် မီးဖြတ်ထားတယ်”လို့ ဒေသခံတစ်ဦးက ပြောပါတယ်။
မနေ့ညကတည်းက မိုးဆက်တိုက်ရွာသွန်းမှုကြောင့် တာလေတံတားမှာလဲ စိုးရိမ်နေရပြီး တောင်ပြိုနိုင်တဲ့အတွက် ကျိုင်းတုံ-တာချီလိတ်လမ်းမှာ သွားလို့မရတော့ဘူးလို့ ခရီးသွားသူတွေဆီက သိရပါတယ်။
MK-002
