မဲခေါင်၊ ဇူလိုင် ၄
မန္တလေးတိုင်း၊ မိုးကုတ်မြို့မှာ လတ်တလော Mytelမိုင်တဲ ဖုန်းလိုင်း တစ်မျိုးတည်းသာ ရတော့တဲ့အတွက် အလုအယက် ဝယ်ယူနေရတယ်လို့ မြို့ခံတွေက ပြောပါတယ်။
၁၀၂၇ စစ်ဆင်ရေး ဒုတိယပိုင်း စတင်တဲ့ ဇွန်လ ၂၅ ရက်နေ့ကတည်းက မိုးကုတ်မြို့မှာ ဖုန်းနဲ့ အင်တာနက်လိုင်းတွေ ပြတ်တောက်နေပြီး ရပ်ကွက်အများစုမှာ Mytel တစ်မျိုးတည်းသာ ဆက်သွယ်လို့ ရတော့တယ်လို့ ဆိုပါတယ်။
“တချို့ ရပ်ကွက်တော့ တယ်လီနော မိတစ်ချက် မမိတစ်ချက်ပေါ့။ Mytel ကတော့ 2G နေရာထားထားရင် အဆင်ပြေတယ်။ ဆင်းမ်ကတ်တွေတောင် ပြတ်သလောက် ဖြစ်နေပြီ” လို့ မြို့ခံတစ်ဦးက ပြောပါတယ်။
မိုးကုတ်မြို့မှာ လျှပ်စစ်မီး ပြတ်တောက်နေတာကြောင့် တာဝါတိုင်တွေ မလည်ပတ်နိုင်တာ ဖြစ်ပြီး အော်တိုစနစ်နဲ့ လည်ပတ်ဖို့ထည့်ထားတဲ့ ဓါတ်ဆီတွေကလည်း ကုန်ခန်းသွားတာကြောင့် ဖုန်းလိုင်းမရတော့ပေမယ့် Mytel ကတော့ ဆက်သွယ်လို့ ရနေသေးတယ်လို့ သိရပါတယ်။
မနေ့ (ဇူလိုင် ၃)က မြို့လယ်လမ်းဆုံမှာရှိတဲ့ Mytel ရုံးမှာ ဆင်းကတ်ဝယ်ယူဖို့အတွက် လူရာချီ တန်းစီစောင့်ဆိုင်းခဲ့ရပေမယ့် ဝယ်လို့ မရခဲ့ဘူးလို့ ကိုယ်တိုင်သွားရောက်ခဲ့သူ တစ်ဦးက ပြောပါတယ်။
“မိုင်တဲကတ် ရောင်းပေးတယ်ဆိုပြီး လိုင်းပေါ်တင်လို့ ရုံးရှေ့သွားတန်းစီကြတာ။ ကတ်မရှိတော့ဘူးဆိုတော့ ပြန်လာရတယ်။ လိုင်းပေါ်မှာ တင်ရောင်းနေကြတာတော့ တစ်သိန်းကျော်တယ်။ အရေးပေါ် ဆက်သွယ်ဖို့ဆိုတော့ ဝယ်နေကြတာပဲ”
မိုးကုတ်မြို့၊ တရုတ်ဘုံကျောင်းရဲ့ တောင်ပေါ်မှာတော့ ဆိုလာစနစ်နဲ့ ချိတ်ဆက်ထားတဲ့ MPT တာဝါတိုင်တစ်ခုရှိပြီး ဘုံကျောင်းနဲ့ မိုင် ၃ မိုင် ပတ်ချာလည် နေထိုင်သူတွေဟာ နေ့လည်ဘက်မှာ MPT အသုံးပြုလို့ ရနေပေမယ့် အချိန်မရွေး လိုင်းပြတ်တောက်နိုင်တယ်လို့ ဆိုပါတယ်။
လတ်တလော တိုက်ပွဲ အခြေအနေအရ မိုးကုတ် – မန္တလေးလမ်းကို ပိတ်ထားတာကြောင့် မန္တလေးဘက်ကို စစ်ဘေးရှောင်သူတွေဟာ လမ်းပေါ်မှာ ကားရာချီ ပိတ်မိနေပြီး မြို့တွင်းကိုလည်း ပြန်ဝင်လို့ မရတဲ့ အခြေအနေ ဖြစ်တယ်လို့ စောင့်ဆိုင်းနေသူတွေက ပြောပါတယ်။
၁၀၂၇ စစ်ဆင်ရေး ဒုတိယပိုင်း စတင်တဲ့ ၁၀ ရက်တာ ကာလအတွင်း စစ်ကောင်စီရဲ့ လက်နက်ကြီးနဲ့ လေကြောင်း ပစ်ခတ်မှုတွေကြောင့် သံဃာတော်နဲ့ အရပ်သား အယောက် ၂၀ ထက်မနည်း သေဆုံးခဲ့ပြီး ၃၀ ကျော် ဒဏ်ရာ ရရှိထားတယ်လို့ သိရပါတယ်။
MK-014
